Warangal News : 2022 చనిపోయిన వ్యక్తికి ఏడాది క్రితం బైక్ లోన్, వసూలు కోసం ఇంటికెళ్తే బయటపడ్డ మోసం!

Warangal News : వరంగల్ జిల్లాలో ఓ విచిత్రమైన సంఘటన చోటుచేసుకుంది. రెండేళ్ల క్రితం చనిపోయిన ఓ వ్యక్తి పేరు మీద బుల్లెట్​ బండి అమ్ముడైంది. సుమారు నాలుగు సంవత్సరాల పాటు ఈఎంఐ చెల్లించేలా ఒప్పందం కుదుర్చుకుని మరీ ఆయన పేరు మీద రూ.3 లక్షల విలువైన బండి రిలీజ్​ చేశారు. చివరకు కిస్తీలు సరిగా కట్టడం లేదంటూ వారి ఇంటికి వెళ్లి చూసిన బ్యాంక్​ అధికారులు ఒక్కసారిగా షాక్​ అయ్యారు. ఆ వ్యక్తి చనిపోయి రెండున్నర సంవత్సాలు దాటిందని కుటుంబ సభ్యులు చెప్పడంతో నివ్వెరపోయి దిక్కుతోచని స్థితిలో పడ్డారు. వరంగల్ జిల్లా నల్లబెల్లి మండలంలోని నందిగామ గ్రామంలో చోటుచేసుకున్న ఈ ఘటన ఆలస్యంగా వెలుగులోకి వచ్చింది. గ్రామస్తులు తెలిపిన ప్రకారం పూర్తి వివరాలు ఇలా ఉన్నాయి. నందిగామ గ్రామానికి చెందిన భూక్య సునీత, నగేశ్​ దంపతులకు ముగ్గురు కొడుకులు. అందులో పెద్దవాడైన భూక్య రాకేష్​ వివిధ సమస్యల కారణంగా 2022 జనవరి 23న పురుగుల మందు తాగి ఆత్మహత్య చేసుకున్నాడు.ఈ ఘటన జరిగిన దాదాపు రెండున్నర సంవత్సరాలకు రాకేష్​ను వెతుక్కుంటూ కొంతమంది బ్యాంక్​ అధికారులు వారి ఇంటికి వచ్చారు. రాకేష్​పేరు మీద లోన్​ ఉందని, కిస్తీలు సరిగా కట్టడం లేదని దబాయించడంతో ఆయన తల్లిదండ్రులు, స్థానికులంతా షాక్​ అయ్యారు. రాకేష్​ ఎప్పుడో చనిపోతే, ఆయన బండి తీసుకోవడమేంటని ఆశ్చర్యం వ్యక్తం చేశారు.

చనిపోయిన రెండేళ్లకు బండి కొనుగోలు

భూక్య రాకేష్​ 2022 జనవరి 23న చనిపోగా, 2023 అక్టోబర్​ 18న ఆయన పేరు మీద కోటక్​ మహీంద్రా బ్యాంక్ ఖమ్మం బ్రాంచ్​ అధికారులు రాయల్​ ఎన్​ ఫీల్డ్​ బుల్లెట్​350 సీసీ ద్విచక్ర వాహనానికి సుమారు రూ.3 లక్షల లోన్​ మంజూరు చేశారు. మొత్తంగా 48 నెలల ఈఎంఐ ప్లాన్​ కూడా ఇచ్చారు. ఈ మేరకు ప్రతి నెలా రూ.7,150 చొప్పున చెల్లించేలా ఒప్పందం కుదుర్చుకుని బండి రిలీజ్​ చేశారు. ఆ తరువాత మూడు నెలల పాటు కిస్తీలు కూడా ఖాతాలో జమయ్యాయి. ఆ తరువాత వాయిదాలు చెల్లించకపోవడంతో బ్యాంక్​ అధికారులు ఫోన్​ ద్వారా సంప్రదించే ప్రయత్నం చేశారు. అయినా లాభం లేకపోవడంతో లోన్​ రికవరీ కోసం కలెక్షన్​ మేనేజర్ శ్రీనివాస్​, వెరిఫికేషన్​ ఏజెంట్​ అరవింద్​ నందిగామకు చేరుకున్నారు. అడ్రస్​ వెతుక్కుంటూ రాకేష్​ఇంటికి వెళ్లారు. అక్కడ బుల్లెట్​ బండి కనపడకపోగా, ఆయన గతంలోనే చనిపోయాడన్న విషయం తెలుసుకుని బ్యాంక్​ అధికారులు షాక్​ తిన్నారు.

తప్పుడు పత్రాలు సృష్టించి లోన్​

రాకేష్​ చనిపోయాడని చెప్పినా వినకుండా బ్యాంక్​ అధికారులు లోన్​ చెల్లించాల్సిందిగా సంబంధిత కుటుంబ సభ్యులపై ఒత్తిడి తెచ్చారు. దీంతో వారు ఎదురు తిరిగారు. ఎవరికో లోన్​ ఇచ్చి, తమను కట్టమంటే ఎలా కడతామని నిలదీశారు. అనంతరం స్థానిక పోలీసులకు సమాచారం కూడా ఇచ్చారు. కాగా మృతి చెందిన రాకేష్​ మిత్రుడొకరు నర్సంపేటకు చెందిన వ్యక్తికాగా, ఆయన ద్వారానే ఈ బాగోతం నడిచిందనే ఆరోపణలు వినిపిస్తున్నాయి. కాగా నర్సంపేటకు చెందిన వ్యక్తే బండి తీసుకుని, బ్యాంక్​ సిబ్బంది, దళారుల సహాయంతో ఈ మోసానికి తెరలేపినట్లు తెలిసింది. రాకేష్​ పేరున తప్పుడు పత్రాలు సృష్టించి, బ్యాంకు సిబ్బందిని మేనేజ్​ చేసి లోన్​ మీద బండి తీసుకుని మోసానికి పాల్పడినట్లు ప్రచారం జరుగుతోంది. కాగా ఇదే విషయమై సంబంధిత బ్యాంక్​ అధికారులు పోలీసులను ఆశ్రయించగా, గుట్టుగా విచారణ జరుపుతున్నట్లు సమాచారం.

(రిపోర్టింగ్: హిందుస్థాన్ టైమ్స్ తెలుగు, వరంగల్ ప్రతినిధి)