Russia Ukraine war | యుద్ధానికి మూడు నెలలు పూర్తి.. పుతిన్​తో జెలెన్​స్కీ భేటీ!

Russia Ukraine war | రష్యా ఉక్రెయిన్​ యుద్ధానికి.. మంగళవారంతో మూడు నెలలు పూర్తయ్యాయి. నాలుగో నెలలోకి అడుగుపెట్టినా.. 'యుద్ధం ఎప్పుడు ముగుస్తుంది?' అన్న ప్రశ్నకు జవాబు దొరకడం లేదు. పైగా.. ఫిబ్రవరి 24న మొదలైన దండయాత్రలో.. రష్యా అరాచకాలు రోజురోజుకు పెరిగిపోతుండటం ఆందోళనకర విషయం.

విధ్వంసం.. వినాశనం..

• యూకే రక్షణశాఖ ప్రకారం.. తూర్పు ఉక్రెయిన్​ మొత్తాన్ని రష్యా సైనికులు ముట్టడించారు! అదే సమయంలో యుద్ధవిచ్ఛిన్న దేశంలోని అనేక ప్రాంతాలపై రష్యా దళాలు భీకర దాడులకు పాల్పడుతున్నాయి.
• రష్యా దాడుల్లో అనేకమంది ఉక్రెయిన్​ జవాన్లు ప్రాణాలు కోల్పోతున్నారు. దేశంలోని ఉత్తర ప్రాంతంలో.. శిక్షణా శిబిరంపై రష్యా దాడి చేయగా.. అందులోని 87మంది ప్రాణాలు కోల్పోయారు.
• Ukraine news today | కాగా.. రష్యా యుద్ధనేరాలపై విచారణ చేపట్టిన ఉక్రెయిన్​.. ఓ సైనికుడికి జీవిత ఖైదు శిక్షను విధించింది. యుద్ధం వేళ.. రష్యా సైనికుడిని ఉక్రెయిన్​ శిక్షించడం ఇదే తొలిసారి.
• లుహాన్స్క్, సెర్హి గైడై ప్రాంతాలకు ఆక్రమించుకునేందుకు 1,25,000మంది రష్యా సైనికులు ప్రయత్నిస్తున్నట్టు సమాచారం. కాగా.. టోష్కివ్క ప్రాంతం నుంచి రష్యా దళాలను తరిమికొట్టినట్టు ఉక్రెయిన్​ ప్రకటించింది.
• రష్యా దళానికి చెందిన 29వేల మందిని చంపినట్టు ఉక్రెయిన్​ అధ్యక్షుడు జెలెన్​స్కీ వెల్లడించారు. రష్యాపై ఆంక్షలతో విరుచుకుపడాలని.. దావోస్​లో జరిగిన వరల్డ్​ ఎకనామిక్​ ఫారంలో పిలుపునిచ్చారు.
• యుద్ధాన్ని ముగించేందుకు సిద్ధంగా ఉన్నట్టు జెలెన్​స్కీ పేర్కొన్నారు. రష్యా అధికారుల్లో.. ఆ దేశాధ్యక్షుడు పుతిన్​తో మాత్రమే తాను చర్చలు జరుపుతానని అన్నారు. 'రష్యాలో నిర్ణయాలన్నీ అధ్యక్షుడే తీసుకుంటారు. ఆయన లేకుండా.. యుద్ధం ముగింపునకు చర్చలు జరిపి లాభం లేదు. అధ్యక్షుడు పిలిస్తే.. చర్చలకు నేను సిద్ధం,' అని జెలెన్​స్కీ స్పష్టం చేశారు.

బైడెన్​ హెచ్చరిక..

Quad summit 2022 | జపాన్​ వేదికగా జరిగిన క్వాడ్​ సదస్సులో.. రష్యా ఉక్రెయిన్​ యుద్ధాన్ని ప్రస్తావించారు అమెరికా అధ్యక్షుడు జో బైడెన్​. ఈ క్రమంలో రష్యాకు తీవ్ర హెచ్చరికలు చేశారు. రష్యా ఇప్పుడు.. సైనికులను మాత్రమే చంపడం లేదని, ఉక్రెయిన్​ స్కూళ్లు, అమాయకులు, చిన్నారులపై దాడి చేస్తోందని మండిపడ్డారు. ఉక్రెయిన్​ సంస్కృతిని చరిత్ర నుంచి చెరిపివేసేందుకు రష్యా అధ్యక్షుడు పుతిన్​ ప్రయత్నిస్తున్నారని ఆరోపించారు.

"ఉక్రెయిన్​పై రష్యా చేపట్టిన దాడి.. మానవతా సంక్షోభానికి దారితీసింది. వేలాది మంది అమాయకులు.. శరణార్థులుగా మారి, వీధి మీద పడ్డారు. ఉక్రెయిన్​ అనేది యూరోప్​ ఒక్క సమస్య కాదు. ఇది మొత్తం ప్రపంచ సమస్య. ఉక్రెయిన్​పై రష్యా యుద్ధాన్ని కొనసాగించినన్ని రోజులు.. దానిని అడ్డుకునేందుకు అమెరికా ప్రయత్నిస్తుంది."