35 Chinna Katha Kaadu OTT Release Date: ఓటీటీలోకి వచ్చేస్తున్న నివేదా థామస్, ప్రియదర్శి సూపర్ హిట్ తెలుగు కామెడీ మూవీ

35 Chinna Katha Kaadu OTT Release Date: తెలుగులో ఈ నెలలోనే రిలీజై సంచలన విజయం సాధించిన కామెడీ మూవీ 35 చిన్న కథ కాదు. సెప్టెంబర్ 6న థియేటర్లలో రిలీజైన ఈ మూవీని ప్రేక్షకులు బాగా ఆదరించారు. ఇప్పుడీ సినిమా ఓటీటీ స్ట్రీమింగ్ కు సిద్ధమవుతోంది. నివేదా థామస్, ప్రియదర్శిలాంటి వాళ్లు నటించిన ఈ సినిమా డిజిటల్ హక్కులను ఆహా వీడియో దక్కించుకుంది.

ఆహా వీడియోలోకి 35 చిన్న కథ కాదు

35 చిన్న కథ కాదు మూవీ ఈ శుక్రవారం (సెప్టెంబర్ 27) నుంచే ఆహా వీడియోలోకి వస్తుందని మొదట భావించారు. అయితే ఇప్పటి వరకూ ఆ ఓటీటీ మూవీ స్ట్రీమింగ్ మొదలు పెట్టలేదు. కానీ తన ఎక్స్ అకౌంట్ ద్వారా ఓ అప్డేట్ ఇచ్చింది. 35 మూవీ త్వరలోనే స్ట్రీమింగ్ కు రాబోతున్నట్లు వెల్లడించింది.

"చిన్న కథ కాదు.. బ్యూటీఫుల్ బ్లాక్ బస్టర్ 35 మూవీ త్వరలోనే ఆహాలోకి రాబోతోంది" అనే క్యాప్షన్ తో ఈ విషయం తెలిపింది. దీనికి ఓ చిన్న వీడియోను కూడా యాడ్ చేసింది. మూవీలో నివేదా థామస్ ఓ డబ్బా తెరిచి చూసి మురిసిపోతున్న వీడియోను తీసుకొని.. అందులో త్వరలోనే ఆహాలో అనే అక్షరాలను చూపించారు.

అసలేంటీ 35 మూవీ కథ?

35 - చిన్న కథ కాదు సినిమాను ఫీల్ గుడ్ ఫ్యామిలీ డ్రామాగా తెరకెక్కించారు దర్శకుడు నందకిశోర్ ఇమానీ. మ్యాథ్స్ సబ్జెక్టులో పాస్ మార్కులు తెచ్చుకునేలా తన కుమారుడికి ఓ తల్లి స్ఫూర్తి కలిగించడం చుట్టూ ఈ మూవీ స్టోరీ సాగుతుంది. కథ సింపుల్‍గానే ఉన్నా.. హృదయాలను హత్తుకునేలా డైరెక్టర్ చూపించారు. మధ్య తరగతి కుటుంబ పరిస్థితులు, పిల్లల్లో ఉండే సందేహాలు, విద్యావ్యవస్థ ఇలా చాలా అంశాలను చూపించారు.

35 - చిన్న కథ కాదు మూవీలో నివేదా థామస్‍తో పాటు విశ్వదేవ్ రాచకొండ నటనకు కూడా ప్రశంసలు దక్కాయి. ఉపాధ్యాయుడిగా నటించిన ప్రియదర్శి మరోసారి తన నటనతో మెప్పించారు. ఈ చిత్రంలో చైల్డ్ ఆర్టిస్ట్ అరుణ్‍దేవ్ కూడా ఆకట్టుకున్నారు. అభయ్ శంకర్, గౌతమి, కృష్ణతేజ, భాగ్యరాజ్ కూడా ఈ చిత్రంలో కీలకపాత్రలు చేశారు.

35 - చిన్న కథ కాదు చిత్రాన్ని సృజన్ ఎరబోలు, సిద్ధార్థ్ రాళ్లపల్లి ప్రొడ్యూజ్ చేశారు. సురేశ్ ప్రొడక్షన్స్ బ్యానర్‌పై దగ్గుబాటి రానా సమర్పించారు. ఈ మూవీ ప్రమోషన్లలోనూ రానా జోరుగా పాల్గొన్నారు. దీంతో ఈ చిత్రానికి మంచి హైప్ వచ్చింది. ఈ మూవీకి వివేక్ సాగర్ సంగీతం అందించారు. నికేత్ బొమ్మి సినిమాటోగ్రఫీ చేశారు.