Stock market: రికార్డు గరిష్టాలతో దూసుకుపోతున్న స్టాక్ మార్కెట్; వరుసగా మూడో నెలలో లాభాలు

Stock market today: సానుకూల అంతర్జాతీయ సంకేతాల మధ్య శుక్రవారం భారత స్టాక్ మార్కెట్ బెంచ్ మార్క్ నిఫ్టీ 50 కొత్త రికార్డు గరిష్టాన్ని తాకింది. వరుసగా 12వ సెషన్ లో కూడా ఎగువ పయనాన్ని కొనసాగించింది. 30 షేర్ల ప్యాక్ సెన్సెక్స్ కూడా రికార్డు గరిష్టానికి చేరుకోగా, నెలవారీ స్థాయిలో ఈ రెండు సూచీలు వరుసగా మూడో నెల కూడా పెరిగాయి. నెలవారీ ప్రాతిపదికన నిఫ్టీ 50 1.1 శాతం, సెన్సెక్స్ 0.80 శాతం పెరిగి, వరుసగా మూడో వారంలో లాభాలను విస్తరించాయి. గత సంవత్సర కాలంలో నిఫ్టీ 50 16 శాతం, సెన్సెక్స్ 14 శాతం లాభపడ్డాయి.

ఈ నెల చివరి ట్రేడింగ్ రోజున..

ఈ నెల చివరి ట్రేడింగ్ రోజున నిఫ్టీ 50 25,268.35 వద్ద సరికొత్త గరిష్టాన్ని తాకగా, సెన్సెక్స్ కూడా 82,637.03 వద్ద సరికొత్త గరిష్టాన్ని తాకింది. చివరకు సెన్సెక్స్ 231 పాయింట్లు లేదా 0.28 శాతం పెరిగి 82,365.77 వద్ద, నిఫ్టీ 84 పాయింట్లు లేదా 0.33 శాతం పెరిగి 25,235.90 వద్ద స్థిరపడ్డాయి. రెండు సూచీలకు ఇదే తాజా ముగింపు గరిష్ఠం.

52 వారాల గరిష్టాన్ని తాకిన 280 షేర్లు

టీసీఎస్, హెచ్సీఎల్ టెక్, భారతీ ఎయిర్టెల్, బజాజ్ ఫిన్సర్వ్, బజాజ్ ఆటో, టీవీఎస్ మోటార్, సన్ ఫార్మా, సిప్లా, దివీస్ ల్యాబ్స్, లుపిన్ సహా 280 షేర్లు శుక్రవారం ఇంట్రాడేలో 52 వారాల గరిష్టాన్ని తాకాయి. మిడ్, స్మాల్ క్యాప్ సూచీలు బెంచ్ మార్క్ లను అధిగమించాయి. బీఎస్ఈ మిడ్ క్యాప్ ఇండెక్స్ 0.50 శాతం, స్మాల్ క్యాప్ ఇండెక్స్ 0.73 శాతం పెరిగాయి. బీఎస్ఈలో లిస్టైన కంపెనీల మొత్తం మార్కెట్ క్యాపిటలైజేషన్ గత సెషన్తో పోలిస్తే దాదాపు రూ. 462.6 లక్షల కోట్ల నుంచి రికార్డు స్థాయిలో రూ.464.4 లక్షల కోట్లకు పెరిగింది.

అమెరికా ఫెడ్ రేట్ల కోత

గత వారం జాక్సన్ హోల్ సమావేశం తర్వాత వచ్చే నెలలో అమెరికా ఫెడ్ రేట్ల కోతపై ఆశలు మదుపర్లకు మరింత ఆత్మవిశ్వాసాన్ని కలిగించడంతో విస్తృత స్థాయి కొనుగోళ్ల మద్దతుతో బెంచ్ మార్క్ సూచీలు సానుకూల ట్రేడింగ్ సెషన్ లో కొత్త గరిష్టాలను తాకాయి. అయితే, గత 12 ట్రేడింగ్ సెషన్లలో మార్కెట్ ఎగువన పయనిస్తున్నందున లాభాల స్వీకరణ పుంజుకోవచ్చని మెహతా ఈక్విటీస్ సీనియర్ వీపీ (రీసెర్చ్) ప్రశాంత్ తాప్సే అన్నారు.

లాభాలు, నష్టాలు..

నిఫ్టీ 50 ఇండెక్స్ లో శుక్రవారం 41 షేర్లు ఆకుపచ్చ రంగులో ముగియగా, సిప్లా (2.23 శాతం), బజాజ్ ఫైనాన్స్ (2.07 శాతం), మహీంద్రా అండ్ మహీంద్రా (1.97 శాతం) షేర్లు భారీగా లాభపడ్డాయి. మరోవైపు టాటా మోటార్స్ (1.13 శాతం), హెచ్డీఎఫ్సీ బ్యాంక్ (0.78 శాతం), టెక్ మహీంద్రా (0.72 శాతం) షేర్లు నష్టపోయాయి. దేశీయ మార్కెట్ ప్రస్తుతం సానుకూల పక్షపాతాన్ని చూపుతున్నప్పటికీ, భారత క్యూ 1 జిడిపి వృద్ధి మధ్యస్థంగా ఉంటుందని భావిస్తున్నారు. నిఫ్టీ 50 25,000 పైన ఉన్నంత కాలం మార్కెట్ బలం కొనసాగే అవకాశం ఉందని ఎల్కేపీ సెక్యూరిటీస్ సీనియర్ టెక్నికల్ అనలిస్ట్ రూపక్ డే తెలిపారు.

సూచన: పై అభిప్రాయాలు, సిఫార్సులు వ్యక్తిగత విశ్లేషకులు, నిపుణులు, బ్రోకరేజీ సంస్థలవి, హిందుస్తాన్ టైమ్స్ తెలుగు వి కాదు. ఏదైనా పెట్టుబడి నిర్ణయాలు తీసుకునే ముందు సర్టిఫైడ్ నిపుణులను సంప్రదించాలని మేము పెట్టుబడిదారులకు సలహా ఇస్తున్నాము.