NZ vs SL Score: కుప్పకూలిన శ్రీలంక.. న్యూజిలాండ్ టార్గెట్ 172
09 November 2023, 17:33 IST
- NZ vs SL Score: వరల్డ్ కప్ సెమీఫైనల్ చేరాలంటే కచ్చితంగా గెలవాల్సిన మ్యాచ్ లో న్యూజిలాండ్ బౌలర్లను శ్రీలంకను కట్టడి చేశారు. అయితే టెయిలెండర్లు ప్రతిఘటించడంతో శ్రీలంక 171 రన్స్ చేయగలిగింది.
సమష్టిగా రాాణించిన న్యూజిలాండ్ బౌలర్లు
NZ vs SL Score: వరల్డ్ కప్ 2023లో డూ ఆర్ డై మ్యాచ్ ఆడుతున్న న్యూజిలాండ్ బౌలింగ్ లో రాణించింది. శ్రీలంకను 171 పరుగులకే కట్టడి చేసి.. విజయంపై ఆశలు రేపుతోంది. శ్రీలంక టాప్, మిడిలార్డర్ బ్యాటర్లు చేతులెత్తేసినా.. టెయిలెండర్లు వీరోచితంగా పోరాడటంతో ఆ టీమ్ ఈ మాత్రం స్కోరైనా సాధించగలిగింది. ఓపెనర్ కుశల్ పెరీరా 51 పరుగులతో టాప్ స్కోరర్ గా నిలవగా.. చివర్లో తీక్షణ 38 రన్స్ చేసి అజేయంగా నిలిచాడు.
ఒక దశలో శ్రీలంక టీమ్ 113 పరుగులకే 8 వికెట్లు కోల్పోయింది. అయితే చివర్లో తీక్షణ, చమీర, మదుషంక న్యూజిలాండ్ బౌలర్లను ప్రతిఘటించారు. ఈ ముగ్గురూ మరో 23 ఓవర్ల పాటు న్యూజిలాండ్ బౌలర్లను విసిగించారు. ముఖ్యంగా తీక్షణ, మదుషంక చివరి వికెట్ కు ఏకంగా 43 పరుగులు జోడించడం విశేషం. లంక టీమ్ లో నిస్సంక (2), మెండిల్ (6), సమరవిక్రమ (1), అసలంక (8), మాథ్యూస్ (16), ధనంజయ డిసిల్వా (19) విఫలమయ్యారు.
చివర్లో తీక్షణ (38 నాటౌట్), మదుషంక (19) ఒక్కో పరుగూ జోడిస్తూ లంకకు ఓ మోస్తరు స్కోరు అందించగలిగారు. న్యూజిలాండ్ బౌలర్లలో ట్రెంట్ బౌల్ట్ 3, ఫెర్గూసన్, సాంట్నర్, రచిన్ రవీంద్ర తలా రెండు వికెట్లు తీసుకున్నారు. బ్యాటింగ్ కు అనుకూలించే బెంగళూరు పిచ్ పై శ్రీలంక భారీ స్కోరు చేయలేకపోయింది. మరి ఈ టార్గెట్ ను న్యూజిలాండ్ చేజ్ చేస్తుందా? ఘన విజయం సాధించి సెమీస్ అవకాశాలను సజీవంగా ఉంచుకుంటుందా చూడాలి.