Banks privatization : ప్రైవేటీకరణ 'లిస్ట్​'లో మరిన్ని బ్యాంకులు.. కేంద్రం కసరత్తు!

Banks privatization : ప్రభుత్వ రంగ బ్యాంక్​లను ప్రవేటీకరించేందుకు కేంద్రం ఇప్పటికే ఒక లిస్ట్​ను తయారు చేసుకుంది. కానీ ఇప్పుడు.. ఆ జాబితాలోకి మరిన్ని బ్యాంక్​లను చేర్చాలని ప్రభుత్వం ఆలోచిస్తున్నట్టు సమాచారం. ఓవైపు ప్రభుత్వ ఆధారిత బ్యాంక్​ల లాభాలు పెరుగుతుండటం, మరోవైపు మొండి బకాయిలు దిగొస్తుండటం ఇందుకు కారణం అని తెలుస్తోంది.

మరిన్ని బ్యాంకుల ప్రైవేటీకరణ..?

బ్యాంకుల ప్రైవేటీకరణ విషయంపై 2021-22 బడ్జెట్​ సమయంలో పలు కీలక వ్యాఖ్యలు చేశారు కేంద్ర ఆర్థిక మంత్రి నిర్మలా సీతారామన్​. ఐడీబీఐ బ్యాంక్​తో పాటు మరో రెండు ప్రభుత్వ ఆధారిత బ్యాంక్​లను ప్రైవేట్​ చేయాలని నిర్ణయించినట్టు వెల్లడించారు. ఇందుకు సంబంధించి.. నీతీఆయోగ్​ కొన్ని సూచనలు చేసింది. కాగా.. మీడియా కథనాల ప్రకారం.. ఆ రెండు బ్యాంకుల పేర్లు సెంట్రల్​ బ్యాంక్​ ఆఫ్​ ఇండియా, ఇండియన్​ ఓవర్సీస్​ బ్యాంక్​.

అయితే.. పలు శాసనపరమైన సమస్యల కారణంగా ఆయా బ్యాంకుల ప్రైవేటీకరణ ఇంకా జరగలేదు. ఇక తాజాగా ఆర్థికశాఖ వర్గాల నుంచి అందిన సమాచారం ప్రకారం.. మరి కొన్ని బ్యాంక్​లను ప్రైవేటైజేషన్​ చేయాలని కేంద్రం చూస్తోంది. ఆర్థికశాఖ, నీతిఆయోగ్​, ఆర్​బీఐలోని సభ్యులు.. సమావేశమై.. కొత్త లిస్ట్​ను రూపొందిస్తారు!

privatization of banks in India : "పలు మిడ్​, స్మాల్​ సైజ్​ బ్యాంకుల ప్రైవేటీకరణ విషయాన్ని పరిశీలించేందుకు ఓ ప్యానెల్​ ఏర్పడనుంది. ఆయా బ్యాంకుల్లో ప్రభుత్వం.. తన వాటా ఎంత తగ్గించుకోవాలి? అన్న విషయాన్ని కూడా ఈ ప్యానెల్​ నిర్ణయిస్తుంది," అని సంబంధిత వర్గాలు తెలిపాయి.

కాగా.. ఈ విషయంపై ఆర్థికశాఖ ఇంకా స్పందించలేదు. బ్యాంకుల ప్రైవేటీకరణ లిస్ట్​ను పెంచేందుకు ప్యానెల్​ ఏర్పడినా.. 2024 లోక్​సభ ఎన్నికల సమీపిస్తుండటంతో.. ప్రైవేటైజేషన్​ ప్రక్రియ ఇప్పట్లో మొదలవ్వకపోవచ్చు. కొత్త ప్రభుత్వం ఏర్పడిన తర్వాతే ఈ విషయంపై ముందడుగు పడొచ్చు.

అయితే.. బ్యాంకుల ప్రైవేటీకరణ జాబితాను తయారు చేసే ముందు కొన్ని కీలక అంశాలను కేంద్రం క్షుణ్ణంగా పరిశీలిస్తుందని తెలుస్తోంది. బ్యాంకుల బలాలు, బలహీనతలతో పాటు కొన్నేళ్లుగా వాటి ప్రదర్శన వంటివి పరిగణిస్తుంది.

వాస్తవాలు మాట్లాడుకోవాలంటే.. పీఎస్​యూ బ్యాంక్స్​ పనితీరు గత కొన్ని త్రైమాసికాలుగా మెరుగుపడుతూ వస్తోంది. లాభాలు జోరందుకున్నాయి. మొండిబకాయిలు దిగొస్తున్నాయి. జూన్​తో ముగిసిన త్రైమాసికంలో 12 పీఎస్​యూ బ్యాంక్​ల నెట్​ ప్రాఫిట్​ రూ. 34,418కోట్లుగా నమోదైంది. గతేడాది ఇది రూ. 15,307గా ఉండేది. అంతేకాకుండా పీఎస్​యూల అసెట్​ క్వాలిటీ కూడా వేగంగా వృద్ధిచెందుతోంది. ఈ విధంగా ప్రభుత్వ ఆధారిత బ్యాంకుల ప్రదర్శన, పనితీరు మెరుగుపడుతుండటంతో.. వాటి ప్రైవేటీకరణకు ఇదే మంచి తరుణం అని కేంద్రం భావిస్తోందని తెలుస్తోంది.

Banks privatization Government of India : కానీ బ్యాంకుల ప్రవేటీకరణకు ముందు చాలా పనులు చేయాల్సి ఉంటుంది. ముఖ్యంగా.. అనేక చట్టాలను సవరించాల్సి ఉంటుంది. బ్యాంకింగ్​ కంపెనీ యాక్ట్​ 1970, 1980 వంటివి కొన్ని ఉదాహరణలు. ఈ సవరణల తర్వాతే సంబంధిత లిస్ట్​.. కేబినెట్​ ముందుకు వెళుతుంది. కేబినెట్​ ఆమోదంతో పనులు మరింత వేగవంతమవుతాయి. అయితే.. ఇవన్నీ 2024 లోక్​సభ ఎన్నికల తర్వాత జరిగే అవకాశాలే ఎక్కువగా ఉన్నాయి.

ఇండియాలో ప్రస్తుతం.. ఎస్​బీఐ, పంజాబ్​ నేషనల్​ బ్యాంక్​, బ్యాంక్​ ఆఫ్​ బరోడా, కెనెరా బ్యాంక్​, పంజాబ్​ అండ్​ సింధ్​ బ్యాంక్​, ఇండియన్​ బ్యాంక్​, యూనియన్​ బ్యాంక్​ ఆఫ్​ ఇండియా, బ్యాంక్​ ఆఫ్​ ఇండియా, బ్యాంక్​ ఆఫ్​ మహారాష్ట్ర, సెంట్రల్​ బ్యాంక్​ ఆఫ్​ ఇండియా, ఇండియన్​ ఓవర్సీస్​ బ్యాంక్​, యూకో బ్యాంక్​లు.. ప్రభుత్వం చేతుల్లో ఉన్నాయి.