iOS trojan virus : ఐఫోన్​ యూజర్స్​కి అలర్ట్​! మీ బ్యాంక్​ నుంచి డబ్బులు దోచేసే ప్రమాదకరమైన వైరస్​..

iOS trojan virus : సెక్యూరిటీకి పెట్టింది పేరు యాపిల్​ ప్రాడక్ట్స్​. మరీ ముఖ్యంగా.. డేటా ప్రైవసీ, సెక్యూరిటీ కోసమే చాలా మంది ఐఫోన్స్​ని కొంటూ ఉంటారు. అలాంటిది! ఓ ప్రమాదకరమైన వైరస్​.. ఇప్పుడు ఐఫోన్​ యూజర్స్​కి షాక్​ ఇస్తోంది. వారికి తెలియకుండానే, ఫోన్​లోని ముఖ్యమైన డేటాను దొంగిలించి, బ్యాంక్​ ఖాతాల నుంచి డబ్బులను దోచేస్తోంది. ఈ “గోల్డ్​పికాక్స్​ ట్రోజన్​ వైరస్​”తో అప్రమత్తంగా ఉండాలని టెక్​ నిపుణులు.. ఐఫోన్​ యూజర్స్​కి అలర్ట్​ ఇస్తున్నారు.

అసలేంటి ఈ గోల్డ్​పికాక్స్​ ట్రోజన్​ వైరస్​?

ట్రోజన్​ వైరస్​ అనేది ఓ హానికర సాఫ్ట్​వేర్​. ఇది ఎన్నో దశాబ్దాలుగా ఇబ్బంది పెడుతోంది. అయితే.. ఇప్పుడు, కేవలం ఐఫోన్స్​నే టార్గెట్​ చేస్తూ.. గోల్డ్​పికాక్స్​ ట్రోజన్​ వైరస్​ బయటకి వచ్చింది. ఇందులో అనేక అడ్వాన్స్​డ్​ ఫీచర్స్​ ఉండటం మరింత ఆందోళనకు గురిచేస్తున్న విషయం.

టెక్​రాడార్​ నివేదిక ప్రకారం.. ఈ గోల్డ్​పికాక్స్​ ట్రోజన్​ వైరస్​ని తొలిసారిగా గతేడాది అక్టోబర్​లో గుర్తించారు. అనంతరం ఆ గోల్డ్​పికాక్స్​ సాఫ్ట్​వేర్​ అప్డేట్​ అవుతూ వచ్చింది. చివిరికి.. ఐఓఎస్​ డివైజ్​ల భద్రతకు ముప్పుగా మారింది. మరీ ముఖ్యంగా ఐఫోన్స్​ని అది టార్గెట్​ చేస్తోంది.

iPhone users security breach : ఈ కొత్త ట్రోజన్​ వైరస్​.. మన ఫోన్​లోకి ప్రవేశించి, ఫేషియల్​ రికగ్నీషన్​ సమాచారం, ఐడెంటిటీ డాక్యుమెంట్స్​, టెక్ట్స్​ మెసేజ్​లను స్కాన్​ చేస్తోందట. వాటిల్లో బ్యాంకింగ్​ సమాచారాలు దొరికితే.. అకౌంట్స్​ని ఖాళీ చేసేస్తోందట!

బయోమెట్రిక్​ డేటా దొరికితే.. ఏఐ ఆధారిత డీప్​ఫేక్స్​ చేయడం నుంచి ఆథరైజ్​ లేకుండా బ్యాంక్​ అకౌంట్స్​కి యాక్సెస్​ పొందడటం వరకు.. అన్ని ప్రమాదాలు ఉన్నాయి. ప్రస్తుతానికి.. ఈ తరహా కేసులు వియత్నాం, థాయ్​లాండ్​లో కనిపిస్తున్నాయి. కానీ రానున్న రోజుల్లో.. ఈ గోల్డ్​పికాక్స్​ ట్రోజన్​ వైరస్​కి ఇంగ్లీష్​ స్పీకింగ్​ దేశాలకు కూడా పాకొచ్చని నివేదికలు చెబుతున్నాయి.

GoldPickaxe virus news : అసలు ఈ గోల్డ్​పికాక్స్​ వైరస్​.. ఐఓఎస్​ డివైజ్​లోకి ఎలా వెళ్లగలుగుతోంది? అనేది ఇక్కడ చాలా కీలకంగా మారింది. సాధారణంగా.. ఆండ్రాయిడ్​ డివైజ్​లలో.. లింకస్​, యాప్స్​, ఇతర మార్గాల ద్వారా వైరస్​లు ఫోన్స్​లోకి వెళ్లడం సులభమే. కానీ ఐఓఎస్​ డివైజ్​లలో అది చాలా కష్టమైన విషయం. దానిని ఛేదించుకుని కూడా వెళుతోందంటే.. ఈ వైరస్​ ఎంత శక్తివతమైనదో అర్థం చేసుకోవచ్చు. యాపిల్​ మొబైల్​ అప్లికేషన్​ టెస్టింగ్​ ప్లాట్​ఫామ్​ అయిన టెస్ట్​ఫ్లైట్​ని.. హ్యాకర్లు హ్యాక్​ చేసినట్టు తెలుస్తోంది. అక్కడి నుంచి గోల్డ్​పికాక్స్​ని వ్యాప్తి చేసినట్టు సమాచారం.

ఇలా చేసి జాగ్రత్తపడండి..

ఈ వార్త ఐఫోన్​ యూజర్స్​కి కాస్త ఇబ్బందికరమైనదే! అందుకే ఐఫోన్​ వాడే వారు కొన్ని జాగ్రత్తలు తీసుకోవాలని నిపుణులు సూచిస్తున్నారు. అత్యవసరం అయితే తప్ప.. టెస్ట్​ఫ్లైట్​ నుంచి యాప్స్​ని ఇన్​స్టాల్​ చేసుకోవద్దని చెబుతున్నారు. మొబైల్​ డివైజ్​ మేనేజ్​మెంట్​ ప్రొఫైల్స్​కి కూడా దూరంగా ఉండాలని అంటున్నారు. యూఎస్​బీ ద్వారా మాక్​కి కనెక్ట్​ చేస్తుంటే.. మాల్​వేర్​ స్కానింగ్​ సెటప్​ని రన్​ చేయాలని స్పష్టం చేస్తున్నారు. లాక్​డౌన్​ మోడ్​ని ఆన్​ చేసి, యాపిల్​ స్టోలెన్​ డివైజ్​ ప్రొటెక్షన్​ని యాడ్​ చేస్తే.. భద్రత పెరుగుతుందని సూచిస్తున్నారు.