Rashmika Mandanna Cried: రణ్‌బీర్‌ను కొట్టిన తర్వాత ఏడ్చేశాను: రష్మిక ఇంట్రెస్టింగ్ కామెంట్స్
Rashmika Mandanna Cried: యానిమల్ మూవీలో రణ్‌బీర్ కపూర్ ను కొట్టిన తర్వాత తాను బాగా ఏడ్చేసినట్లు రష్మిక మందన్నా చెప్పడం విశేషం. పింక్‌విల్లాతో మాట్లాడుతూ ఆమె ఇంట్రెస్టింగ్ కామెంట్స్ చేసింది.
Rashmika Mandanna Cried: యానిమల్ మూవీ సక్సెస్ ను ఎంజాయ్ చేస్తోంది రష్మిక మందన్నా. అయితే ఈ మూవీలో ఓ సీన్లో తన భర్త రణ్‌విజయ్ పాత్ర పోషించిన రణ్‌బీర్ సింగ్ ను ఆమె కొడుతుంది. ఆ సీన్ చేసిన తర్వాత తాను నిజంగా ఏడ్చేసినట్లు ఆమె చెప్పడం విశేషం. అంతగా తాను ఆ సీన్లో లీనమైపోయినట్లు పింక్‌విల్లాకు ఇచ్చిన ఇంటర్వ్యూలో రష్మిక చెప్పింది.
యానిమల్ మూవీలో గీతాంజలి పాత్రలో రష్మిక, రణ్‌విజయ్ పాత్రలో రణ్‌బీర్ కపూర్ నటించారు. ఈ మూవీలో జోయా పాత్ర పోషించిన తృప్తి దిమ్రితో తాను సెక్స్ చేసినట్లు ఓ సీన్లో తన భార్యకు రణ్‌బీర్ చెబుతాడు. అది విని అతన్ని చెంపదెబ్బ కొడుతుంది రష్మిక. ఈ సీన్ చేసిన తర్వాత తాను ఏడ్చానని, గట్టిగట్టిగా అరిచానని ఆమె వెల్లడించింది.
రష్మిక, రణ్‌బీర్ సీన్ ఇదే
సందీప్ రెడ్డి వంగా డైరెక్ట్ చేసిన యానిమల్ మూవీలో రణ్‌బీర్ భార్య పాత్రలో రష్మిక నటించింది. అయితే అతన్నే కొట్టే సీన్ గురించి డైరెక్టర్ తనకు వివరించాడని, అలా జరిగినప్పుడు సహజంగా ఓ భార్య ఎలా ఫీలవుతుందో అలాగే ఫీలవ్వాలని మాత్రం అతడు చెప్పినట్లు ఆమె వివరించింది. "ఆ సీక్వెన్స్ మొత్తం ఒకే టేక్ లో చేసేశాం. ఎందుకంటే ఆ సీన్లో బాగా కదలిక ఉంది. ఏదీ అంచనా వేయలేని పరిస్థితి. నేనేం చేయబోతున్నానో కూడా నాకు తెలియని పరిస్థితి.
ఆ పరిస్థితుల్లో ఒకరు ఎలా ఫీలవుతారో అలాగే ఫీలవ్వాలని మాత్రమే సందీప్ నాకు చెప్పాడు. నాకు అది మాత్రమే గుర్తుంది. యాక్షన్, కట్ కు మధ్య నాకు ఇంకేమీ గుర్తు లేదు. అసలేం జరిగిందో తెలియదు. నా మెదడు మొద్దుబారిపోయింది" అని రష్మిక చెప్పింది.
జోయాతో తాను పడుకున్నానని, ఆమె ఉద్దేశమేంటో తెలుసుకోవడానికే ఆ పని చేసినట్లు గీతాంజలితో చెబుతాడు రణ్‌విజయ్. అది విని అతన్ని చెంపదెబ్బ కొడుతుంది. తర్వాత ఇద్దరి మధ్య గొడవ జరుగుతుంది. ఆ సీన్లో తాను పూర్తిగా లీనమైపోయానని, తర్వాత రణ్‌బీర్ దగ్గరకు వెళ్లి ఎలా ఉన్నాడో అని ఆరా తీసినట్లు రష్మిక చెప్పింది.
"ఆ సీన్ తర్వాత నేను నిజంగానే ఏడ్చాను. నేను అతన్ని కొట్టాను. నేను అరుస్తూనే ఉన్నాను. అంతా గందరగోళంగా ఉంది. తర్వాత నేను రణ్‌బీర్ దగ్గరకు వెళ్లాను. నువ్వు బాగానే ఉన్నావా అని అతన్ని అడిగాను. ఆ సీన్ మేము సగం రోజులో పూర్తి చేశాం. నాకు బాగా నచ్చింది. ఓ యాక్టర్ గా సీన్లో లీనమైపోవడమంటే ఇదే. ఇలాంటి సీన్లు తరచూ రావు. నేను ఈ సినిమా, ఈ సీన్ చేసినందుకు చాలా సంతోషంగా ఉంది. నాకే ఆశ్చర్యంగా అనిపించింది" అని రష్మిక చెప్పింది.
ఎన్నో విమర్శల మధ్య కూడా యానిమల్ మూవీ బాక్సాఫీస్ దగ్గర పెద్ద సక్సెస్ సాధించింది. ప్రపంచవ్యాప్తంగా ఈ మూవీ రూ.900 కోట్లకుపైగా వసూలు చేసింది. గతేడాది అత్యధిక వసూళ్లు సాధించిన సినిమాల్లో ఒకటిగా నిలిచింది. ఈ మూవీలో రణ్‌బీర్, రష్మికతోపాటు అనిల్ కపూర్, తృప్తి దిమ్రి నటించారు. బాబీ డియోల్ విలన్ పాత్ర పోషించాడు.
