Chittoor Road Accident : చిత్తూరు జిల్లాలో ఘోర రోడ్డు ప్రమాదం - 8 మంది మృతి, 30 మందికి గాయాలు

చిత్తూరు జిల్లాలో ఘోర రోడ్డు ప్రమాదం జరిగింది. బెంగళూరు హైవేపై మొగిలి ఘాట్ దగ్గర రెండు లారీలను ఆర్టీసీ బస్సు ఢీకొట్టింది. ఈ ఘటనలో ఎనిమిది మంది ప్రాణాలు కోల్పోయారు. మరో 30 మందికి గాయాలయ్యాయి. ప్రమాదం జరిగిన ప్రాంతంలోనే ఆరుగురు చనిపోగా.. మరో ఇద్దరు ఆస్పత్రిలో మృతి చెందారు.

ప్రాథమిక వివరాల ప్రకారం….  మధ్యాహ్నాం సమయంలో ఈ ప్రమాదం జరిగింది. ఈ ఘటనలో బస్సు అదుపు తప్పినట్లు తెలిసింది. గాయపడిన వారిని ఆస్పత్రికి తరలించి చికిత్స అందిస్తున్నారు. మృతుల సంఖ్య పెరిగే అవకాశం ఉందని సమాచారం.  ఈ ప్రమాదానికి సంబంధించి పూర్తి వివరాలు తెలియాల్సి ఉంది.

సీఎం చంద్రబాబు దిగ్బ్రాంతి..

చిత్తూరు జిల్లా మొగ‌లి ఘాట్ వ‌ద్ద జరిగిన రోడ్డు ప్ర‌మాదంలో పలువురు ప్రయాణికులు మృతి చెంద‌డంపై సీఎం చంద్ర‌బాబుదిగ్బ్రాంతి వ్యక్తం చేశారు.  ఈ ఘటనపై ఆరా తీసిన ఆయన....సహాయక చర్యలు, బాధితులకు అందుతున్న వైద్య సాయంపై అధికారులను అడిగి తెలుసుకున్నారు. క్ష‌త‌గాత్రుల‌కు మెరుగైన వైద్యం అందించాల‌ని ఆదేశించారు. మృతుల కుటుంబాలకు సంతాపం తెలియజేశారు. బాధిత కుటుంబాల‌ను ప్రభుత్వం ఆదుకుంటుందని అని తెలిపారు.

ప్రభుత్వం ఆదుకోవాలి - వైఎస్ జగన్

 మొగిలి ఘాట్‌ వద్ద జరిగిన రోడ్డు ప్రమాదంపై వైయస్సార్‌సీపీ అధినేత, మాజీ ముఖ్యమంత్రి వైయస్ జగన్‌ తీవ్ర దిగ్భ్రాంతి వ్యక్తం చేశారు. ఆర్టీసీ బస్సు డ్రైవర్‌ సహా పలువురు ప్రయాణికులు మరణించడం బాధాకరమన్నారు. ఈ ఘటనలో చికిత్స పొందుతున్న క్షతగాత్రులకు మంచి వైద్య సదుపాయాలు అందించాలని, మృతుల కుటుంబాలను ఆదుకోవాలని ప్రభుత్వాన్ని డిమాండ్‌ చేశారు.