Bandaa trailer: జీ5 ఓటీటీలో మరో ఇంట్రెస్టింగ్ మూవీ.. బందా ట్రైలర్ రిలీజ్

Bandaa trailer: జీ5 (ZEE5) ఓటీటీ మరో ఇంట్రెస్టింగ్ మూవీని ప్రేక్షకుల ముందుకు తీసుకొస్తోంది. బాబా ముసుగులో ఉన్న వ్యక్తి ఓ అమ్మాయిని లైంగిక వేధింపులకు గురి చేయడం అనే నేపథ్యంలో బందా మూవీ తెరకెక్కింది. నిజ జీవిత ఘటనల ఆధారంగా ఈ బందా మూవీ తీశారు. ఇందులో విలక్షణ నటుడు మనోజ్ బాజ్‌పేయీ ఓ లాయర్ గా కనిపిస్తున్నాడు.

ఈ బందా ట్రైలర్ ను జీ5 సోమవారం (మే 8) రిలీజ్ చేసింది. బాబా చేతుల్లో అన్యాయానికి గురైన ఆ అమ్మాయికి న్యాయం చేయడానికి ప్రయత్నించే లాయర్ గా మనోజ్ ఈ మూవీలో కనిపించాడు. ఈ రెండు నిమిషాల ట్రైలర్ చూస్తుంటే.. మనందరికీ తెలిసిన స్టోరీలానే అనిపిస్తుంది. బాబా ముసుగు వేసుకొని వేలాది అనుచరులను సంపాదించి, తాను ఏం చేసినా చెల్లుతుందనుకునే వ్యక్తిపై సాగే న్యాయ పోరాటంలో గెలుపు ఎవరిది అన్నది ఈ సినిమాలో చూడొచ్చు.

ఈ సినిమాను నేరుగా ఓటీటీలోనే రిలీజ్ చేస్తున్నారు. జీ5 ఓటీటీలో మే 23 నుంచి బందా మూవీ స్ట్రీమింగ్ కానుంది. సిర్ఫ్ ఏక్ బందా కాఫీ హై (ఒకే ఒక్క వ్యక్తి చాలు) అనే క్యాప్షన్ తో జీ5 ఈ మూవీ ట్రైలర్ ను రిలీజ్ చేసింది. ఓ సాధారణ లాయర్.. వేల మంది అనుచరులున్న ఓ బాబాకు చెందిన అసాధారణ కేసును ఎలా వాదించబోతున్నాడన్నది ఆసక్తిగా మారింది.

ఈ సినిమాను అపూర్వ్ సింగ్ కర్కి డైరెక్ట్ చేయగా.. దీపక్ కింగ్రానీ కథ అందించాడు. భానుషాలి స్టూడియోస్ లిమిటెడ్, జీ స్టూడియోస్ ఈ సినిమాను తెరకెక్కించాయి. ఈ మధ్యే ఈ బందా మూవీ గురించి మనోజ్ బాజ్‌పేయీ స్పందించాడు. ఈ కథ వినగానే తాను నటించడానికి అంగీకరించినట్లు చెప్పాడు. ఈ మధ్యే డీస్నీ ప్లస్ హాట్‌స్టార్ లో వచ్చిన గుల్‌మొహర్ మూవీలో కనిపించిన మనోజ్.. త్వరలోనే ది ఫ్యామిలీ మ్యాన్ సీజన్ 3తో రాబోతున్నాడు.