Ambajipeta Marriage Band: అంబాజీపేట మ్యారేజ్ బ్యాండ్ ఫస్ట్ హాఫ్ పగిలిపోయింది.. మైండ్ బ్లోయింగ్ మూవీ: విజయ్ దేవరకొండ

Ambajipeta Marriage Band: టాలీవుడ్ టాలెంటెడ్ హీరో సుహాస్ నటించిన మూవీ అంబాజీపేట మ్యారేజీ బ్యాండు. ఈ సినిమా శుక్రవారం (ఫిబ్రవరి 2) ప్రేక్షకుల ముందుకు వస్తోంది. అయితే బుధవారం (జనవరి 31) టాలీవుడ్ స్టార్ విజయ్ దేవరకొండ ఈ సినిమా బుకింగ్స్ ప్రారంభించి బిగ్ టికెట్ రిలీజ్ చేశాడు.

ఈ సందర్భంగా మూవీపై ప్రశంసల వర్షం కురిపించాడు. తాను ఇప్పటికే సినిమా చూశానని, ఫస్టాఫ్ అయితే పగిలిపోయిందని తనదైన స్టైల్లో విజయ్ చెప్పడం విశేషం.

అంబాజీపేట మ్యారేజీ బ్యాండు మైండ్ బ్లోయింగ్

అంబాజీపేట మ్యారేజీ బ్యాండు మూవీ రిలీజ్ కు రెండు రోజుల ముందు విజయ్ దేవరకొండ ఇంటికి వెళ్లి అతన్ని కలిసింది. హీరో సుహాస్ తోపాటు డైరెక్టర్ దుశ్యంత్, ప్రొడ్యూసర్ ధీరజ్, నటి శరణ్య, శివానీ.. విజయ్ ఇంటికి వెళ్లిన వారిలో ఉన్నారు. ఈ సందర్భంగా మూవీ టీమ్ తోపాటు కెమెరా ముందు కూడా సినిమా గురించి విజయ్ మాట్లాడాడు.

"ఫస్టాఫ్ అయితే పగిలిపోయిండే.. మ్యూజిక్, నటన మరో లెవల్లో ఉంది. ఫస్టాఫ్ తర్వాత లంచ్ చేద్దామని అనుకున్నా కానీ.. ఆ సినిమా నుంచి బయటకు రాలేకపోయాను. మూవీ గురించి మాట్లాడుతూ ఉండిపోయాను" అని టీమ్ తో విజయ్ అన్నాడు. ఆ తర్వాత ఈ సినిమా బుకింగ్స్ ప్రారంభించి కెమెరా ముందు మాట్లాడుతూ.. అందరూ తప్పకుండా ఈ మూవీ చూడాలని కోరాడు.

దుశ్యంతేనా ఈ సినిమా తీసింది: విజయ్

అంబాజీపేట మ్యారేజీ బ్యాండు సినిమా గురించి విజయ్ మాట్లాడుతూ.. "ఇది మైండ్ బ్లోయింగ్ మూవీ. టీజర్ చూసే నేను ఆశ్చర్యపోయాను. సుహాస్ టాలెంట్ నాకు తెలుసు. అతనితో కలిసి డియర్ కామ్రేడ్ మూవీ చేశాను. అప్పుడు దుశ్యంత్ అసిస్టెంట్ డైరెక్టర్ గా ఉన్నాడు. ఈ టీజర్ చూసిన తర్వాత అసలు దుశ్యంతేనా ఈ మూవీ తీసింది అనిపించింది. ఫిబ్రవరి 2న ఓ స్పెషల్ సినిమా థియేటర్లలోకి వస్తుందని నేను ప్రామిస్ చేస్తున్నాను. స్టోరీ టెల్లింగ్, నటన, మ్యూజిక్.. ఇలా అన్నింట్లోనూ ఇది స్పెషల్" అని విజయ్ స్పష్టం చేశాడు.

హిట్ 2 మూవీలో విలన్ గా, తర్వాత రైటర్ పద్మభూషన్ తోనూ మెప్పించిన సుహాస్.. ఇప్పుడు లీడ్ రోల్లో అంబాజీపేట మ్యారేజీ బ్యాండు చేశాడు. ఈ సినిమా ఫిబ్రవరి 2న థియేటర్లలో రిలీజ్ కానుంది. ఇప్పటికే ఈ మూవీ ప్రీరిలీజ్ ఈవెంట్ జరిగింది. దీనికి అడివి శేష్ చీఫ్ గెస్ట్ గా వచ్చాడు. ఈ మూవీ తన కెరీర్లో బెస్ట్ అవుతుందని ఈ సందర్భంగా సుహాస్ చెప్పాడు.

మ‌నుషుల మ‌ధ్య అహం ఎలాంటి స‌మ‌స్య‌ల‌ను సృష్టిస్తుంది అనే పాయింట్‌తో ఈ మూవీ తెర‌కెక్కింది. ఈ వారం టాలీవుడ్ లో మరీ పెద్ద సినిమాలు ఏవీ రిలీజ్ కావడం లేదు. దీంతో అంబాజీపేట మ్యారేజీ బ్యాండుకు మంచి కలెక్షన్లు వచ్చే అవకాశాలు కనిపిస్తున్నాయి.