Allu Arjun: పేరుని రౌండప్ చేసి కొట్టాలని ఫిక్స్ అయ్యి.. రెండేళ్లలో కొట్టి చూపించిన అల్లు అర్జున్

పుష్ప-2 మూవీ ప్రమోషన్స్‌ని ఐకాన్ స్టార్ అల్లు అర్జున్ షురూ చేశారు. ప్రపంచవ్యాప్తంగా డిసెంబరు 5న పుష్ప: ది రూల్ మూవీ థియేటర్లలోకి రాబోతుండగా.. త్వరలోనే దేశ వ్యాప్తంగా ప్రమోషన్ ఈవెంట్స్ చేయడానికి చిత్ర యూనిట్ సిద్ధమవుతోంది. ఈ క్రమంలో అల్లు అర్జున్.. నందమూరి బాలకృష్ణ హోస్ట్‌గా వ్యవహరిస్తున్న అన్‌స్టాపబుల్ విత్‌ ఎన్‌బీకే-4లో సందడి చేయనున్నారు. ఈ మేరకు తాజాగా ప్రొమోను ఆహా ఓటీటీలో రిలీజ్ చేశారు. అల్లు అర్జున్ ఈ అన్‌స్టాపబుల్‌కి గెస్ట్‌గా రావడం ఇది రెండోసారి.

అల్లు అర్జున్‌ని ఈ టాక్ షోలో ఇరుకునపడేసే ప్రశ్నల్ని సంధించిన నందమూరి బాలకృష్ణ.. ప్రొఫెషనల్, పర్సనల్ లైఫ్ గురించి కూడా సరదా ప్రశ్నలు సంధించారు. ఈ క్రమంలో ఇద్దరి మధ్య నేషనల్ అవార్డ్ గురించి చర్చ‌కి రాగా.. అల్లు అర్జున్ ఆ అవార్డుని తాను టార్గెట్ చేసిన తీరుని సవివరంగా చెప్పుకొచ్చారు.

‘‘నేషనల్ అవార్డు రాగానే నీకు ఎలా అనిపించింది?’’ అని బాలయ్య ప్రశ్నించగా.. అల్లు అర్జున్ సమాధానమిచ్చారు. ‘‘బెస్ట్ యాక్టర్ కింద.. నేషనల్ అవార్డు ఎవరెవరికి వచ్చిందా? అని చెక్ చేస్తే.. ఒక్క తెలుగు పేరు కూడా నాకు కనిపించలేదు. అది నా మనసులో అలానే ఉండిపోయింది. దాంతో ఆ నేషనల్ అవార్డ్ పేరుని రౌండప్ చేసి.. దీన్ని నేను కొట్టాలి’’ అని అప్పట్లో ఫిక్స్ అయినట్లు అల్లు అర్జున్ గుర్తు చేసుకున్నారు.

2021, డిసెంబరు 17న ‘పుష్ప: ది రైజ్’ సినిమా రిలీజ్ అవగా.. ఈ సినిమాలో నటనకిగానూ అల్లు అర్జున్‌కి నేషనల్ అవార్డ్ వచ్చింది. అక్టోబరు 17, 2023న ఢిల్లీలో రాష్ట్రపతి ద్రౌపది ముర్ము చేతుల మీదుగా ఉత్తమ నటుడిగా నేషనల్ అవార్డ్‌ను అల్లు అర్జున్ స్వీకరించారు. దశాబ్దాల చరిత్ర ఉన్న తెలుగు సినీ చరిత్రలో నేషనల్ అవార్డ్ దక్కించుకున్న తొలి నటుడిగా అల్లు అర్జున్ అరుదైన ఘనతని సాధించిన విషయం తెలిసిందే.

సుకుమార్ దర్శకత్వంలో తెరకెక్కుతున్న పుష్ప-2లో అల్లు అర్జున్ సరసన రష్మిక మంధాన నటిస్తుండగా.. శ్రీలీల స్పెషల్ సాంగ్‌లో ఐకాన్ స్టార్‌తో ఆడిపాడబోతోంది. మలయాళ విలక్షణ నటుడు ఫహాద్‌ ఫాజిల్‌, జగపతి బాబు, అనసూయ, సునీల్ తదితరులు ఈ సినిమాలో నటిస్తున్నారు.

నవంబరు 15న ఆహా‌లో ఈ ఎపిసోడ్ స్ట్రీమింగ్‌కానుంది.