OMG 2 trailer: శివుడి దూతగా వస్తున్న అక్షయ్.. ఇంట్రెస్టింగ్‌గా ఓఎంజీ2 ట్రైలర్

OMG 2 trailer: ఎప్పుడో 11 ఏళ్ల కిందట వచ్చిన ఓ మై గాడ్ మూవీకి సీక్వెల్ గా వస్తున్న ఓఎంజీ2 ట్రైలర్ గురువారం (ఆగస్ట్ 3) రిలీజైంది. సెన్సార్ బోర్డు దగ్గర అడ్డంకులు, ఎన్నో కట్స్.. చివరికి ఏ సర్టిఫికెట్ పొందిన తర్వాత చాలా ఆలస్యంగా ఈ మూవీ ట్రైలర్ రిలీజ్ చేశారు. ఇందులో అక్షయ్ కుమార్ శివుడి దూతగా కనిపించనున్నాడు.

తన కొడుకు భవిష్యత్తును కాపాడుకోవడం కోసం తాపత్రయపడుతూ.. అతనిపై నమోదైన కేసును కోర్టులో తనకు తానే వాదించుకునే వ్యక్తికి సాయం చేయడానికి అక్షయ్ రావడం ఓఎంజీ 2 ట్రైలర్ లో చూడొచ్చు. ఆ తండ్రి పాత్రలో విలక్షణ నటుడు పంకజ్ త్రిపాఠీ కనిపించాడు. తన భక్తుడు ఒకరు కష్టాల్లో ఉన్నాడని.. అతనికి సాయం చేయడానికి ఎవరినైనా పంపించాలని తన వాహనమైన నందికి శివుడు చెప్పే సీన్ తో ఈ ట్రైలర్ మొదలైంది.

స్కూల్లో ఓ అసభ్యకరమైన పని చేసిన తన కొడుకును స్కూలు నుంచి పంపేచేస్తుంది యాజమాన్యం. దీనిపై న్యాయం చేయాలంటూ ఆ తండ్రి కోర్టుకెక్కుతాడు. అదే సమయంలో తాను ఎంతగానో నమ్మే శివున్నీ వేడుకుంటాడు. కోర్టులో తన కేసును తానే వాదించుకుంటాడు. ప్రత్యర్థి లాయర్ గా యామీ గౌతమ్ నటించింది. వీళ్లిద్దరి మధ్య జరిగే కోర్టు డ్రామాను ట్రైలర్ లో చూపించారు.

వాళ్ల వాదనలు సరదాగా సాగుతూనే మన భారతీయ విద్యా వ్యవస్థలోని లోపాలనూ ఎత్తి చూపేలా ఉంటుంది. అమిత్ రాయ్ ఈ ఓఎంజీ 2 మూవీని డైరెక్ట్ చేశాడు. ఈ సినిమా ఆగస్ట్ 11న రిలీజ్ కానుంది. ఓ మతానికి సంబంధించిన సున్నితమైన అంశాలు ఉన్న కారణంగా ఈ సినిమాకు క్లియరెన్స్ ఇవ్వడానికి సెన్సార్ బోర్డు చాలా జాగ్రత్తగా వ్యవహరించింది.

ఏకంగా 25 కట్స్ చెప్పడంతోపాటు చివరికి ఎ సర్టిఫికెట్ ఇవ్వడం ఓఎంజీ 2 మూవీ మేకర్స్ ను షాక్ కు గురి చేసింది. బుధవారమే ఈ సినిమా ట్రైలర్ రిలీజ్ కావాల్సి ఉన్నా.. ఆర్ట్ డైరెక్టర్ నితిన్ దేశాయ్ మరణానికి సంతాపంగా ఒక రోజు వాయిదా వేశారు.