Comedy Movie OTT: నెలలోపే ఓటీటీలోకి వస్తున్న కీర్తి సురేశ్ తమిళ కామెడీ మూవీ.. తెలుగులోనూ స్ట్రీమింగ్.. ఎక్కడంటే..

స్టార్ హీరోయిన్ కీర్తి సురేశ్ ప్రధాన పాత్ర పోషించిన రఘుతాత సినిమా చాలా క్యూరియాసిటీ మధ్య వచ్చింది. ఈ పొటిలికల్ క్రైమ్ కామెడీ చిత్రం ట్రైలర్ ఆకట్టుకుంది. ప్రమోషన్లను కూడా మూవీ టీమ్ బాగానే చేసింది. ఈ చిత్రం తమిళంలో ఆగస్టు 15వ తేదీన థియేటర్లలో రిలీజ్ అయింది. అయితే, మిక్స్డ్ టాక్ రావటంతో అనుకున్న స్థాయిలో ఈ చిత్రం కలెక్షన్లను రాబట్టుకోలేకపోయింది. రఘుతాత ఓటీటీలోకి ఎప్పుడు అడుగుపెడుతుందా అని చాలా మంది ఎదురుచూస్తున్నారు.

రఘుతాత సినిమా ఓటీటీ స్ట్రీమింగ్ ఖరారైంది. థియేటర్లలో తమిళంలో మాత్రం విడుదలైన ఈ మూవీ ఓటీటీలో మూడు భాషల్లో అడుగుపెట్టనుంది.

స్ట్రీమింగ్ డేట్

రఘుతాత సినిమా సెప్టెంబర్ 13వ తేదీన జీ5 ఓటీటీ ప్లాట్‍ఫామ్‍లో స్ట్రీమింగ్‍కు రానుంది. ఈ విషయాన్ని ఆ ఓటీటీ నేడు (సెప్టెంబర్ 9) అధికారికంగా వెల్లడించింది. “కడుపుబ్బా నవ్వించే ఫ్యామిలీ బ్లాక్‍బస్టర్‌కు రెడీగా ఉండండి. సెప్టెంబర్ 13న రఘుతాత స్ట్రీమింగ్‍కు రానుంది” అని జీ5 ఓటీటీ నేడు సోషల్ మీడియా ద్వారా వెల్లడించింది.

రఘుతాత చిత్రం తమిళంతో పాటు తెలుగు, కన్నడలోనూ జీ5 ఓటీటీలో స్ట్రీమింగ్‍కు రానుంది. దీంతో ఈ మూవీకి ఓటీటీలో మంచి వ్యూస్ దక్కే అవకాశాలు మెండుగా ఉన్నాయి. ఈ మూవీని సెప్టెంబర్ 20న స్ట్రీమింగ్‍కు తేవాలని మేకర్స్ ముందుగా అనుకున్నారు. అయితే, ప్లాన్ మార్చి అందుకు వారం ముందే సెప్టెంబర్ 13నే ఈ చిత్రాన్ని స్ట్రీమింగ్‍కు తీసుకొచ్చేస్తోంది జీ5 ఓటీటీ.

హిందీ వ్యతిరేక ఉద్యమం అంశంతో..

1960ల బ్యాక్‍డ్రాప్‍లో హిందీ వ్యతిరేక ఉద్యమం అనే రాజకీయ అంశం చుట్టూ కామెడీ ప్రధానంగా రఘుతాత చిత్రం రూపొందింది. లవ్ స్టోరీ కూడా ఉంటుంది. ఈ మూవీకి సుమన్ కుమార్ దర్శకత్వం వహించారు. కీర్తి సురేశ్‍తో పాటు ఎంఎస్ భాస్కర, దేవదర్శిని, రవీంద్ర విజయ్, ఆనంద్ సామి, రాజీవ్ రవీంద్రనాథన్ ఈ మూవీలో కీలకపాత్రలు పోషించారు.

కేజీఎఫ్, కాంతార, సలార్ లాంటి బ్లాక్‍బస్టర్ చిత్రాలను నిర్మించిన హొంబాలే ఫిల్మ్స్ బ్యానర్.. రఘుతాత మూవీతోనే తమిళ ఇండస్ట్రీలోకి ఎంటరైంది. ఈ ప్రొడక్షన్ హౌస్‍కు ఇదే తొలి తమిళ మూవీగా ఉంది. ఆ పతాకంపై విజయ్ కిరంగదూర్ ఈ చిత్రాన్ని నిర్మించారు. అయితే, రఘుతాత చిత్రం మిశ్రమ స్పందన తెచ్చుకుంది. దీంతో కమర్షియల్‍గా పెద్దగా సక్సెస్ కాలేకపోయింది. అయితే, కీర్తి సురేశ్ నటనకు మరోసారి ప్రశంసలు దక్కాయి.

రఘుతాత మూవీకి సీన్ రొనాల్డన్ సంగీతం అందించగా.. యామినీ యజ్ఞమూర్తి సినిమాటోగ్రఫీ చేశారు. ఈ చిత్రంలో 1960ల కాలాన్ని తెరపై మేకర్స్ మెరుగ్గా చూపించారు.

కీర్తి సురేశ్ లైనప్

కీర్తి సురేశ్ ప్రస్తుతం వరుస సినిమాలతో బిజీగా ఉన్నారు. తెలుగులో సుహాస్‍తో కలిసి ఉప్పుకప్పురంబు చిత్రంలో కీర్తి నటిస్తున్నారు. తమిళంలో ‘రివోల్టర్ రీటా’ పేరుతో మరో లేడీ ఓరియెంటెడ్ మూవీ చేస్తున్నారు. ఈ చిత్రానికి కే చంద్రు దర్శకత్వం వహించగా.. జగదీశ్ పళనీస్వామి, సుధాన్ సుందరం నిర్మించారు. తమిళంలోనూ కన్నివీడి అనే చిత్రాన్ని కూడా కీర్తి చేస్తున్నారు. బాలీవుడ్‍లో బేబీ జాన్ మూవీలో కీర్తి సురేశ్ నటిస్తున్నారు. వరుణ్ ధావన్‍కు జోడీగా హీరోయిన్‍గా చేస్తున్నారు.