NTR in USA: అమెరికాలో ఎన్‌టీఆర్.. న్యూయార్క్ రెస్టారెంటులో సందడి చేసిన హీరో

NTR in USA: యంగ్ టైగర్ ఎన్‌టీఆర్ ప్రస్తుతం కొరటాల శివ దర్శకత్వంలో ఓ సినిమా చేయబోతున్న సంగతి తెలిసిందే. ఆచార్య డిజాస్టర్ తర్వాత దర్శకుడు కొరటాల తెరకెక్కిస్తున్న ఈ సినిమా ప్రీ ప్రొడక్షన్ పనులు కొనసాగుతున్నాయి. ఇప్పటికే ఈ సినిమా ప్రారంభం కావాల్సి ఉండగా.. స్క్రిప్టు వర్క్‌ను పునరుద్ధరించడంతో ఆలస్యమైంది. దీంతో తారక్ లాంగ్ వెకేషన్‌కు ప్లాన్ చేశారు. ఇటీవలే ఆయన అమెరికా వెళ్లి అక్కడ ఫ్యామిలీతో నాణ్యమైన సమయాన్ని గడపుతున్నారు. తాజాగా ఆయన అక్కడకు సంబంధించిన సోషల్ మీడియాలో ఓ ఫొటోను షేర్ చేశారు.

ఇటీవలే జూనియర్ ఎన్‌టీఆర్ న్యూయార్క్‌‍లోని జునూన్ ఓ భారతీయ రెస్టారెంట్‌కు వెళ్లారు. ఆ రెస్టాంరెంటులో వంటలను రుచి చూసిన ఈ యాక్టర్ అక్కడ చెఫ్‌లతో కలిసి ఓ ఫొటో దిగారు. ఆ ఫొటోను తన ఇన్‌స్టాగ్రామ్ స్టోరీలో పంచుకున్నారు. అంతేకాకుండా ఆ స్టోరీ కింద క్యాప్షన్‌ను కూడా జోడించారు.

అంతర్జాతీయ పర్యటనలోనూ అత్యుత్తమ భారతీయ ఆహారాన్ని ఆస్వాదించవచ్చు. న్యూయార్క్‌లోని జునూన్ అనే రెస్టారెంటులో స్పైసీగా అదిరిపోయే వంటలను రుచిచూశాను. అద్భుతంగా ఉంది. అని తారక్ తన స్టోరీకి క్యాప్షన్‌ను జత చేశారు. అంతేకాకుండా ఈ స్టార్ హీరోతో రెస్టారెంటు సిబ్బంది కలిసి ఫొటో దిగారు. గుబురు మీసాలు, గడ్డంతో ఎన్‌టీఆర్ ఫుల్ మాస్ లుక్‍‌లో కనిపించారు. ప్రస్తుతం ఈ స్టోరీ సోషల్ మీడియాలో వైరల్‌గా మారింది. నెటిజన్లు కూడా విశేషంగా స్పందిస్తున్నారు.

కొరటాల శివ దర్శకత్వంలో ఎన్టీఆర్ చేస్తున్న సినిమా NTR30 అనే వర్కింగ్ టైటిల్‌లో తెరకెక్కనుంది. ఆచార్య పరాజయంపై ఈ సినిమాపై పడకూడదని.. తారక్ కూడా ఇందులో ఇన్వాల్వ్ అవుతున్నట్లు అంతర్గత వర్గాల నుంచి టాక్ వినిపిస్తోంది. పాన్ఇండియా స్థాయిలోనే కాకుండా ఇంటర్నేషనల్ ప్రమాణాలతో సినిమాను తెరకెక్కించాలని మేకర్స్ నిర్ణయించుకున్నారట. ఈ సినిమాలో హీరోయిన్ ఎవరనేది ఇంకా ఓ కొలిక్కి రాలేదు. త్వరలోనే ఈ చిత్రానికి సంబంధించిన మరిన్ని వివరాలను చిత్రబృందం తెలియజేయనుంది. నందమూరి తారక రామారావు ఆర్ట్స్, యువసుధ ఆర్ట్స్ పతాకాలపై సంయుక్తంగా ఈ సినిమా రూపొందుతొంది. మాస్ యాక్షన్ ఎంటర్టైనర్‌గా తెరకెక్కనుంది. దీని తర్వాత ప్రశాంత్ నీల్ దర్శకత్వంలో సినిమా చేయనున్నారు తారక్.