12th Fail OTT: 12th ఫెయిల్ మూవీపై మరో బాలీవుడ్ హీరో ప్రశంసలు.. చాలా ఏడ్చేశా అంటూ..

12th Fail OTT: ‘12th ఫెయిల్’ (ట్వెల్త్ ఫెయిల్) సినిమా సంచలన విజయం సాధించింది. బడ్జెట్ పరంగా చిన్న మూవీగా వచ్చిన ఈ చిత్రం స్ఫూర్తిదాయకంగా ఉంటూ ప్రేక్షకుల మనసులను గెలుచుకుంది. ఐపీఎస్ ఆఫీసర్ మనోజ్ కుమార్ శర్మ జీవితం ఆధారంగా 12th ఫెయిల్ మూవీ తెరకెక్కింది. పేదరికాన్ని, ఇబ్బందులను జయించి మనోజ్ ఎలా ఆ స్థాయికి చేరారన్న కథాంశంపై 12th ఫెయిల్ చిత్రాన్ని దర్శకుడు విధు వినోద్ చోప్రా తెరకెక్కించారు. మనోజ్ కుమార్ శర్మ పాత్రలో ఈ చిత్రంలో నటించారు విక్రాంత్ మాసే. థియేటర్లలో మంచి విజయం సాధించిన 12th సినిమా డిస్నీ+ హాట్‍స్టార్ ఓటీటీ ప్లాట్‍ఫామ్‍లో స్ట్రీమింగ్ అవుతుంది.

12th ఫెయిల్ మూవీని ఓటీటీలో చూశాక చాలా మంది సినీ సెలెబ్రెటీలు ప్రశంసిస్తూనే ఉన్నారు. ఇప్పటికే చాలా మంది బాలీవుడ్ నటులు ఈ మూవీ గురించి సోషల్ మీడియాలో పోస్టులు పెట్టారు. బాలీవుడ్ హీరో విక్కీ కౌశల్ తాజాగా ఈ జాబితాలో చేరాడు. రీసెంట్‍గా 12thఫెయిల్ చూసిన విక్కీ కౌశల్.. ఈ మూవీని ప్రశంసిస్తూ ఇన్‍స్టాగ్రామ్‍లో నేడు స్టోరీ పోస్ట్ చేశారు. గత సంవత్సరంలో బెస్ట్ మూవీ, బెస్ట్ పర్ఫార్మెన్స్, బెస్ట్ స్టోరీ అంటూ రాసుకొచ్చాడు.

12th ఫెయిల్ మూవీ దర్శకుడు విధు వినోద్ చోప్రాకు హ్యాట్స్ ఆఫ్ చెప్పారు విక్కీ కౌశల్. “మాటలు రావడం లేదు! చాలా ఏడ్చేశా. కానీ నా మనసు చాలా సంతోషంగా ఉంది. ఏడాదిలో బెస్ట్ సినిమా, బెస్ట్ పర్ఫార్మెన్స్, బెస్ట్ స్టోరీ. ఇదో సినిమాటిక్ అద్భుతం. విధు వినోద్ చోప్రాకు హ్యాట్సాఫ్ చెబుతున్నా. విక్రాంత్ మాసే నిన్ను త్వరగా కలిసి కౌలిగించుకోవాలి. స్ఫూర్తిదాయకమైన పర్ఫార్మెన్స్ చేశారు. మేధా శంకర్ అద్భుతంగా నటించారు. ఈ మూవీ నటీనటులు, టెక్నిషియన్లందరికీ నా సెల్యూట్. అద్భుతమైన చిత్రం” అని విక్కీ కౌశల్.. ఇన్‍స్టాగ్రామ్ స్టోరీ పోస్ట్ చేశారు.

12th ఫెయిల్ సినిమా గతేడాది అక్టోబర్ 27న థియేటర్లలో రిలీజ్ అయింది. ప్రశంసలతో పాటు మంచి కలెక్షన్లను రాబట్టింది. డిసెంబర్ 29న డిస్నీ+ హాట్‍స్టార్ ఓటీటీ ప్లాట్‍ఫామ్‍లో స్ట్రీమింగ్‍కు వచ్చింది. ఈ చిత్రం తెలుగులోనూ థియేటర్లలోకి వచ్చింది. కానీ, ప్రస్తుతం ఓటీటీలో హిందీలో మాత్రమే 12th ఫెయిల్ స్ట్రీమ్ అవుతోంది.

మారుమూల ప్రాంతంలోని పేద కుటుంబం నుంచి వచ్చి.. ఓ దశలో 12వ తరగతిలో ఫెయిల్ అయినా.. అన్ని కష్టాలను దాటుకొని ఐపీఎస్ అధికారి అయిన మనోజ్ కుమార్ శర్మ జీవితం ఆధారంగా ‘12th ఫెయిల్’ బయోగ్రఫికల్ మూవీ రూపొందింది. ఈ మూవీని దర్శకుడు విధు వినోద్ చోప్రా తెరకెక్కించిన విధానం అందరినీ ఆకట్టుకుంది. ఈ సినిమా చూసి స్ఫూర్తి చెందామని చాలా మంది నెటిజన్లు సోషల్ మీడియా ద్వారా వెల్లడించారు. చాలా మంది సినీ స్టార్లు కూడా ప్రశంసలు కురిపించారు.

12th ఫెయిల్ మూవీలో మనోజ్ కుమార్ శర్మ పాత్రను టాలెంటెడ్ యాక్టర్ విక్రాంత్ మాసే పోషించారు. మేధా శంకర్, అనంత్ వీ జోషి, ఆయుష్మాన్ పుష్కర్, ప్రియాన్షు చెటర్జీ, గీతా అగర్వాల్ శర్మ, హరీశ్ ఖన్నా కీలకపాత్రలు చేశారు. ఈ చిత్రానికి శాంతనూ మొయిత్రా సంగీతం అందించారు.