Andrea Jeremiah in saindhav: మేన‌ల్లుడి మూవీతో టాలీవుడ్‌కు గుడ్‌బై - మామ సినిమాతో రీఎంట్రీ - సైంధ‌వ్‌లో ఆండ్రియా

Andrea Jeremiah in Saindhav: వెంక‌టేష్ సైంధ‌వ్ సినిమాతో త‌మిళ క‌థానాయిక‌ ఆండ్రియా టాలీవుడ్‌లోకి రీఎంట్రీ ఇస్తోంది. ఈ సినిమాలో ఆమె జాస్మిన్ అనే క్యారెక్ట‌ర్‌లో క‌నిపించ‌బోతున్న‌ట్లు చిత్ర యూనిట్ ప్ర‌క‌టించింది. శుక్ర‌వారం ఆండ్రియా ఫ‌స్ట్ లుక్ పోస్ట‌ర్‌ను రిలీజ్ చేశారు. చేతిలో రివాల్వ‌ర్‌తో స్పోర్ట్స్‌ బైక్ ముందు నిల్చొని స్టైలిష్ లుక్‌లో ఆండ్రియా క‌నిపిస్తోంది.

సైంధ‌వ్ మూవీలో యాక్ష‌న్ ప్ర‌ధాన పాత్ర‌లో ఆండ్రియా న‌టిస్తోన్న‌ట్లు స‌మాచారం. ఈ సినిమాతో దాదాపు ప‌దేళ్ల త‌ర్వాత ఆండ్రియా టాలీవుడ్‌లోకి రీఎంట్రీ ఇస్తోంది. చివ‌ర‌గా తెలుగులో నాగ‌చైత‌న్య‌, సునీల్ హీరోలుగా న‌టించిన త‌డాఖా సినిమాలో ఆండ్రియా ఓ హీరోయిన్‌గా న‌టించింది.

నాగ‌చైత‌న్య సినిమా త‌ర్వాత టాలీవుడ్‌కు దూర‌మైన ఆండ్రియా వెంక‌టేష్ సినిమాతో రీఎంట్రీ ఇవ్వ‌బోతుండ‌టం గ‌మ‌నార్హం. సైంధ‌వ్ సినిమాకు శైలేష్ కొల‌ను ద‌ర్శ‌క‌త్వం వ‌హిస్తోన్నాడు. పాన్ ఇండియ‌న్ లెవెల్‌లో యాక్ష‌న్ ఎంట‌ర్‌టైన‌ర్‌గా రూపొందుతోన్న ఈ మూవీలో బాలీవుడ్ న‌టుడు న‌వాజుద్ధీన్ సిద్ధిఖీ తో పాటు శ్ర‌ద్ధా శ్రీనాథ్‌, రుహ‌ణీ శ‌ర్మ కీల‌క పాత్ర‌ల‌ను పోషిస్తోన్నారు.

హిట్ - 2 స‌క్సెస్ త‌ర్వాత శైలేష్ కొల‌ను ద‌ర్శ‌క‌త్వం వ‌హిస్తోన్న ఈ సినిమా క్రిస్మ‌స్ కానుక‌గా డిసెంబ‌ర్ 22న రిలీజ్ కానుంది. ఈ సినిమాకు ద‌స‌రా ఫేమ్ సంతోష్ నారాయ‌ణ‌న్ సంగీతాన్ని అందిస్తోన్నాడు.