Mystery Thriller OTT: ఓటీటీలోకి యాక్ష‌న్ కింగ్ అర్జున్ మ‌ల‌యాళం మ‌ర్డ‌ర్ మిస్ట‌రీ థ్రిల్ల‌ర్ మూవీ - రిలీజ్ ఎప్పుడంటే?

Mystery Thriller OTT: యాక్ష‌న్ కింగ్ అర్జున్ హీరోగా న‌టించిన మ‌ల‌యాళం మూవీ విరున్ను ఓటీటీలోకి వ‌చ్చేస్తోంది. మ‌ర్డ‌ర్ మిస్ట‌రీ థ్రిల్ల‌ర్‌గా తెర‌కెక్కిన ఈ మూవీకి క‌ణ్ణ‌న్ ద‌ర్శ‌క‌త్వం వ‌హించాడు. నిక్కీ గ‌ల్రానీ, ఆశా శ‌ర‌త్ కీల‌క పాత్ర‌ల్లో న‌టించారు. మ‌ల‌యాళంలో విరున్ను, త‌మిళంలో విరింధుగా ఈ మూవీ రిలీజైంది.కాన్పెప్ట్ ఔట్‌డేటెడ్ కావ‌డం, స్క్రీన్‌ప్లేలో కొత్త‌ద‌నం లేక‌పోవ‌డంతో సినిమా డిజాస్ట‌ర్‌గా నిలిచింది.

నెల త‌ర్వాత ఓటీటీలోకి...

థియేట‌ర్ల‌లో రిలీజైన నెల త‌ర్వాత విరున్ను మూవీ ఓటీటీలోకి వ‌స్తోంది. అక్టోబ‌ర్ 4 నుంచి సింప్లీ సౌత్ ఓటీటీలో ఈ మూవీ స్ట్రీమింగ్ కాబోతోంది. ఈ ఓటీటీలో కేవ‌లం ఓవ‌ర్‌సీస్ ఆడియెన్స్ మాత్ర‌మే సినిమాను చూడొచ్చు. ఇండియ‌న్ ఆడియెన్స్ ముందుకు అక్టోబ‌ర్ 11న అమెజాన్ ప్రైమ్ వీడియో ద్వారా ఈ మ‌ల‌యాళం మూవీ రానుంది. మ‌ల‌యాళం, త‌మిళంతో పాటు తెలుగు, క‌న్న‌డ భాష‌ల్లో అమెజాన్ ప్రైమ్‌లో ఈ మూవీ స్ట్రీమింగ్ కానున్న‌ట్లు స‌మాచారం.

విరున్ను కథ ఇదే...

2021లో విరున్ను సినిమా షూటింగ్ పూర్త‌యింది. అనివార్య కార‌ణాల వ‌ల్ల మూడేళ్ల త‌ర్వాత థియేట‌ర్ల‌లో రిలీజైంది. ఓ భార్య‌భ‌ర్త‌ల హ‌త్య వెన‌కున్న మిస్ట‌రీని ఓ పోలీస్ ఆఫీస‌ర్ ఎలా ఛేదించాడు అన్న‌దే ఈ మూవీ క‌థ‌. జాన్‌, ఎలిజ‌బెత్ భార్య భ‌ర్త‌లు. ఆ ఆఫీస్ మీటింగ్‌కు వెళ్లిన జాన్ అనుమాన‌స్ప‌ద రీతిలో చ‌నిపోతాడు.

ఆ త‌ర్వాత కొద్దిరోజుల‌కే ఎలిజ‌బెత్ యాక్సిడెంట్‌లో చ‌నిపోతుంది. త‌ల్లిదండ్రుల మ‌ర‌ణాల‌పై పెర్లీకి (నిక్కీ గ‌ల్రానీ) అనుమానం మొద‌ల‌వుతుంది. దేవ్ నారాయ‌ణ‌న్ (అర్జున్‌) అనే పోలీస్ ఆఫీస‌ర్ జాన్‌, ఎలిజ‌బెత్ మ‌ర‌ణాల వెన‌కున్న మిస్ట‌రీని ఎలా ఛేదించాడు? వారిని హ‌త్య చేసింది ఎవ‌రు? అన్న‌దే విరున్ను మూవీ క‌థ‌.

లియో మూవీలో..

దాదాపు మూడేళ్ల త‌ర్వాత అర్జున్ మ‌ల‌యాళంలో న‌టించిన మూవీ ఇది. ప్ర‌స్తుతం విల‌న్‌గా, క్యారెక్ట‌ర్ ఆర్టిస్ట్‌గా తెలుగు, త‌మిళ భాష‌ల్లో ప‌లు సినిమాలు చేస్తోన్నాడు అర్జున‌. ద‌ళ‌ప‌తి విజ‌య్‌, లోకేష్ క‌న‌గ‌రాజ్ కాంబోలో గ‌త ఏడాది వ‌చ్చిన బ్లాక్‌బ‌స్ట‌ర్ మూవీ లియోలో హెరాల్డ్ దాస్ అనే ప‌వ‌ర్‌ఫుల్ క్యారెక్ట‌ర్‌లో అర్జున్ క‌నిపించాడు. ప్ర‌స్తుతం అజ‌య్ విదా ముయార్చిలో అర్జున్ ఓ కీల‌క పాత్ర‌లో క‌నిపించ‌బోతున్నాడు.

గ‌త ఏడాది తెలుగులో...

మ‌రోవైపు విరున్నులో కీల‌క పాత్ర చేసిన నిక్కీ గ‌ల్రానీ గ‌తంలో తెలుగులో మ‌లుపు, కృష్ణాష్ట‌మితో పాటు మ‌రికొన్ని సినిమాలు చేసింది. విరున్ను పెళ్లికి ముందు ఆమె అంగీక‌రించిన మూవీ కావ‌డం గ‌మ‌నార్హం. 2022లో ఆది పినిశెట్టిని పెళ్లిచేసుకున్న నిక్కీ గ‌ల్రానీ సినిమాల‌కు దూరంగా ఉంటోంది.