Ram Charan: నా సోలో సినిమా వచ్చి నాలుగేళ్లపైనే అయింది.. గేమ్ ఛేంజర్ కోసం చాలా కష్టపడ్డాం: డల్లాస్‍లో రామ్‍చరణ్

మెగా పవర్ స్టార్ రామ్‍చరణ్ హీరోగా నటించిన గేమ్ ఛేంజర్ సినిమా 2025 జనవరి 10వ తేదీన రిలీజ్ కానుంది. ఈ తరుణంలో అమెరికాలోని డల్లాస్ వేదికగా నేడు (డిసెంబర్ 21) ప్రీ-రిలీజ్ ఈవెంట్‍ను మూవీ టీమ్ నిర్వహిస్తోంది. 

ప్రీ-రిలీజ్ ఈవెంట్ కంటే ముందు ఏర్పాటు చేసిన ఫ్యాన్స్ మీట్‍లో రామ్‍చరణ్ మాట్లాడారు. తన సోలో మూవీ వచ్చిన నాలుగేళ్లుపైగానే అయిందని అన్నారు. 

“నా బ్రదర్ తారక్‍తో ఆర్ఆర్ఆర్ చేశాను. కానీ సోలో ఫిల్మ్ వచ్చి నాలుగేళ్లకు పైగానే అయింది. మూడున్నరేళ్ల పాటు గేమ్ ఛేంజర్ కోసం చాలా కష్టపడ్డాం” అని రామ్‍చరణ్ అన్నారు. 

గేమ్ ఛేంజర్ సినిమా డైరెక్టర్ శంకర్ స్టైల్‍లో ఉంటుందని రామ్‍చరణ్ చెప్పారు, సంక్రాంతికి ఈ మూవీ అద్భుతంగా ఉంటుందని, తాము అసలు నిరుత్సాహపరచబోమని అన్నారు.

రామ్‍చరణ్ సోలో హీరోగా వచ్చిన లాస్ట్ సినిమా వినయ విధేయ రామ (2019). ఆ తర్వాత 2022లో ఆర్ఆర్ఆర్ వచ్చినా దాంట్లో జూనియర్ ఎన్టీఆర్ కూడా హీరోగా నటించారు. అదే ఏడాది ఆచార్య కూడా రిలీజైనా మెగాస్టార్ చిరంజీవి కూడా ఆ చిత్రంలో నటించారు. దీంతో ఆ రెండూ మల్టీస్టారర్ చిత్రాలయ్యాయి.

దీంతో వినయ విధేయ రామ తర్వాత.. సుమారు ఐదేళ్లకు రామ్‍చరణ్ సోలో హీరోగా గేమ్ ఛేంజర్ వస్తోంది. శంకర్ దర్శకత్వం వహించిన ఈ పొలిటికల్ యాక్షన్ మూవీ సంక్రాంతి సందర్భంగా వచ్చే నెల జనవరి 10న ప్రేక్షకుల ముందుకు రానుంది.