మ‌నుషుల‌కు తొలిసారి సోకిన బ‌ర్డ్ ఫ్లూ కొత్త వైరస్‌

బ‌ర్డ్ ఫ్లూ క‌ల‌గ‌జేసే హెచ్3ఎన్8 వేరియంట్ సాధార‌ణంగా కోళ్లు, కుక్క‌లు, గుర్రాల్లో ఎక్కువగా క‌నిపిస్తుంటుంది. అలాగే, జ‌ల‌చ‌రం సీల్స్‌లోనూ క‌నిపిస్తూ ఉంటుంది. ఇప్ప‌టివ‌ర‌కు ఈ వేరియంట్ మనుషుల‌కు సోక‌లేదు. తొలిసారి చైనాలోని హెనాన్ రాష్ట్రంలో నాలుగేళ్ల బాలుడు దీని బారిన ప‌డ్డాడు. జ్వ‌రం, త‌ల‌నొప్పి, ఇత‌ర ల‌క్ష‌ణాల‌తో బాధ‌ప‌డుతున్న ఈ బాలుడిని ఆసుప‌త్రిలో చేర్చారు. ప్ర‌స్తుతం ఆ బాలుడి ప‌రిస్థితి నిల‌క‌డ‌గా ఉంద‌ని వైద్యులు తెలిపారు. ఈ బాలుడి ఇంటివ‌ద్ద కోళ్లు, బాతులను పెంచుతుంటార‌ని, వాటి ద్వారానే ఇది అత‌డికి సోకి ఉండ‌వ‌చ్చ‌ని చైనా నేష‌న‌ల్ హెల్త్ క‌మిష‌న్ ప్ర‌క‌టించింది. ఈ హెచ్‌3ఎన్‌8 వేరియంట్ వైర‌స్ మ‌నుషుల‌పై చూపే ప్ర‌భావాన్ని ఇంకా ప‌రిశోధించాల్సి ఉంద‌ని బ్రిట‌న్‌కు చెందిన ఇన్‌ఫ్లుయెంజా స్పెష‌లిస్ట్ నికొలా లూయిస్ తెలిపారు. 

ర‌ష్య‌న్ ఫ్లూతో ల‌క్ష‌లాది మ‌ర‌ణాలు

1889లో ఇదే త‌ర‌హా వైర‌స్ కార‌ణంగా వ‌చ్చిన ర‌ష్య‌న్ ఫ్లూ మ‌హ‌మ్మారిగా మారి ల‌క్ష‌లాదిగా ప్రాణాలు బ‌లి తీసుకున్న విష‌యాన్ని మ‌ర‌చిపోకూడ‌ద‌ని వైద్యులు హెచ్చ‌రిస్తున్నారు. గ‌త సంవ‌త్స‌రం చైనాలో బ‌ర్డ్ ఫ్లూ క‌లుగ‌జేసే మ‌రో వేరియంట్ హెచ్‌10ఎన్‌3 తొలిసారి మ‌నుషుల‌కు సోకింది. 1997లో వెలుగులోకి వ‌చ్చిన హెచ్5ఎన్1, అలాగే 2013లో గుర్తించిన హెచ్‌7ఎన్9 వేరియంట్ల ద్వారా బ‌ర్డ్ ఫ్లూ మ‌నుషుల‌కు సోకింది. కానీ పెద్ద‌గా ప్ర‌భావం చూప‌కుండానే అవి క‌నుమ‌రుగ‌య్యాయి.