Sreesanth Legal Notice: గంభీర్‌తో గొడవ.. శ్రీశాంత్‌కు లీగల్ నోటీస్

Sreesanth Legal Notice: టీమిండియా మాజీ క్రికెటర్లు గౌతమ్ గంభీర్, శ్రీశాంత్ మధ్య గొడవ రోజురోజుకూ ముదురుతూనే ఉంది. తాజాగా లెజెండ్స్ లీగ్ క్రికెట్ కమిషనర్ అతనికి ఓ లీగల్ నోటీస్ పంపడం గమనార్హం. గంభీర్ తనను ఫిక్సర్ అన్నాడంటూ బుధవారం (డిసెంబర్ 6) ఓ వీడియో ద్వారా శ్రీశాంత్ చెప్పడాన్ని తప్పుబడుతూ ఈ నోటీస్ పంపించారు.

టీ20 టోర్నమెంట్ లో ఆడుతూ శ్రీశాంత్ తన కాంట్రాక్ట్ ను ఉల్లంఘించాడని ఆ నోటీసులో ఉంది. లీగ్ లోని ప్లేయర్ ను విమర్శిస్తూ శ్రీశాంత్ పోస్ట్ చేసిన వీడియోలన్నింటినీ డిలీట్ చేసిన తర్వాతే చర్చలు జరుపుతామని స్పష్టం చేసింది. అటు అంపైర్లు కూడా ఈ గొడవపై తమ రిపోర్ట్ సమర్పించారు. అయితే శ్రీశాంత్ ను గంభీర్ ఫిక్సర్ అన్నాడన్న విషయం ఎక్కడా చెప్పలేదు.

ఇండియన్ క్యాపిటల్స్, గుజరాత్ జెయింట్స్ మ్యాచ్ సందర్భంగా గంభీర్, శ్రీశాంత్ మధ్య గొడవ జరిగిన విషయం తెలిసిందే. ఈ మ్యాచ్ సందర్భంగా అతడు తనను ఫిక్సర్ అన్నాడంటూ రెండు వీడియోలను శ్రీశాంత్ సోషల్ మీడియాలో పోస్ట్ చేశాడు. గంభీర్ అందరితోనూ గొడవ పడతాడని, తనను రెచ్చగొట్టడానికి ప్రయత్నిస్తూ ఏడెమినిదిసార్లు ఫిక్సర్ అన్నాడని విమర్శించాడు.

తర్వాత గంభీర్ చేసిన ఓ పోస్టుపైనా శ్రీశాంత్ స్పందించాడు. నువ్వో అహంకారివి.. అసలు క్లాస్ లేని వ్యక్తివి.. సుప్రీంకోర్టు కంటే గొప్పోడివా.. నిన్ను ఆ దేవుడు కూడా క్షమించడంటూ శ్రీశాంత్ కామెంట్స్ చేశాడు. ఆ తర్వాత ఓ మ్యాచ్ లో గంభీర్ రనౌట్ కావడాన్ని కూడా సెలబ్రేట్ చేసుకుంటూ శ్రీశాంత్ ఇన్‌స్టాగ్రామ్ లో ఓ పోస్ట్ చేశాడు.

ఈ వివాదంపై విచారణ జరుపుతామని గతంలోనే చెప్పిన లెజెండ్స్ లీగ్ క్రికెట్ తాజాగా శ్రీశాంత్ కే లీగల్ నోటీస్ పంపించడం విశేషం. మరి ఈ ఇద్దరి మధ్య గొడవ ఎంత వరకూ వెళ్తుందో చూడాలి. 2013 ఐపీఎల్లో శ్రీశాంత్ స్పాట్ ఫిక్సింగ్ చేశాడన్న ఆరోపణలతో సస్పెండ్ అయిన విషయం తెలిసిందే. తర్వాత సుప్రీంకోర్టు అతనిపై ఉన్న నిషేధాన్ని ఎత్తేసింది.