ఆఫీసులో 'బిన్ లాడెన్' చిత్రపటం- ప్రభుత్వ అధికారి సస్పెండ్
02 June 2022, 7:49 IST
బిన్ లాడెన్ పేరు వింటేనే అసహ్యించుకునే వారు చాలా మంది ఉంటారు. కానీ ఓ ప్రభుత్వ అధికారి మాత్రం.. తన ఆఫీసులో బిన్ లాడెన్ చిత్రపటాన్ని పెట్టుకున్నారు. అంతేకాకుండా.. ‘రెస్పెక్టెడ్ బిన్లాడెన్’ అని సంబోధిస్తూ.. ‘ప్రపంచంలోనే అత్యుత్తమైన ఇంజినీర్’గా ఆ ఉగ్రవాదిని ఆయన పొగడటం గమనార్హం.
ఆఫీసులో ఒసామా బిన్ లాడెన్ చిత్రపటం
ఉత్తర్ప్రదేశ్ ఫరూఖాబాద్లో విచిత్ర ఘటన వెలుగులోకి వచ్చింది. ప్రపంచం మొత్తం అసహ్యించుకునే అల్ఖైదా ఉగ్రవాది ఒసామా బిన్లాడెన్ చిత్రపటాన్ని.. తన ఆఫీసులో పెట్టుకున్నారు ఓ ప్రభుత్వ ఆధారిత విద్యుత్ పంపిణీ సంస్థకు చెందిన అధికారి. అంతేకాకుండా.. దాని కింద 'వరల్డ్స్ బెస్ట్ జూనియర్ ఇంజినీర్' అని రాసుకున్నారు. ఈ విషయం తెలుసుకున్న అధికారులు.. ఆ ఆఫీసర్ను సస్పెండ్ చేశారు.
డీవీవీఎన్ఎల్(దక్షినాంచల్ విద్యుత్ విత్రన్ నిగమ్ లిమిటెడ్)లో సబ్ డివిజనల్ ఆఫీసర్గా పనిచేస్తున్న రవీంద్ర ప్రకాశ్ గౌతమ్.. తన ఆఫీసులో బిన్ లాడెన్ చిత్రపటం పెట్టుకున్నారు. 'రెస్పెక్టెడ్ బిన్ లాడెన్' అని ఉగ్రవాదికి గౌరవం ఇస్తూ చిత్రపటం కింద బెస్ట్ ఇంజినీర్ అని రాశారు.
ఎవరు తీశారో తెలియదు కానీ.. ఆ 'రెస్పెక్టెడ్ బిన్ లాడెన్' ఫోటోను కెమెరాల్లో బంధించి సామాజిక మాధ్యమాల్లో పోస్ట్ చేశారు. అంతే! ఆ ఫొటోలు ఒక్కసారిగా వైరల్ అయ్యాయి. ఈ వ్యవహారం సీనియర్ అధికారుల దృష్టికి వెళ్లింది. చివరికి రవీంద్ర.. సస్పెన్షన్కు గురయ్యారు. బిన్ లాడెన్ చిత్రపటం కూడా ఆఫీసు నుంచి తొలగించారు.
'నా దగ్గర చాలా ఫొటోలు ఉన్నాయి..'
కాగా.. తన చర్యలను రవీంద్ర సమర్థించుకున్నారు. "ఎవరైనా.. ఎవరిలోనైనా స్ఫూర్తిని నింపొచ్చు. ఒసామా బిన్ లాడెన్.. ఈ ప్రపంచంలోనే అత్యుత్తమమైన జూనియర్ ఇంజినీర్. ఆఫీసు నుంచి ఆయన ఫొటోలను తీసేసి ఉండొచ్చు. కానీ నా దగ్గర బిన్ లాడెన్ ఫొటోలు చాలా ఉన్నాయి," అని చెప్పుకొచ్చారు.
అల్ఖైదా..
అల్ఖైద్ నేతగా ఒసామా బిన్ లాడెన్ ప్రపంచాన్ని గడగడలాడించాడు. అమెరికాపై తన ఆయుధాలను ఎక్కుపెట్టేవాడు. న్యూయార్క్ ట్విన్ టవర్స్లో విమానాలు చొచ్చుకెళ్లిన ఘటనకు సంబంధించిన సూత్రధారి బిన్ లాడెనే. ఆ ఉగ్ర ఘటనలో వేలాది మంది ప్రాణాలు కోల్పోయారు. నాటి రోజులను అమెరికా ప్రజలు ఇంకా మర్చిపోలేదు.
బిన్ లాడెన్ను అంతం చేసేందుకు రంగంలోకి దిగిన అమెరికా.. దాదాపు 10ఏళ్లు అతడిని అన్వేషించింది. చివరికి బిన్ లాడెన్.. పాకిస్థాన్లో తలదాచుకుంటున్నట్టు తెలిసింది. 2011లో ప్రత్యేక ఆపరేషన్ చేపట్టి.. బిన్ లాడెన్ను అమెరికా సైన్యం అంతం చేసింది.