Viral Video : ఖరీదైన ఫెరారీ కారుపై నిద్రపోయిన వీధి కుక్క.. గొప్ప మనసును చాటుకున్న హైదరాబాదీ

Stray Dog Sleep On Ferrari Car: వీధి కుక్క ఇంటివైపు వస్తేనే వెంటనే వెళ్లగొట్టే ప్రయత్నం చేస్తాం. ఇంట్లోకి వచ్చినా, మన పరిసర ప్రాంతాలను పాడు చేసినా విపరీతమైన కోపం వచ్చేస్తుంది. అలాంటింది ఏకంగా ఓ వీధి కుక్క... ఓ ఇంట్లో పార్క్ చేసిన అత్యంత ఖరీదైన ఫెరారీ కారుపై హాయిగా నిద్రపోయింది. అయితే సదరు కారు ఓనరుకు సహజంగానే కోపం వస్తుంది. కానీ హైదరాబాద్ కు చెందిన ఆ వ్యక్తి మాత్రం అలా చేయలేదు. ఏకంగా ఆ కుక్కను దగ్గరికి తీసే ప్రయత్నం చేస్తూ... బుజ్జగించాడు. ఇప్పుడు ఈ వీడియో సోషల్ మీడియాలో తెగ వైరల్ అవుతోంది.

అమీర్ శర్మ…. హైదరాబాద్ కు చెందిన ఇంటీరియర్ డిజైనర్. ఇతనికి సూపర్ కార్లు అంటే అమితమైన ఆసక్తి. ఖరీదైన కార్లను కొనుగోలు చేస్తుంటాడు. అయితే ఈ కుక్క వీడియోను అతనే తన ఇన్ స్టా గ్రామ్ లో పోస్ట్ చేశాడు. అంతేకాదు… తన ఫెరారీ కవర్ చుట్టుపక్కల ఉన్న వీధి కుక్కలకు వెచ్చని మంచంగా మారిందంటూ సరదగా రాసుకొచ్చారు. ఈ కుక్క కొద్దిరోజుల కిందట గాయాలతో తమ దగ్గరకి వచ్చిందని… మేము దాన్ని జాగ్రత్తగా చూసుకుంటున్నామని పేర్కొన్నారు. చుట్ట పక్కల ఉన్న వీధి కుక్కలను తమ ఇంట్లోని గ్యారేజీలోకి అనుమతించినట్లు చెప్పారు.

అయితే ఇన్ స్టా గ్రామ్ లో శర్మ పోస్టు చేసిన ఈ వీడియో… సోషల్ మీడియాలో తెగ వైరల్ అయిపోంది. భారీగా లైకులు రావటంతో పాటు… నెటిజన్లు ప్రశంసిస్తూ కామెంట్లు రాసుకొస్తున్నారు. శర్మజీ… కార్లపైనే కాదు, మూగ జంతువుల పట్ల మీకున్న ప్రేమ, కరుణ చూడటానికి చాలా ఆనందంగా ఉందంటూ ఓ నెటిజన్ కామెంట్ చేశారు. మరో నెటిజన్ స్పందిస్తూ… ఇలాంటి ఖరీదైన కార్లపై జంతువుల వంటివి రాకుండా…సూదులతో కూడిన నెట్స్ తో కవర్ చేయటం చూశానని, కానీ మీలాగా టన్నుల కొద్ది గౌరవం ఇవ్వటం చూడలేదంటూ సరదాగా రాసుకొచ్చారు. "మీరు కేవలం డబ్బుతో ధనవంతులు కాదు… మీ విశాలమైన హృదయంతో కూడా ధనవంతులు" అని మరొకరు కామెంట్స్ చేశారు.