Pushpa 2 Shooting: పుష్ప 2 షూటింగ్‌ మొదలైంది.. లొకేషన్‌ పిక్‌ చూశారా?

Pushpa 2 Shooting: పాన్‌ ఇండియా లెవల్లో సంచలనం రేపిన పుష్ప మూవీకి సీక్వెల్‌గా వస్తున్న పుష్ప: ద రూల్‌పై భారీ అంచనాలు ఉన్నాయి. ఈ సినిమా ఎప్పుడెప్పుడు వస్తుందా అని ఫ్యాన్స్‌ ఎదురు చూస్తున్నారు. షూటింగ్‌కు సంబంధించిన అప్‌డేట్స్‌ కోసం కూడా ఎంతో ఆసక్తి నెలకొంది. ఈ నేపథ్యంలో మూవీ మేకర్స్‌ గుడ్‌న్యూస్‌ చెప్పారు.

సినిమా షూటింగ్‌ లొకేషన్‌కు సంబంధించిన ఫొటోను రిలీజ్ చేశారు. సెట్స్‌లో డైరెక్టర్‌ సుకుమార్‌తోపాటు మిగతా టీమ్‌ పని చేస్తున్న ఫొటో అది. పుష్ప ద రూల్‌ పనులు శరవేగంగా నడుస్తున్నాయంటూ ఈ ఫొటోను షేర్‌ చేశారు. ఐకాన్‌ స్టార్‌ అల్లు అర్జున్‌, డైరెక్టర్‌ సుకుమార్‌, సెలబ్రిటీ ఫొటోగ్రాఫర్‌ అవి గోవారికర్‌, పోస్టర్‌ డిజైనర్‌ ట్యూనీ జాన్‌, మిగతా టీమంతా బెస్ట్ ఔట్‌పుట్‌ ఇవ్వడానికి ప్రయత్నిస్తోందని మైత్రీ మూవీ మేకర్స్‌ చెప్పింది.

ఈ ట్వీట్‌ను రష్మిక మందన్నా కూడా రీ ట్వీట్‌ చేసింది. అది ప్రారంభమవుతోంది.. చూడండి అంటూ రష్మిక ఈ న్యూస్‌ను ఫ్యాన్స్‌తో పంచుకుంది. నిజానికి రెండు నెలల కిందటే పుష్ప 2 పూజా కార్యక్రమాలు జరిగాయి. అయితే షూటింగ్‌ ప్రారంభించడమే ఆలస్యమైంది. ఈ సినిమాను వచ్చే ఏడాది రిలీజ్‌ చేయడానికి ప్లాన్‌ చేస్తున్న విషయం తెలిసిందే.

పుష్ప ద రైజ్‌ మూవీ తెలుగుతోపాటు హిందీలోనూ సెన్సేషన్‌ క్రియేట్‌ చేయడంతో సీక్వెల్‌పై అంచనాలు పెరిగాయి. అందులోనూ కేజీఎఫ్‌ 2 మూవీ సృష్టించిన ప్రభంజనంతో పుష్ప సీక్వెల్‌ కూడా అదే రేంజ్‌లో ఉండాలని అభిమానులు ఆశిస్తున్నారు. దీంతో డైరెక్టర్‌ సుకుమార్‌ స్క్రిప్ట్‌పై ఒకటికి రెండుసార్లు పని చేశాడు. ఇక ఈ సినిమా కోసం అల్లు అర్జున్‌ సుమారు రూ.125 కోట్ల రెమ్యునరేషన్‌ తీసుకుంటున్నాడన్న వార్త కూడా సంచలనం రేపిన విషయం తెలిసిందే.

అటు సుకుమార్‌ కూడా తన రెమ్యునరేషన్‌ పెంచేశాడని మొదట్లో వార్తలు వచ్చినా.. ఆ తర్వాత లాభాల్లో వాటా తీసుకుంటున్నాడని తేలింది. పుష్ప 2 నిర్మాణంలో సుకుమార్‌ రైటింగ్స్‌ కూడా భాగస్వామిగా ఉన్న విషయం తెలిసిందే.