Smartphones in September : సెప్టెంబర్‌లో స్మార్ట్‌ఫోన్ల జాతర.. 9 ఫోన్లు లాంచ్‌కు రెడీ

మీరు కొత్త స్మార్ట్‌ఫోన్ కొనాలనుకుంటే కాస్త వెయిట్ చేయండి. ఎందుకంటే సెప్టెంబర్ నెలలోనే 9 స్మార్ట్‌ఫోన్లు మార్కెట్లోకి రానున్నాయి. మీరు పాత మోడల్ కొని తర్వాత బాధపడకండి. సెప్టెంబర్ నెలలో లాంచ్ కానున్న అన్ని డివైజ్‌ల జాబితాను చూద్దాం.. వీటిలో ఆపిల్ ఐఫోన్ 16 నుంచి రియల్‌మీ, షియోమీ, మోటరోలా వరకు ఉన్నాయి. మీరు పూర్తి లిస్ట్ చూడండి.

మోటోరోలా

తన తదుపరి ఫోల్డబుల్ డివైజ్‌ను సెప్టెంబర్ 9న భారతదేశంలో లాంచ్ చేయనున్నట్లు మోటోరోలా ధృవీకరించింది. బయట 3.6 అంగుళాల భారీ డిస్ ప్లే, లోపల 6.9 అంగుళాల ఫోల్డబుల్ డిస్ ప్లే ఉండనుంది. మీడియాటెక్ డైమెన్సిటీ 7300ఎక్స్ ప్రాసెసర్, 32 మెగాపిక్సెల్ సెల్ఫీ కెమెరా, 50 మెగాపిక్సెల్ మెయిన్ కెమెరా సెటప్‌తో ఈ ఫోన్ రానుంది.

ఐఫోన్ 16 సిరీస్

ఆపిల్ వార్షిక ఐఫోన్ లాంచ్ ఈవెంట్ సెప్టెంబర్ 9 న జరుగుతుంది. ఐఫోన్ 16 సిరీస్‌ను ఆవిష్కరిస్తుంది. కొత్త లైనప్‌లో ఐఫోన్ 16, ఐఫోన్ 16 ప్లస్, ఐఫోన్ 16 ప్రో, ఐఫోన్ 16 ప్రో మ్యాక్స్ ఉన్నాయి. కొత్త ఏ18 ప్రో ప్రాసెసర్‌తోపాటు, కొత్త డివైజ్లు కెమెరా అప్‌గ్రేడ్లను పొందవచ్చు. ప్రత్యేక ఏఐ ఫీచర్లను కూడా తాజా ఐఫోన్లలో భాగం చేయనున్నారు.

రియల్‌మీ నార్జో 70 టర్బో

రియల్‌మీ నార్జో 70 టర్బో స్మార్ట్‌ఫోన్ సెప్టెంబర్ 9 మధ్యాహ్నం 12 గంటలకు భారతదేశంలో లాంచ్ కానుంది. మీడియాటెక్ డైమెన్సిటీ 7300 ఎనర్జీ 5 జి ప్రాసెసర్‌తో ఈ విభాగంలో వేగవంతమైన పనితీరును పొందుతుందని కంపెనీ పేర్కొంది. ప్రత్యేక డిజైన్‌తో కూడిన ఈ పెర్ఫార్మెన్స్ ఫోకస్డ్ ఫోన్‌లో 50 మెగాపిక్సెల్ మెయిన్ కెమెరా, 8 మెగాపిక్సెల్ సెల్ఫీ కెమెరా లభిస్తుంది.

హువావే

చైనా కంపెనీ హువావే సెప్టెంబర్ 10న అత్యంత వినూత్నమైన డిజైన్ ఫోన్‌ను విడుదల చేయబోతోంది. ఈ ఫోన్‌ను పూర్తిగా ఓపెన్ చేస్తే 10 అంగుళాల భారీ డిస్ ప్లే లభిస్తుంది. దీనికి ప్రత్యేకమైన డ్యూయల్ హింజ్ మెకానిజం లభిస్తుంది. మంచి పనితీరు కోసం, ఈ ఫోన్ కంపెనీ అంతర్గత కిరిన్ 9 సిరీస్ ప్రాసెసర్‌ను పొందుతుందని భావిస్తున్నారు.

టెక్నో ఫాంటమ్ వి ఫోల్డ్ 2, ఫాంటమ్ వి ఫ్లిప్ 2

టెక్నో తన ఫోల్డబుల్ స్మార్ట్‌ఫోన్లను ఈ నెలలో గ్లోబల్ మార్కెట్లో భాగం చేయబోతోంది. ఫాంటమ్ వీ ఫోల్డ్ 2 స్మార్ట్‌ఫోన్లో 70వాట్ ఫాస్ట్ ఛార్జింగ్ సపోర్ట్‌తో 5610 ఎంఏహెచ్ డ్యూయల్ సెల్ బ్యాటరీ, డైమెన్సిటీ 9000 చిప్ ఉంది. దీంతోపాటు ఫాంటమ్ వీ ఫ్లిప్ 2లో డైమెన్సిటీ 8050 ప్రాసెసర్ ఉండే సూచనలు ఉన్నాయి.

వివో టీ3 అల్ట్రా

టెక్ కంపెనీ వివో తన టీ3 లైనప్‌లో మరో కొత్త ఫోన్‌ను సెప్టెంబర్‌లో లాంచ్ చేయనుంది. డైమెన్సిటీ 9200 ప్లస్ పై పనిచేసే ఈ ఫోన్ గతంలో వచ్చిన వివో వీ3 ప్రో కంటే శక్తివంతమైనది. ఐపీ68 రేటెడ్ ఫోన్లో కర్వ్డ్ అమోఎల్ఈడీ డిస్‌ప్లేతో పాటు ఓఐఎస్ కెమెరా సెటప్, 12 జీబీ వరకు ర్యామ్ కెపాసిటీ లభిస్తుంది. ఇది మిడ్ రేంజ్ సెగ్మెంట్‌లో భాగం కానుంది.

రియల్ మీ పీ2

రియల్ మీ పీ2 ప్రోను రియల్ మీ ఈ నెలలోనే భారత మార్కెట్లోకి విడుదల చేయనుంది. ఈ ఫోన్ ఇటీవల బ్యూరో ఆఫ్ ఇండియన్ స్టాండర్డ్స్ (బీఐఎస్) వెబ్‌సైట్‌లో కనిపించింది. రూ.20,000 వరకు ధర కలిగిన సెగ్మెంట్లో దీన్ని భాగం చేయవచ్చు. అయితే దీని మిగిలిన స్పెసిఫికేషన్లకు సంబంధించి ప్రస్తుతానికి ఎటువంటి సంకేతాలు లేవు.

రెడ్‌మీ నోట్ 14 సిరీస్

రెడ్‌మీ కొత్త నోట్ లైనప్ సెప్టెంబర్‌లో తన సొంత దేశం చైనాలో లాంచ్ కానుంది. కొత్త సిరీస్లో రెడ్‌మీ నోట్ 14తో పాటు రెడ్‌మీ నోట్ 14 ప్రో, రెడ్‌మీ నోట్ 14 ప్రో ప్లస్ కూడా ఉండవచ్చు. ఇవి 90 వాట్ల వరకు ఛార్జింగ్ వేగాన్ని పొందుతాయని, 1.5 కె కర్వ్డ్ ఓఎల్ఇడి డిస్‌ప్లేను కలిగి ఉంటాయని కంపెనీ వెల్లడించింది. మరి అన్ని వేరియంట్లు భారత మార్కెట్లో భాగమవుతాయో లేదో చూడాలి.

షియోమీ 14టి సిరీస్

షియోమీ కొత్త లైనప్‌లో 14 టి, 14 టి ప్రో అనే రెండు స్మార్ట్‌ఫోన్లు ఉన్నాయి. షియోమీ 14టీలో 6.67 అంగుళాల 1.5కే డిస్ ప్లే, డైమెన్సిటీ 8300 అల్ట్రా ప్రాసెసర్, లైకా ట్రిపుల్ కెమెరా ఉండనున్నాయి. అదే సమయంలో ప్రో మోడల్లో డైమెన్సిటీ 9300+ ప్రాసెసర్తో 50 వాట్ వైర్లెస్ ఛార్జింగ్ కూడా అందిస్తారు. రెండింటికీ ఐపీ68 రేటింగ్ ఉంటుంది.