Taliban : 'జంతువుగా కనిపించేందుకే హిజావ్ వేసుకోవట్లేదు'
17 June 2022, 10:58 IST
- అఫ్గాన్లో మహిళలు హిజాబ్ ధరించకుండా జంతువుల్లాగా కనిపించేందుకు ప్రయత్నిస్తున్నారని తాలిబన్ ప్రభుత్వం పోస్టర్లు ఏర్పాటు చేసింది. కాందహార్ నగరంలోని రెస్టారెంట్లు, కేఫ్ల బయట ఈ పోస్టరు వెలిశాయి.
'జంతువుగా కనిపించేందుకే హిజావ్ వేసుకోవట్లేదు'
తాలిబన్ల పాలనలో అఫ్గానిస్థాన్ ప్రజలు కఠిన ఆంక్షలతో ఉక్కిరిబిక్కిరి అవుతున్న వార్తలు నిత్యం కనిపిస్తూనే ఉన్నాయి. ముఖ్యంగా మహిళలపై తీవ్ర ఆంక్షలతో విరుచుకుపడుతోంది తాలిబన్ ప్రభుత్వం. ఇప్పుడు మరో అడుగు ముందుకేసి.. రోడ్ల మీద పోస్టర్లు అతికించే స్థితికి చేరింది! 'హిజాబ్ ధరించని ముస్లిం మహిళలు.. జంతువుల్లాగా కనిపించేందుకు ప్రయత్నిస్తున్నారు,' అంటూ విరుచుకుపడింది.
మారని తాలిబన్లు..
అమెరికా సైన్యం వెనుదిరగడంతో గతేడాది ఆగస్టులో అఫ్గాన్ను తన వశం చేసుకుంది తాలిబన్ బృందం. ఓ ప్రభుత్వాన్ని ఏర్పాటు చేసి పాలన సాగిస్తోంది. అయితే బాలికలు, మహిళపై తీవ్రమైన నిబంధనలు విధిస్తోంది. ముఖ్యంగా వారి చదువులు, మతపరమైన ఆచారాల పట్ల మరింత కఠినంగా ఉంటోంది. ఈ క్రమంలోనే కాందహార్ నగరంలో పోస్టర్లు వెలిశాయి. బుర్ఖాలు, హిజాబ్లను.. పై నుంచి కింది వరకు ధరించిన మహిళల ఫొటోలు ఆ పోస్టర్లలో ఉన్నాయి. 'జంతువుల్లా కనిపించేందుకే హిజావ్ వేసుకోవడం లేదు' అన్న అర్ధం వచ్చేట్టు పోస్టర్ల కింద రాసి ఉంది. ఈ పోస్టర్లు నగరంలోని రెస్టారెంట్లు, కేఫ్ల బయట ఏర్పాటు చేశారు.
"ముఖాలను హిజాబ్తో కప్పుకోని మహిళల కోసమే ఈ పోస్టర్లు. వారు హిజాబ్ వేసుకునే విధంగా చూడాలని వారి కుటుంబానికి చెబుతాము," అని ఓ అధికారి అన్నారు. మహిళలు ఆదేశాలు పాటించకపోతే.. వారి కుటుంబసభ్యుల ప్రభుత్వ ఉద్యోగాలను తీసేస్తామని అధికారులు హెచ్చరిస్తున్నారు.
ప్రభుత్వంలోని మినిస్ట్రీ ఫర్ ప్రమోషన్ ఆఫ్ వర్చ్యూ అండ్ ప్రివెన్షన్ ఆఫ్ వైస్ ఆదేశాల ప్రకారమే పోస్టర్లు అంటిస్తున్నట్టు తెలుస్తోంది.
మహిళలు ఇళ్ల నుంచి బయటకు రాకూడదని అనధికారిక ఆదేశాలు ఇప్పటికే ఇచ్చారు తాలిబన్లు. బహిరంగ ప్రదేశాల్లో ఉన్నప్పుడు.. హిజాబ్ ధరించాలని చెబుతున్నారు. షార్ట్లు, టైట్ జీన్స్, ట్రాన్స్పరెంట్ బట్టలు వేసుకోకూడదని తేల్చిచెప్పారు.
తాలిబన్ల పాలనపై సర్వత్రా ఆందోళన వ్యక్తమవుతోంది. మహిళల భద్రత, హక్కులపై ఆందోళన వ్యక్తం చేస్తున్నాయి.
టాపిక్