Salaar Ticket Rates Hike : సలార్ టికెట్ల రేట్లు పెంపునకు గ్రీన్ సిగ్నల్ - ఏపీలో రూ.40, తెలంగాణలో రూ.65!

Salaar Ticket Rates Hike : ప్రభాస్ హీరోగా తెరకెక్కిన సలార్ మూవీ టికెట్ల రేట్లు పెంపునకు ఏపీ, తెలంగాణ ప్రభుత్వాలు గ్రీన్ సిగ్నల్ ఇచ్చాయి. ఆంధ్రప్రదేశ్‌లో సలార్ మూవీ టికెట్ ధరల పెంపునకు ప్రభుత్వం అనుమతి ఇచ్చింది. రాష్ట్రవ్యాప్తంగా అన్ని థియేటర్లలో రూ.40 పెంచుకునేందుకు అనుమతించింది. 10 రోజుల పాటు రూ.40 పెంచుకునేందుకు ఏపీ ప్రభుత్వం గ్రీన్ సిగ్నల్ ఇచ్చింది. తెలంగాణలో మల్టీప్లెక్స్‌ల్లో రూ.100, సింగిల్‌ థియేటర్లలో రూ.65 పెంచుకునేందుకు ప్రభుత్వం అనుమతించింది. భారీ బడ్జెట్ తో నిర్మించిన చిత్రాలకు టికెట్ రేట్లు పెంచుకునేందుకు తెలుగు రాష్ట్రాల ప్రభుత్వాలు అనుమతి ఇస్తున్నాయి. సలార్ ను తెలుగులో మైత్రీ మూవీ డిస్ట్రిబ్యూటర్స్ విడుదల చేస్తున్నారు. దీంతో మైత్రీ మూవీ డిస్ట్రిబ్యూటర్స్‌ టికెట్ ధరల పెంపునకు ఏపీ, తెలంగాణ ప్రభుత్వాలను విజ్ఞప్తి చేసింది.

అర్ధరాత్రి 1 గంటకు బెనిఫిట్ షోలు

సలార్ మూవీ డిసెంబర్ 22న విడుదల కానుంది. డిసెంబర్ 22 నుంచి 28వ తేదీ వరకు టికెట్‌ ధరల పెంపునకు తెలంగాణ సర్కార్ అనుమతి ఇచ్చింది. రాష్ట్రంలోని 20 థియేటర్లలో అర్ధరాత్రి 1 గంటకు బెనిఫిట్‌ షోలకు పచ్చజెండా ఊపింది. సాధారణ షోలతో పాటు ఎక్స్ ట్రాగా ఉదయం 4 గంటల నుంచి ఆరో ఆట ప్రదర్శించడానికి వెసులుబాటు కల్పిస్తూ తెలంగాణ ప్రభుత్వం ఉత్తర్వులు జారీ చేసింది.

సలార్ బుకింగ్స్ ఓపెన్

డిసెంబర్ 22న సలార్ చిత్రం రిలీజ్ కానుంది. మరో మూడు రోజుల్లోనే సలార్ ప్రేక్షకుల ముందుకు రానుంది. అయితే, ఇప్పటికీ తెలుగు రాష్టాల్లో సలార్ టికెట్ల ఆన్‍లైన్ బుకింగ్స్ మొదలుకాకపోవటంతో సినీ ప్రేక్షకులు నిరాశ వ్యక్తం చేస్తున్నారు. అయితే, ఎట్టకేలకు నైజాం (తెలంగాణ)లో సలార్ టికెట్ల ఆన్‍లైన్ బుకింగ్స్ గురించి ప్రకటన వచ్చింది. సలార్ బుకింగ్స్ మొదలయ్యే టైమ్‍ను మైత్రీ మూవీ మేకర్స్ వెల్లడించింది. సలార్ సినిమా టికెట్ల బుకింగ్స్ తెలంగాణలో నేటి (డిసెంబర్ 19) రాత్రి 8 గంటల 24 నిమిషాలకు మొదలవుతాయని మైత్రీ మూవీ మేకర్స్ వెల్లడించింది. ఈ మేరకు పోస్టర్ రిలీజ్ కూడా షేర్ చేసింది. “ఖాన్సారే కాదు.. అన్ని థియేటర్స్ హౌస్‍ఫుల్‍తో ఎరుపెక్కాలా. నైజామ్ ఆన్‍లైన్ 8.24 గంటలకు మొదలవుతుంది” అని ట్వీట్ చేసింది. సలార్ సినిమా నైజాం హక్కులను మైత్రీ మూవీ మేకర్స్ దక్కించుకుంది. నైజాంలో కొన్ని థియేటర్లలో సలార్ సినిమాకు తొలిరోజు కేవలం ఆఫ్‍లైన్‍లో కౌంటర్లోనే టికెట్లు లభిస్తాయని మైత్రీ మూవీ మేకర్స్ ప్రకటించింది.