Anasuya Warning: ఇక తగ్గేదేలే.. ట్రోలర్స్‌కు అనసూయ ఫైనల్‌ వార్నింగ్

Anasuya Warning: యాంకర్‌ అనసూయ తన ట్రోలర్స్‌కు ఫైనల్‌ వార్నింగ్‌ ఇచ్చింది. తనను ఆంటీ అని, తన కుటుంబాన్ని కూడా లాగుతూ దారుణమైన కామెంట్స్‌ చేస్తున్న వారిని ఇక వదిలి పెట్టనని స్పష్టం చేసింది. శుక్రవారం (ఆగస్ట్‌ 26) ఉదయం నుంచి ఆమె ట్విటర్‌లో ఇదే పనిలో ఉంది. ఆంటీ అంటూ, బూతులు మాట్లాడుతూ కామెంట్స్‌ చేసిన వారి ట్వీట్లను స్క్రీన్‌షాట్లు తీసి పోస్ట్‌ చేస్తోంది.

ఒక్కో ట్వీట్‌లో ఒక్కొక్కరికి సమాధానాలు ఇస్తూ.. ఇక మీలాంటి వాళ్ల చెత్త రాతలను సహించేది లేదని తేల్చి చెప్పింది. ఇన్నాళ్లూ అలాంటి వాళ్లను బ్లాక్‌ చేసేదాన్నని, అలా చేసి వాళ్లకు మేలు చేశానని, ఇక నుంచి అలా చేయబోనని అనసూయ స్పష్టంగా చెబుతోంది. ఇదంతా గురువారం ఆమె చేసిన ట్వీట్‌తో మొదలైంది. లైగర్‌ మూవీ, విజయ్‌ దేవరకొండ పేర్లను నేరుగా ప్రస్తావించకుండా అనసూయ ఓ ట్వీట్‌ చేసింది.

అమ్మని అన్న ఉసురు ఊరికే పోదు.. కొన్నిసార్లు రావటం ఆలస్యం కావచ్చేమో కానీ రావటం మాత్రం పక్కా అంటూ అనసూయ ట్వీట్‌ చేసింది. అర్జున్‌ రెడ్డి ప్రమోషన్ల సమయంలో విజయ్‌ దేవరకొండ మూవీలోని బూతు డైలాగులనే బయట అన్నప్పటి నుంచీ అనసూయ వాటిపై తీవ్రంగా మండిపడింది. ఇప్పుడు లైగర్‌కు నెగటివ్‌ టాక్ రావడంతో పరోక్షంగా ఇలాంటి ట్వీట్‌ చేసింది.

ఈ ట్వీట్‌పై ఫ్యాన్స్‌ నెగటివ్‌గా రియాక్టయ్యారు. ఆమెను ట్రోల్‌ చేయడం, బూతులు తిట్టడం చేశారు. దీంతో ఇవాళ ఆమె మరో ట్వీట్‌ చేస్తూ.. "ఛీ, ఛీ.. అసలు ఎంత చెత్త బాబోయ్‌.. క్లీన్‌ చేసి చేసి విసుగొస్తోంది" అని అన్నది. ఆ తర్వాత మరో ట్వీట్‌ చేస్తూ.. "నన్ను తిట్టిన ప్రతి అకౌంట్‌ స్క్రీన్‌షాట్‌ తీసుకున్నాను. నన్ను ఆంటీ అంటూ పిలిచిన వాళ్లు, నా కుటుంబాన్ని ఇందులోకి లాగిన వాళ్లు.. అందరిపై చట్టపరమైన చర్యలు తీసుకుంటాను. అనవసరంగా నాతో పెట్టుకున్నందుకు తర్వాత వాళ్లు బాధపడతారు. ఇది నా ఫైనల్ వార్నింగ్‌" అని అనసూయ స్పష్టం చేసింది.

తనను బూతులు తిట్టిన వాళ్లందరి స్క్రీన్‌ షాట్లు పోస్ట్ చేస్తానని మరో ట్వీట్‌లో చెప్పింది. మీరేం చేస్తున్నారో నేనేం చేస్తున్నానో ఎందుకు చేస్తున్నానో తెలిసే వరకూ ఇలాగే చేస్తాను. ఫ్యాన్స్‌ ముసుగులో దాగి ఉన్న పిరికి వాళ్లు మీరు. ఫేక్‌ ప్రొఫైల్స్‌ క్రియేట్‌ చేసి నన్ను బూతులు తిడుతున్నారు అంటూ ఆ ట్వీట్‌లో అనసూయ బాధపడింది.