INDW vs PAKW T20 World Cup: టీ20 ప్రపంచకప్‍లో భారత్, పాకిస్థాన్ పోరు.. మ్యాచ్ టైమ్, లైవ్ స్ట్రీమింగ్ వివరాలు ఇవే

మహిళల టీ20 ప్రపంచకప్‍లో కీలకమైన పోరుకు భారత జట్టు రెడీ అయింది. పాకిస్థాన్‍తో హైవోల్టేజ్ సమరానికి సంసిద్ధమైంది. దుబాయి వేదికగా రేపు (అక్టోబర్ 6) మెగాటోర్నీలో టీమిండియా, పాక్ మధ్య గ్రూప్-ఏ మ్యాచ్ జరగనుంది. 

ప్రపంచకప్‍లో తొలి మ్యాచ్‍లో న్యూజిలాండ్ చేతిలో ఘోరంగా ఓడింది హర్మన్‍ప్రీత్ కౌర్ సారథ్యంలోని భారత్. దీంతో సెమీస్ ఆశలు నిలువాలంటే పాకిస్థాన్‍తో రేపు మ్యాచ్ తప్పక గెలువాలి. దీంతో ఈ మ్యాచ్ మరింత ఆసక్తికరంగా ఉంది. తొలి మ్యాచ్‍‍లో లంకపై గెలిచి జోష్‍లో ఉంది పాక్.

ఈ టీ20 ప్రపంచకప్‍లో భారత్, పాకిస్థాన్ మధ్య మ్యాచ్ రేపు (అక్టోబర్ 6) మధ్యాహ్నం 3 గంటల 30 నిమిషాలకు మొదలవుతుంది. అందుకు గంట ముందే టాస్ ఉంటుంది.  దుబాయ్ అంతర్జాతీయ స్టేడియం వేదికగా ఈ మ్యాచ్ సాగనుంది. 

టీ20 వరల్డ్ కప్ మెగాటోర్నీలో టీమిండియా, పాకిస్థాన్ మధ్య ఈ మ్యాచ్‍ను స్టార్ స్పోర్ట్స్ నెట్‍వర్క్ టీవీ ఛానెళ్లలో లైవ్ టెలికాస్ట్ చూడొచ్చు. డిజిటల్ విషయానికి వస్తే డిస్నీ+ హాట్‍స్టార్ ఓటీటీలో మ్యాచ్ లైవ్ స్ట్రీమింగ్ వీక్షించొచ్చు. 

పాకిస్థాన్‍పై ఎలాగైనా గెలిచి టీ20 ప్రపంచకప్ సెమీస్ ఆశలను సజీవంగా ఉంచుకోవాలని హర్మన్‍ప్రీత్ నేతృత్వంలోని టీమిండియా పట్టుదలగా ఉంది. ఈ మెగాటోర్నీలో గ్రూప్ దశలో తదుపరి శ్రీలంక, ఆస్ట్రేలియాతో భారత్ తలపడాల్సి ఉంది.