Deepavali Special Trains: దీపావళి రద్దీ కోసం విజయవాడ డివిజన్‌ పరిధిలో నేడు 31 ప్రత్యేక రైళ్లు

Deepavali Special Trains: దక్షిణ మధ్య రైల్వే దసరా, దీపావళి పండుగ సీజన్‌లో 854 ప్రత్యేక రైళ్లను నడుపుతోంది. దీపావళి, ఛత్ పూజల్ని పురస్కరించుకుని దేశ వ్యాప్తంగా భారతీయ రైల్వేలు 7,296 ప్రత్యేక రైళ్లను నడుపుతున్నాయి. దక్షిణ మధ్య రైల్వే పండుగ సీజన్‌లో వివిధ గమ్యస్థానాలకు గత ఏడాది 626 ప్రత్యేక రైళ్లను నడుపగా ఈ ఏడాది 854 ప్రత్యేక రైళ్లను నడుపుతోంది. విజయవాడ డివిజన్‌ పరిధిలో నేడు 31 రైళ్లు నడుస్తాయి.

అక్టోబర్ 31న నడిచే ప్రత్యేక రైళ్లలో ట్రైన్ నంబర్ 07653 కాచిగూడ-తిరుపతి ఎక్స్‌ప్రెస్‌ రాత్రి పదిన్నరకు, ట్రైన్‌ నంబర్ 07042 తిరుపతి-సికింద్రాబాద్‌ రైలు రాత్రి 7.50కు, ట్రైన్‌ నంబర్ 07446 లింగంపల్లి-కాకినాడ రైలు రాత్రి 7.10కు, ట్రైన్ నంబర్ 07336 మణుగూరు-బెలగామ్ రైలు సాయంత్రం 3.40కు, ట్రైన్ నంబర్ 05294 సికింద్రాబాద్‌-ముజఫర్‌ నగర్‌ ఎక్స్‌ప్రెస్‌ ఉదయం 3.55కు, ట్రైన్ నంబర్ 07021 సికింద్రాబాద్‌-దానాపూర్‌ ఎక్స్‌ప్రెస్‌ ఉదయం 8.45కు, ట్రైన్‌ నంబర్ 07055 కాచిగూడ-హిసార్‌ ఎక్స్‌ప్రెస్‌ సాయంత్రం నాలుగు గంటలకు, ట్రైన్ నంబర్ 08580 సికింద్రాబాద్‌-విశాఖపట్నం రైలు రాత్రి 7.40కు, ట్రైన్ నంబర్ 03429 సికింద్రాబాద్‌-మాల్దా టౌన్ రైలు సాయంత్రం 4.35కు, ట్రైన్ నంబర్ 01437 సోలాపూర్‌-తిరుపతి రైలు రాత్రి 9.40కు బయల్దేరుతుంది.

విజయవాడ జంక్షన్‌లో క్రౌడ్ మేనేజ్మెంట్…

విజయవాడ స్టేషన్‌లో దీపావళి పండుగతో పాటు సెలవుల రద్దీ దృష్ట్యా క్రౌడ్ మేనేజ్‌మెంట్ కోసం విస్తృతమైన ఏర్పాట్లు చేశారు. దీపావళి పండుగ చత్ పూజ సమయంలో రైలు ప్రయాణానికి పెరిగిన డిమాండ్‌ను దృష్టిలో ఉంచుకుని, విజయవాడ డివిజన్ ప్రయాణీకుల రద్దీని సమర్థవంతంగా నిర్వహించడానికి సన్నద్ధమైంది.

పండుగ సెలవుల సమయంలో ప్రయాణికుల అదనపు రద్దీకి అనుగుణంగా ప్రత్యేక రైళ్లను నడుపుతున్నారు. ఈ సీజన్‌లో దక్షిణ మధ్య రైల్వే 850 ప్రత్యేక రైళ్లను నడపడానికి ఏర్పాట్లు చేసింది. వెయిటింగ్‌ లిస్ట్‌లో ఉన్న ప్రయాణికులు తమ గమ్యస్థానాలకు చేరుకోవడానికి వీలుగా ఇప్పటికే ఉన్న రైళ్లకు అదనపు కోచ్‌లు ఏర్పాటు చేస్తున్నారు.

• విజయవాడ డివిజన్ నుండి 40 ప్రత్యేక రైలు సర్వీసులు ఏర్పాటు చేశారు.
• టిక్కెట్లు వాపసు, రద్దు చేయడానికి విజయవాడ డివిజన్‌లోని అన్ని ప్రధాన స్టేషన్లలో అదనపు UTS & PRS కౌంటర్లు ఏర్పాటు చేశారు.
• ప్రయాణాలను సులభతరం చేయడానికి, వారికి మార్గనిర్దేశం చేయడానికి అన్ని ప్రధాన స్టేషన్లలో టిక్కెట్ తనిఖీ సిబ్బందితో ప్రత్యేక సహాయ డెస్క్‌లు ఏర్పాటు చేశారు.
• విజయవాడ డివిజన్ స్టేషన్లలో అదనపు రైల్వే ప్రొటెక్షన్ ఫోర్స్ (RPF) మరియు టిక్కెట్ చెకింగ్ సిబ్బందితో ప్రయాణికులను క్యూలలో పంపిస్తారు. రద్దీ సమయాల్లో సమర్థవంతంగా రాకపోకలు సాగించేలా ఏర్పాట్లు చేశారు.
• రైళ్లలోని అన్ని రిజర్వ్ కోచ్‌లను పర్యవేక్షించడానికి తగినంత టిక్కెట్ చెకింగ్ సిబ్బందిని నియమించారు, టిక్కెట్‌లేని ప్రయాణాన్ని నిరోధించడాని ప్రత్యేక టిక్కెట్ తనిఖీ బృందాలను ఏర్పాటు చేశారు.
• అన్ని స్టేషన్లలో పరిశుభ్రతను అత్యంత ప్రాధాన్యతతో పర్యవేక్షిస్తున్నారు.
• తాగునీటి ఏర్పాట్లను 24/7 పర్యవేక్షిస్తున్నారు. కమాండ్ కంట్రోల్ సెంటర్‌లో ప్రత్యేక వార్ రూం ఏర్పాటు చేశారు. స్టేషన్లలోని క్యాటరింగ్ స్టాల్ నిర్వాహకులు అదనపు డిమాండ్‌‌కు తగ్గట్టుగా విక్రయించేలా తగిన ఆహార పదార్థాలను ఉంచాలని ఆదేశించారు.
• ఆన్‌బోర్డ్ క్యాటరింగ్ సేవలను కూడా నిర్ధారించడానికి IRCTC తో సమన్వయం చేస్తున్నారు. రైల్వే ప్రొటెక్షన్ ఫోర్స్ కూడా స్టేషన్లలో రద్దీని నిర్వహించడానికి మరియు పండుగ సీజన్లో ప్రయాణీకుల భద్రత మరియు భద్రతకు ఏర్పాట్లు చేశారు.