Guntur Kaaram First Review: గుంటూరు కారం ఫస్ట్ రివ్యూ.. రూల్స్ తిరగరాసే మాస్ మసాలా ఎంటర్టైనర్

First Review Of Guntur Kaaram: సూపర్ స్టార్ మహేశ్ బాబు, త్రివిక్రమ్ శ్రీనివాస్ కాంబినేషన్‌లో ముచ్చటగా మూడోసారి వస్తున్న సినిమా గుంటూరు కారం. అతడు, ఖలేజా వంటి సినిమాల తర్వాత మూడోసారి వస్తున్న సినిమా గుంటూరు కారం కావడంతో టాలీవుడ్ సినీ ఇండస్ట్రీలో భారీ అంచనాలు నెలకొన్నాయి. సినిమా ప్రారంభం నుంచి నేటివరకు విపరీతమైన క్రేజ్ సంపాదించుకుంది గుంటూరు కారం మూవీ.

ఇక గుంటూరు కారం మూవీని హారిక అండ్ హాసిని క్రియేషన్స్ పతాకంపై ఎస్. రాధాకృష్ణ (చినబాబు) ప్రతిష్టాత్మకంగా నిర్మించారు. ఈ సినిమాలో శ్రీలీల, మీనాక్షి చౌదరి హీరోయిన్లుగా నటించారు. ఈ చిత్రానికి ఎస్. థమన్ సంగీతం అందించారు. భారీ అంచనాల నడుమ సంక్రాంతి కానుకగా జనవరి 12న 'గుంటూరు కారం' చిత్రం ప్రపంచవ్యాప్తంగా భారీస్థాయిలో విడుదల కానుంది. గుంటూరు కారం సినిమా నుంచి విడుదలైన పోస్టర్స్, సాంగ్స్, ట్రైలర్‌కు సూపర్బ్ రెస్పాన్స్ వస్తోంది. వాటిలో కుర్చీ మడతపెట్టి సాంగ్‌కు అయితే విమర్శలు తలెత్తిన ఓవరాల్‌గా బాగానే బజ్ క్రియేట్ చేసింది.

గుంటూరు కారం సినిమాకు ప్రమోషన్స్ కూడా జోరుగా నిర్వహిస్తున్నారు. ఈ నేపథ్యంలో మంగళవారం (జనవరి 9) సాయంత్రం గుంటూరులోని నంబూరు క్రాస్ రోడ్స్‌లో గుంటూరు కారం ప్రీ రిలీజ్ ఈవెంట్ నిర్వహించారు. ఇక గుంటూరు కారం సినిమా ఇటీవలే సెన్సార్ టాక్ పూర్తి చేసుకుంది. గుంటూరు కారం సినిమాకు సెన్సార్ బోర్డ్ U/A సర్టిఫికేట్ ఇచ్చింది. అలాగే సినిమాకు ఎలాంటి కట్స్ లేకుండా సెన్సార్ పూర్తయిందని తెలుస్తోంది.

గుంటూరు కారం సినిమా రన్ టైమ్ 2 గంటల 39 నిమిషాలు ఉందని తెలిసింది. వాటిలో ఫస్టాఫ్ 85 నిమిషాలు, సెకండాఫ్ 74 నిమిషాల (మొత్తంగా 159 నిమిషాలు) నిడివితో ఉంటుందట. అయితే, గుంటూరు కారం మూవీలోని కొన్ని డైలాగ్స్‌కు మాత్రం మ్యూట్ చేసినట్లు సమాచారం. గుంటూరు కారం సినిమా ప్రింట్స్ ఇప్పటికే ఓవర్సీస్‌కు డెలీవరి అయ్యాట. అలాగే దుబాయ్‌లో కూడా గుంటూరు కారం సెన్సార్ పూర్తి చేసుకుంది. ఈ క్రమంలో గుంటూరు కారం ఫస్ట్ రివ్యూ రానే వచ్చింది. మూవీ క్రిటిక్, దుబాయ్ సెన్సార్ బోర్డ్ మెంబర్‌గా చెప్పుకునే ఉమర్ సంధు గుంటూరు కారం మూవీపై రివ్యూ ఇచ్చాడు.

గుంటూరు కారం రివ్యూను సోషల్ మీడియాలో షేర్ చేశాడు ఉమర్ సంధు. అందులో.. "ఓవర్సీస్ సెన్సార్ బోర్డ్ నుంచి గుంటూరు కారం మూవీ ఫస్ట్ రివ్యూ. మహేశ్ బాబుతోపాటు ఎంటర్టైన్‌మెంట్ అధిక మోతాదులో ఉంది. సినిమాలో మాస్ ప్రేక్షకులకు కావాల్సిన మసాలా ఎలిమెంట్స్ పుష్కలంగా ఉన్నాయి. అవి మాస్ పీపుల్‌కు బాగా వర్కౌట్ అవుతాయి. రూల్స్ తిరగరాసే సినిమా అవుతుంది. సినిమాకు పండుగ సీజన్ మరింత కలిసి వస్తుంది. సూపర్ హిట్" అని చెప్పిన ఉమర్ సంధు 5కి 3.5 స్టార్ రేటింగ్ ఇచ్చాడు.

కాగా మహేశ్ బాబు, తివిక్రమ్ శ్రీనివాస్ మూడోసారి కలిసి చేస్తున్న సినిమా ఇది. అతడు, ఖలేజా తర్వాత దాదాపు 14 సంవత్సరాల తర్వాత వస్తున్న సినిమా కావడంతో మహేశ్ బాబు అభిమానులు ఎంతో ఆతృతగా ఎదురుచూస్తున్నారు. ఇక సంక్రాంతికి విడుదలకు రెడీగా ఉన్న గుంటూరు కారం సినిమాకు పోటీగా తేజ సజ్జా హనుమాన్, వెంకటేష్ సైంధవ్, నాగార్జున నా సామిరంగ సినిమాలు బరిలో ఉన్నాయి. మరి వీటిలో సంక్రాంతి సూపర్ హిట్ మూవీ ఏది అవుతుందో చూడాలి.