Kanguva Controversy: హీరోయిన్ దిశా పటానీపై నోరుజారిన కంగువా ప్రొడ్యూసర్ భార్య, ఉతికారేస్తున్న నెటిజన్లు
Disha Patani: కోలీవుడ్‌లోకి కంగువా సినిమాతో దిశా పటాని ఎంట్రీ ఇచ్చింది. కానీ.. ఈ అమ్మడికి ఈ సినిమా కలిసి రాలేదు. సినిమాలో దిశా పటాని పాత్రపై ప్రొడ్యూసర్ భార్య నోరుజారి విమర్శలపాలయ్యారు.
తమిళ్ హీరో సూర్య నటించిన కంగువా సినిమా మిక్స్‌డ్ టాక్‌ను సొంతం చేసుకున్నప్పటికీ.. వసూళ్లలో ఫర్వాలేదు అనిపిస్తోంది. నవంబరు 14న రిలీజైన ఈ సినిమా మొదటి రోజే నెగటివ్ రివ్యూస్ రావడంతో కలెక్షన్లపై ఆ ప్రభావం పడింది. ఇప్పటికే ఆ రివ్యూస్‌పై సూర్య భార్య జ్యోతిక ఘాటుగా స్పందించగా.. కంగువా సినిమా ప్రొడ్యూసర్ కేఈ జ్ఞానవేల్ రాజా భార్య నేహా జ్ఞానవేల్ నోరుజారి విమర్శలపాలైంది.
దిశా పటానీ కనిపించేది కాసేపే
కంగువా సినిమాలో సూర్య సరసన బాలీవుడ్ హీరోయిన్ దిశా పటాని నటించింది. తమిళంలో దిశా పటానికి ఇదే తొలి సినిమా. అయితే.. మూవీలో ఆమె పాత్రని డైరెక్టర్ శివ చాలా పరిమితం చేసేశారు. కేవలం పాటలు, కొన్ని సీన్స్‌తో సరిపెట్టేశారు. అయినప్పటికీ బికినీలో అందాల్ని ఆరబోసిన దిశా పటాని కోసం కంగువా సినిమా చూడొచ్చని నెటిజన్లు కామెంట్స్ చేస్తున్నారు.
కంగువాలో ఎందుకు దిశా పటాని పాత్రని అంత తక్కువగా చూపించారనే ప్రశ్న చిత్ర యూనిట్‌కి ఎదురవుతోంది. దాంతో నేహా జ్ఞానవేల్ రియాక్ట్ అవుతూ.. ‘‘దిశా పటానీని గ్లామర్ కోసం మాత్రమే కంగువాలోకి తీసుకున్నామని.. అందుకే ఆమె చేసిన ఏంజెలా పాత్రకు సినిమాలో ఎక్కువ ఫోకస్ ఇవ్వలేదని’’ అని తేల్చి చెప్పేశారు.
హీరోయిన్‌ను చులకన చేస్తారా?
దిశా పటానీపై నేహా జ్ఞానవేల్ రియాక్ట్ అయిన తీరుపై నెటిజన్లు ఘాటుగా విమర్శలు గుప్పిస్తున్నారు. ఒక మహిళ అయ్యుండి.. ఇలా ఒక హీరోయిన్‌ని చులకన చేస్తూ మాట్లాడతారా? అంటూ నెటిజన్లు చురకలు అంటిస్తున్నారు.
కంగువా నిర్మాత జ్ఞానవేల్ రాజా మీడియాతో మాట్లాడుతూ సినిమా బ్యాక్‌గ్రౌండ్ సౌండ్‌పై వస్తున్న విమర్శలను తిప్పికొట్టారు. ప్రతి ఒక్కరితో మాట్లాడామని, వాల్యూమ్‌ను 2 పాయింట్లు తగ్గించాలని కోరినట్లు వెల్లడించారు.
సౌండ్ తగ్గించాలట
వెయ్యేళ్ల కిందటి కథతో తెరకెక్కిన ఈ సినిమాలో భారీ యాక్షన్ సీక్వెన్స్‌లు ఉన్నాయి. అయితే.. ఆ సీన్స్‌కి బీజీఎం కొన్ని చోట్ల మైనస్‌గా మారింది. దాంతో సూర్య అభిమానులు సైతం మ్యూజిక్ డైరెక్టర్ దేవిశ్రీ ప్రసాద్‌పై విమర్శలు గుప్పించారు. అభిమానుల ఫీడ్ బ్యాక్‌ను పరిగణనలోకి తీసుకుని సౌండ్‌ను 2 పాయింట్లు తగ్గించమని ఎగ్జిబిటర్లకి చెప్పినట్లు జ్ఞానవేల్ రాజా వెల్లడించారు.
రూ.50 కోట్లు మాత్రమే
కంగువా సినిమా ఇప్పటి వరకు కేవలం రూ.50 కోట్లు మాత్రమే వసూళ్లు రాబట్టింది. సినిమా బడ్జెట్‌ రూ.350 కోట్లు పైనే ఉంటుందని టాక్‌ వినిపిస్తోంది. ఈ చిత్రంలో సూర్య కంగువా అనే యోధుడి పాత్రను పోషించాడు. అలానే ఫ్రాన్సిస్ అనే బౌంటీ వేటగాడి పాత్రలోనూ సూర్య నటించగా. హీరోయిన్ దిశా పటాని కూడా బౌంటీ వేటగాడి పాత్రలో కనిపించింది. కంగువా సినిమాకి సీక్వెల్‌ కూడా ఉండబోతోంది.
