Prabhas Upcoming Movie: సీతారామం డైరెక్టర్‌తో ప్రభాస్ తదుపరి మూవీ.. యూనిక్ రొమాంటిక్ లవ్ స్టోరీ..!

Prabhas Upcoming Movie: పాన్ ఇండియా స్టార్ ప్రభాస్ ప్రస్తుతం వరుసగా సినిమాలు చేస్తూ ఫుల్ బిజీగా ఉన్నారు. ఇప్పటికే ఆదిపురుష్ మూవీ వచ్చే నెలలో విడుదలయ్యేందుకు సిద్ధంగా ఉంది. ఆ తర్వాత సెప్టెంబరులో సలార్ మూవీ ప్రేక్షకుల ముందుకు రానుంది. వీటితో పాటు మారుతీ దర్శకత్వంలో ఓ చిత్రం చేస్తున్నారు. ఇవి కాకుండా మరో మూడు ప్రాజెక్టులు పైప్ లైన్‌లో ఉన్నాయి. ఇదిలా ఉంటే తాజాగా మరో మూవీకి సిద్ధమైనట్లు తెలుస్తోంది. ఫిల్మ్ వర్గాల సమాచారం ప్రకారం టాలీవుడ్ డైరెక్టర్ హను రాఘవపూడి దర్శకత్వంలో పనిచేసేందుకు ఆసక్తి చూపిస్తున్నారట మన డార్లింగ్.

గతేడాది సీతారామం సినిమాతో అద్భుత విజయాన్ని సొంతం చేసుకున్న హను రాఘవపూడి.. తన తదుపరి చిత్రాన్ని ప్రభాస్‌తో ప్లాన్‌ చేస్తున్నట్లు తెలుస్తోంది. డార్లింగ్‌తో ఓ యూనిక్ రొమాంటిక్ డ్రామా తీసేందుకు చూస్తున్నారట. ప్రత్యేకమైన కథాంశంతో విస్తృత స్థాయిలో ప్రేక్షకులను ఆకట్టుకునేలా ప్లాన్ చేస్తున్నారన ిసమాచారం. హను రాఘవపూడితో వర్క్ చేసేందుకు ప్రభాస్ కూడా ఆసక్తి కనబరుస్తున్నారట. వీరిద్దరి మధ్య గత కొంతకాలంగా సినిమా విషయంలో చర్చలు జరుగుతున్నాయని ఫిల్మ్ వర్గాల్లో గుసగుసలు వినిపిస్తున్నాయి. వైజయంతీ మూవీస్ పతాకంపై ఈ సినిమా రానున్నట్లు తెలుస్తోంది.

ప్రభాస్ ప్రస్తుతం పాన్ ఇండియా చిత్రం సలార్‌తో బిజీగా ఉన్నారు. ప్రశాంత్ నీల్ దర్శకత్వంలో వస్తున్న ఈ సినిమా చిత్రీకరణ ముగింపు దశలో ఉంది. ఇది పూర్తయిన తర్వాత మారుతీతో మూవీలో నటిస్తారు. దీంతో పాటు వైజయంతీ బ్యానర్‌లోనే తెరకెక్కుతున్న ప్రాజెక్టు-కేను పూర్తి చేయనున్నారు. నాగ్ అశ్విన్ దర్శకత్వంలో రూపొందుతున్న ఈ సినిమా గ్లోబల్ స్థాయిలో విడుదల కానుంది. వీటన్నింటి తర్వాత హను రాఘవపూడితో మూవీని పట్టాలెక్కించనున్నారు ప్రభాస్.

ప్రస్తుతం ప్రభాస్ ఆదిపురుష్ ప్రమోషన్లలో బిజీగా ఉన్నారు. ఇటీవలే విడుదలైన ట్రైలర్‌కు మంచి రెస్పాన్స్ వచ్చింది. దీంతో మూవీపై అంచనాలు భారీగా ఏర్పడ్డాయి. రామాయణం ఆధారంగా తెరకెక్కిన ఈ సినిమాలో ప్రభాస్ రాముడిగా నటించగా.. సీతగా బాలీవుడ్ హీరోయిన్ కృతి సనన్, రావణుడిగా సైఫ్ అలీ ఖాన్, లక్ష్మణుడిగా సన్నీ సింగ్ ముఖ్య పాత్రలను పోషించారు. అంతేకాకుండా టీ-సిరీస్, రెట్రోపైల్స్ బ్యానర్లలో భూషన్ కుమార్, క్రిషన్ కుమార్, ఓం రౌత్, ప్రసాద్ సుతార్, రాజేశ్ నాయర్ నిర్మిస్తున్నారు. తన్హాజీ ఫేమ్ ఓం రౌత్ ఈ చిత్రానికి దర్శకత్వం వహిస్తున్నారు. సాచేత్ పరంపరా సంగీతాన్ని సమకూరుస్తున్నారు. పాన్ ఇండియా రేంజ్‌లో తెలుగుతో పాటు హిందీ, తమిళం, కన్నడ, మలయాళ భాషల్లో ఈ సినిమా ఏకకాలంలో విడుదల కానుంది. జూన్ 16న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.