Munna Bhai MBBS 3: మున్నాభాయ్ ఎంబీబీఎస్ 3 వస్తోందా? బొమన్ ఇరానీ ఏమన్నాడంటే

Munna Bhai MBBS 3: మున్నాభాయ్ ఎంబీబీఎస్ ఫ్రాంఛైజీ ఎంత పెద్ద హిట్టో తెలుసు కదా. ఇప్పటికే వచ్చిన రెండు సినిమాలు మంచి టాక్ సొంతం చేసుకున్నాయి. ఈ రెండు సినిమాలనూ తెలుగులో చిరంజీవి రీమేక్ కూడా చేశాడు. ఇక ఇప్పుడు మున్నాభాయ్ ఎంబీబీఎస్ 3 కూడా రాబోతోందా? ఈ మూవీలో సర్కిట్ గా నటించిన అర్షద్ వార్సీ మూడో పార్ట్ షూటింగ్ త్వరలోనే ప్రారంభం కానున్నట్లు చెప్పాడు.

అయితే దీనిపై తాజాగా ఈ ఫ్రాంఛైజీ నటుడు బొమన్ ఇరానీ స్పందించాడు. వెల్‌కమ్ జిందగీ అనే గుజరాతీ నాటకం ప్రదర్శన సందర్భంగా బొమన్.. ఈ మున్నాభాయ్ ఎంబీబీఎస్ 3 గురించి మాట్లాడాడు. "మున్నాభాయ్ ఎంబీబీఎస్ 3 గురించి నాకు తెలియదు. నిజంగా తెలియదు. అర్షద్ దీనిపై అప్‌డేట్ అనౌన్స్ చేశాడంటే నేను కూడా చాలా ఎక్సైటింగా ఉన్నాను" అని అన్నాడు. త్వరలోనే ఈ థర్డ్ పార్ట్ షూటింగ్ ప్రారంభం కాబోతోందని ఈ మధ్యే అర్షద్ వార్సీ వెల్లడించాడు. మొదటి రెండు సినిమాల్లో సంజయ్ దత్, అర్షద్ జోడీ అభిమాలను నవ్వుల్లో ముంచెత్తిన విషయం తెలిసిందే.

రాజ్ కుమార్ హిరానీ ఆ రెండు సినిమాలను డైరెక్ట్ చేశాడు. ప్రస్తుతం అతడు షారుక్ ఖాన్ తో డంకీ సినిమా చేస్తున్నాడు. అందులో బొమన్ ఇరానీ కూడా నటిస్తున్నాడు. ఈ మూవీ తర్వాత బొమన్ తొలిసారి డైరెక్ట్ చేయడానికి సిద్ధమవుతున్నాడు. గత నాలుగైదు నెలలుగా తన సినిమాపై పని చేస్తున్నానని, దీనిని తానే డైరెక్ట్ చేస్తుండటంతోపాటు ప్రొడ్యూసర్ కూడా తానేనని చెప్పాడు.

ఎప్పుడో 20 ఏళ్ల కిందట తొలిసారి వచ్చిన మున్నాభాయ్ ఎంబీబీఎస్ మూవీ ప్రేక్షకులను ఎంతగానో ఆకట్టుకుంది. ఈ మూవీని తెలుగులో శంకర్‌దాదా ఎంబీబీఎస్ పేరుతో చిరంజీవి రీమేక్ చేశాడు. ఆ తర్వాత లగేరహో మున్నాభాయ్ మూవీని కూడా శంకర్‌దాదా జిందాబాద్ పేరుతో తెలుగులో తీసుకొచ్చారు. రాజకీయాల్లోకి వెళ్లకు ముందు చిరంజీవి చేసిన చివరి మూవీ అదే.