Heeramandi first look: ఓటీటీలోకి సంజయ్ లీలా భన్సాలీ.. హీరామండి ఫస్ట్ లుక్ అదుర్స్

Heeramandi first look: బాలీవుడ్ డైరెక్టర్ సంజయ్ లీలా భన్సాలీ మచ్ అవేటెడ్ నెట్‌ఫ్లిక్స్ వెబ్ సిరీస్ హీరామండి: ది డైమండ్ బజార్ ఫస్ట్ లుక్ గ్లింప్స్ గురువారం (ఫిబ్రవరి 1) రిలీజైంది. మనీషా కొయిరాలా, సోనాక్షి సిన్హా, అదితి రావ్ హైదరీ, రిచా చద్దాలాంటి బాలీవుడ్ టాప్ హీరోయిన్లు నటించిన ఈ సిరీస్ ఈ ఏడాదే నెట్‌ఫ్లిక్స్ లోకి రాబోతోంది. ఊహించినట్లే ఫస్ట్ లుక్ భన్సాలీ స్టైల్లో చాలా గ్రాండ్ గా ఉంది.

హీరామండి.. నిజంగా వజ్రమే

నెట్‌ఫ్లిక్స్ ఓటీటీ భారీ బడ్జెట్ తెరకెక్కిస్తున్న సిరీస్ హీరామండి. బాలీవుడ్ లో దేవదాస్, పద్మావత్, బాజీరావ్ మస్తానీ, రామ్ లీలాలాంటి సినిమాలు తెరకెక్కించిన డైరెక్టర్ సంజయ్ లీలా భన్సాలీ తొలిసారి ఓటీటీలో ఈ సిరీస్ ద్వారా అడుగుపెడుతున్నాడు. తాను తీసే ప్రతి సీన్ ను తెరపై అద్భుతంగా ఆవిష్కరించే భన్సాలీ.. ఈ హీరామండిని కూడా అదే స్థాయిలో తీసినట్లు ఫస్ట్ లుక్ చూస్తేనే స్పష్టమవుతోంది.

దేశ స్వతంత్రానికి పూర్వం వేశ్యల జీవనశైలిని కళ్లకు కట్టేలా ఈ సిరీస్ ను భన్సాలీ తీస్తున్నాడు. 1940ల బ్యాక్ డ్రాప్ లో దేశ స్వతంత్ర పోరాటాన్ని ఆవిష్కరిస్తూనే హీరామండి సంస్కృతిని భన్సాలీ ప్రేక్షకుల ముందుకు తీసుకురాబోతున్నాడు. ఈ సిరీస్ లో బాలీవుడ్ అగ్రనటులు మనీషా కొయిరాలా, సోనాక్షి సిన్హా, అదితి రావ్ హైదరీ, రిచా చద్దాలాంటి వాళ్లు నటిస్తున్నారు.

హీరామండి ఎప్పుడు వస్తుందంటే?

ఈ హీరామండి సిరీస్ ఎప్పుడు స్ట్రీమింగ్ అవుతుందన్నది నెట్‌ఫ్లిక్స్ ఇంకా వెల్లడించలేదు. అయితే 2024లోనే అని మాత్రం ఈ ఫస్ట్ లుక్ గ్లింప్స్ లో చెప్పింది. "లెజెండరీ ఇండియన్ క్రియేటర్ సంజయ్ లీలా భన్సాలీ తొలి సిరీస్ హీరామండి ఫస్ట్ లుక్ ఇక్కడ చూడండి" అనే క్యాప్షన్ తో నెట్‌ఫ్లిక్స్ ఈ గ్లింప్స్ రిలీజ్ చేసింది.

ఈ సిరీస్ పై గతంలో సంజయ్ భన్సాలీ స్పందించాడు. ఓ ఫిల్మ్ మేకర్ గా ఈ హీరామండి తన కెరీర్లో ముఖ్యమైన మైలురాయి అని చెప్పాడు. లాహోర్ లోని వేశ్యల జీవితంపై రూపొందించిన తొలి సిరీస్ ఇదే అని అతడు తెలిపాడు. ఈ సిరీస్ కూడా తన సినిమాల్లాగే చాలా గ్రాండ్ గా ఉండబోతోందని సంజయ్ భన్సాలీ స్పష్టం చేశాడు.

మరోవైపు భన్సాలీ ఈ మధ్యే తన నెక్ట్స్ ప్రాజెక్ట్ కూడా అనౌన్స్ చేసిన విషయం తెలిసిందే. లవ్ అండ్ వార్ పేరుతో ఈ సినిమాను తెరకెక్కిస్తున్నాడు. ఇందులో రణ్‌బీర్ కపూర్, ఆలియా భట్, విక్కీ కౌశల్ నటించనుండటం విశేషం. ఆలియా భట్ తో గంగూబాయి కఠియావాడి మూవీ తర్వాత భన్సాలీ తీస్తున్న సినిమా ఇదే.