Murder Mystery OTT: ఓటీటీలోకి కోలీవుడ్‌ మర్డర్ మిస్టరీ మూవీ - లో బ‌డ్జెట్‌లో పెద్ద హిట్ - తెలుగులోనూ స్ట్రీమింగ్‌

Murder Mystery OTT: కోలీవుడ్ క‌మెడియ‌న్ స‌తీష్ హీరోగా న‌టించిన లేటెస్ట్ మూవీ స‌ట్టం ఎన్ కైయిల్ బాక్సాఫీస్ వ‌ద్ద మంచి వ‌సూళ్ల‌ను రాబ‌ట్టింది. క్రైమ్ థ్రిల్ల‌ర్ క‌థాంశంతో రూపొందిన ఈ మూవీకి చాచి ద‌ర్శ‌క‌త్వం వ‌హించాడు. ఈ థ్రిల్ల‌ర్ మూవీలో స‌తీష్‌తో పాటు మైమ్‌గోపి, అజ‌య్ రాజ్ కీల‌క పాత్ర‌ల్లో న‌టించాడు.

క్రికెట‌ర్ అశ్విన్‌...

డిఫ‌రెంట్ ప్ర‌మోష‌న్స్‌తో కోలీవుడ్ ఆడియెన్స్‌లోస‌ట్టం ఎన్ కైయిల్ మూవీ ఆస‌క్తిని రేకెత్తించింది. ఈ సినిమా ప్ర‌మోష‌న్స్‌లో టీమిండియా క్రికెట‌ర్ ర‌విచంద్ర‌న్ అశ్విన్ కూడా పాల్గొన్నాడు. సెప్టెంబ‌ర్ 27న థియేట‌ర్ల‌లో రిలీజైన ఈ మూవీ నిర్మాత‌ల‌కు లాభాల‌ను తెచ్చిపెట్టింది.

అమెజాన్ ప్రైమ్ వీడియోలో...

తాజాగా స‌ట్టం ఎన్ కైయిల్ మూవీ ఓటీటీలోకి రాబోతోంది. ఈ సినిమా డిజిట‌ల్ స్ట్రీమింగ్ హ‌క్కుల‌ను అమెజాన్ ప్రైమ్ వీడియో ద‌క్కించుకున్న‌ది. న‌వంబ‌ర్ 8న ఈ క్రైమ్ థ్రిల్ల‌ర్ మూవీ ఓటీటీలో విడుద‌ల కాబోతోంది. త‌మిళంతో పాటు తెలుగు, క‌న్న‌డం, మ‌ల‌యాళం, హిందీ భాష‌ల్లో ఈ మూవీ స్ట్రీమింగ్ కానున్న‌ట్లు చెబుతోన్నారు.

ఇంట్రెస్టింగ్ ట్విస్ట్‌ల‌తో...

రివేంజ్ థ్రిల్ల‌ర్ పాయింట్‌తో స‌ట్టం ఎన్ కైయిల్ మూవీని ద‌ర్శ‌కుడు చాచి తెర‌కెక్కించాడు. క‌థ రొటీన్ అయినా ఇంట్రెస్టింగ్ ట్విస్ట్‌ల‌తో ద‌ర్శ‌కుడు ఈ సినిమాను న‌డిపించిన తీరు ఆడియెన్స్‌ను మెప్పించింది.

కోలీవుడ్‌లో ఎక్కువ‌గా కామెడీ రోల్స్ చేసిన స‌తీష్ గ‌త సినిమాల‌కు పూర్తి భిన్నంగా ఓ సీరియ‌స్ రోల్‌లో త‌న యాక్టింగ్‌తో మెప్పించాడు.

కామ‌న్ మ్యాన్ పోరాటం...

గౌత‌మ్ ఓ కామ‌న్ మ్యాన్‌. ఓ రోజు రాత్రి కార్ డ్రైవ్ చేసుకుంటూ వెళుతోండ‌గా మంచు కార‌ణంగా ఓ బైక‌ర్‌ను ఢీకొడ‌తాడు. ఆ ప్ర‌మాదంలో ఆ వ్య‌క్తి అక్క‌డే చ‌నిపోతాడు. డెడ్‌బాడీని త‌న కారులోనే దాచిపెట్టిన గౌత‌మ్ తెలివిగా ఎస్కేప్ అవుతాడు. గౌత‌మ్ చంపిన వ్య‌క్తి కోసం పోలీసులు వెతుకుంటారు.

అస‌లు అత‌డు ఎవ‌రు? పోలీసుల‌కు దొర‌క్కుండా డెడ్‌బాడీని గౌత‌మ్ ఏం చేశాడు. ఈగోయిస్ట్ పోలీస్ ఆఫీస‌ర్స్‌నాగ‌రాజ్ (అజ‌య్ రాజ్‌), బాషా ( పావెల్ న‌వ‌గీతం) కార‌ణంగా గౌత‌మ్ ఎలాంటి స‌మ‌స్య‌ల్ని ఎదుర్కొన్నాడు? ఈ కేసు నుంచి గౌత‌మ్ బ‌య‌ప‌ప‌డ్డాడా? లేదా? అన్న‌దే ఈ మూవీ క‌థ‌.

సెకండ్ మూవీ...

కంజూరింగ్ క‌న్న‌ప్ప‌న్ త‌ర్వాత హీరోగా స‌తీష్‌ న‌టించిన సెకండ్ మూవీ ఇది. తామిజ్ పాదం (తెలుగులో సుడిగాడు) మూవీతో క‌మెడియ‌న్‌గా కోలీవుడ్‌లో ఫేమ‌స్ అయ్యాడుస‌తీష్‌. ఇప్ప‌టివ‌ర‌కు హాస్య‌న‌టుడిగా 70కిపైగా సినిమాలు చేశాడు.