Corona deaths |`వారం రోజుల్లో 15 వేల మంది చ‌నిపోయారు`

Corona deaths | క‌రోనా మ‌హ‌మ్మారిని ప్ర‌జ‌లు క్రమంగా మ‌ర్చిపోతున్నారు. క‌రోనా ముందునాటి జీవ‌న‌శైలికి మ‌రోసారి అల‌వాటు ప‌డుతున్నారు. క‌రోనా జాగ్ర‌త్త‌ల‌ను కూడా పాటించ‌డం లేదు. ఈ నేప‌థ్యంలో క‌రోనా ముప్పుపై ప్ర‌పంచ ఆరోగ్య సంస్థ మ‌ళ్లీ హెచ్చ‌రిక‌లు జారీ చేసింది.

Corona deaths | 35% మ‌ర‌ణాలు

క‌రోనా ముప్పు ఇంకా తొల‌గిపోలేద‌ని WHO చీఫ్ టెడ్రోస్ పేర్కొన్నారు. ముఖ్యంగా ఒమిక్రాన్ వేరియంట్ ఇంకా ప్ర‌బ‌లంగానే ఉంద‌ని గుర్తు చేశారు. దాదాపు 90 శాతం సీక్వెన్స్‌ల్లో ఒమిక్రాన్‌కు చెందిన బీఏ 5 వేరియంట్ క‌నిపిస్తోంద‌న్నారు. ఒమిక్రాన్ స‌బ్ వేరియంట్స్ విస్తృతి పెరుగుతోంద‌ని, ఏదైనా బ‌ల‌మైన వేరియంట్ వ‌స్తే.. ప‌రిస్థితి చేయిదాటుతుంద‌ని హెచ్చ‌రించారు. `కరోనాను ఎదుర్కొని మ‌నం అల‌సిపోయాం కానీ క‌రోనా ఇంకా అల‌సిపోలేదు` అని వ్యాఖ్యానించారు. గ‌త నాలుగు వారాలుగా.. క‌రోనా మ‌ర‌ణాల సంఖ్య దాదాపు 35% పెరిగింద‌ని టెడ్రోస్ వివ‌రించారు. ముఖ్యంగా, గ‌త వారం రోజుల్లో ప్ర‌పంచ‌వ్యాప్తంగా 15 వేల మంది క‌రోనాకు బ‌ల‌య్యార‌ని వెల్ల‌డించారు. అన్ని ఆయుధాలు ఉండి కూడా ఇలా వారానికి 15 వేల మందిని కోల్పోవ‌డం ఆమోద‌నీయం కాద‌న్నారు.

Corona deaths | జాగ్ర‌త్త‌లు పాటించాలి

క‌రోనా మ‌రోసారి విజృంభిస్తే.. వారానికి 15 వేల మ‌ర‌ణాలు చోటు చేసుకునే ప్ర‌మాద‌ముంద‌ని, ఆ ప‌రిస్థితిని త‌ట్టుకోలేమ‌ని టెడ్రోస్ హెచ్చ‌రించారు. మ‌ర‌ణాల విష‌యాన్ని ప‌క్క‌న‌పెడ్తే.. క‌రోనా కేసుల సంఖ్య మాత్రం మ‌రోసారి పెరిగే ప్ర‌మాద‌ముంద‌న్నారు. `క‌రోనాతో స‌హ‌జీవ‌నం అంటే అది అంత‌రించిపోయింద‌ని భావించ‌డం కాదు. క‌రోనా జాగ్ర‌త్త‌లు పాటించ‌డాన్ని కొన‌సాగించాలి` అన్నారు.

Corona deaths | వ్యాక్సీన్ వేసుకోండి

క‌రోనాను ఎదుర్కోవ‌డానికి ప్ర‌ధాన ఆయుధం వ్యాక్సీన్ అని, వ్యాక్సినేష‌న్ విష‌యంలో అశ్ర‌ద్ధ వ‌ద్ద‌ని టెడ్రోస్ సూచించారు. `ఇప్ప‌టికే రెండు డోసులు వేసుకుని ఉంటే, బూస్ట‌ర్ డోస్ వేసుకోండి` అని స‌ల‌హా ఇచ్చారు. భౌతిక దూరం పాటించ‌డం, మాస్క్ ధ‌రించ‌డం కొన‌సాగించాల‌న్నారు. `రానున్న రోజుల్లో చ‌లి వాతావ‌ర‌ణం పెరుగుతుంది. దానివ‌ల్ల కోవిడ్‌తో పాటు ఇన్‌ఫ్లుయెంజా త‌దిత‌ర వ్యాధులు పెరిగే ప్ర‌మాద‌ముంది` అని వివ‌రించారు.