Congress Yatra in Tandur : కేసీఆర్, కేటీఆర్… కర్ణాటకకు రండి, మీకు దగ్గరుండి చూపిస్తా - డీకే శివకుమార్ సవాల్

Telangana Congress Vijayabheri Yatra: తెలంగాణలో అధికారమే లక్ష్యంగా కాంగ్రెస్ పకడ్బందీ అడుగులు వేస్తోంది. మొదటి విడత బస్సు యాత్ర విజయవంతం కావటంతో… తాండూరు నుంచి రెండో విడత యాత్రను ప్రారంభించింది. శనివారం నుంచి మొదలైన ఈ యాత్రకు… ముఖ్య అతిథిగా కర్ణాటక పీసీసీ అధ్యక్షుడు డీకే శివ కుమార్ హాజరయ్యారు. ఈ సందర్భంగా మాట్లాడిన ఆయన… కాంగ్రెస్ కృషితోనే తెలంగాణ రాష్ట్ర సాధ్యమైందన్నారు. ఈ సందర్భంగా… కేసీఆర్ కు సవాల్ విసిరారు.

డీకె శివ కుమార్ ప్రసంగం:

- తొమ్మిదేళ్ల క్రితం సోనియాగాంధీ తెలంగాణ రాష్ట్రాన్ని ప్రకటించింది. రాజకీయాల గురించి ఆలోచించకుండా నిర్ణయం తీసుకుంది. అలాంటి పార్టీకి మద్దతుగా నిలవాల్సిన సమయం వచ్చింది. మీరంతా ఆలోచించాలి.

- కాంగ్రెస్ ఇచ్చిన ప్రతి హామీని నెరవేర్చింది. కానీ పదేళ్ల కేసీఆర్ పాలనలో ఎన్ని హామీలను అమలు చేశారని ప్రశ్నిస్తున్నాను..?

- కర్ణాటక రాష్ట్రంలో ఇచ్చిన హామీలను ప్రతి ఒకటిని అమలు చేస్తున్నాం. కేసీఆర్ పదేళ్లలో ఏమైనా చేశారా..?

- తెలంగాణలో ఆరు హామీలను ఇచ్చాం. కాంగ్రెస్ లో ఐదు హామీలను ఇచ్చి అమలు చేశాం. ఇక్కడి కూడా చేస్తాం. కేసీఆర్ ఒకసారి కర్ణాటకకు వచ్చి చూడు.

- కర్ణాటకలో ఉచితంగా కరెంట్ ఇస్తున్నాం. తెలంగాణలో కూడా ఇచ్చిన ప్రతి హామీని అమలు చేస్తామని చెబుతున్నాను. కర్ణాటకలో ఉచితంగా పది కేజీల బియ్యం కూడా ఇస్తున్నాం.

- తెలంగాణలో కాంగ్రెస్ అధికారంలోకి వస్తే... డిసెంబర్ 9వ తేదీన జన్మదినం సందర్భంగా ప్రతి హామీని అమలు చేసేలా సంతకం చేస్తాం. అదే రోజు కాంగ్రెస్ అభ్యర్థి ప్రమాణస్వీకారం ఉంటుంది.

- బీజేపీకి బీఆర్ఎస్ పార్టీ బీటీమ్ లా పని చేస్తుంది.

- కర్ణాటకలో మేం ప్రస్తుతం 5 గంటల కరెంట్ ఇస్తున్నాం. త్వరలోనే 7 గంటల కరెంట్ ఇచ్చేందుకు ప్రయత్నం చేస్తున్నాం.

- నేను కేసీఆర్, కేటీఆర్ ను అడుగుతున్నాను. మీరు కర్ణాటకకు రండి, మేం ఏం చేశామో చూడండి. టైం చెప్పండి. మీతో కూడా నేను వస్తాను. విద్యుత్ ఎలా ఇస్తున్నామో కూడా చూపిస్తాను.

-ఇందిరమ్మ ఇళ్లను నిర్మిస్తాం. చదువుకునే వారికి ఆర్థిక సాయం అందిస్తాం.

-రేవంత్ రెడ్డి ఆధ్వర్యంలో కాంగ్రెస్ ఇచ్చిన ఆరు గ్యారెంటీలను తప్పకుండా అమలు చేస్తాం.

-డిసెంబర్ 9వ తేదీన కాంగ్రెస్ ప్రభుత్వం ఏర్పడుతుంది.