Covid vaccine: సేఫ్టీ ఇష్యూస్ కారణంగా కోవిషీల్డ్ వ్యాక్సిన్ ను ఉపసంహరించుకోనున్న ఆస్ట్రాజెనెకా
కొవిడ్ 19 నుంచి రక్షణ కల్పించడానికి రూపొందించిన కొవిషీల్డ్ టీకా తీసుకున్నవారిలో అనారోగ్య సమస్యలు తలెత్తుతున్నట్లు వార్తలు వచ్చిన నేపథ్యంలో.. కోవిషీల్డ్ వ్యాక్సీన్ ను ఉపసంహరించుకుంటున్నట్లు ఆస్ట్రాజెనెకా ప్రకటించింది.
కోవిడ్ వ్యాక్సిన్ కోవిషీల్డ్, వాక్స్జెవ్రియాపై భద్రతా ఆందోళనల మధ్య, ఫార్మాస్యూటికల్ కంపెనీ ఆస్ట్రాజెనెకా ప్రపంచవ్యాప్తంగా వాటిని ఉపసంహరించుకోవడం ప్రారంభించినట్లు తెలిపింది. అయితే, కోవిడ్ -19 టీకాల డిమాండ్ తగ్గిన కారణంగా ఈ నిర్ణయం తీసుకున్నట్లు వెల్లడించింది. ఈ వ్యాక్సిన్ ను ఉపసంహరించుకోవడానికి ఆస్ట్రాజెనెకా (AstraZeneca) మార్చి 5వ తేదీన దరఖాస్తు చేసింది. ఆ దరఖాస్తుకు మే 7 న ఆమోదం లభించింది.
సేఫ్టీ సమస్యలను అంగీకరించిన ఆస్ట్రాజెనెకా
ఆంగ్లో-స్వీడిష్ ఔషధ తయారీదారు అయిన ఆస్ట్రాజెనెకా తన కోవిడ్ వ్యాక్సిన్లు, చాలా అరుదైన సందర్భాల్లో, థ్రోంబోసిస్ థ్రోంబోసైటోపెనియా సిండ్రోమ్ (TTS) కు కారణమవుతాయని అంగీకరించింది. ఆ తరువాత కొన్ని రోజులకే తన వ్యాక్సీన్ లను ఉపసంహరించుకుంటున్నట్లు ఆస్ట్రాజెనెకా వెల్లడించింది. ఈ వ్యాక్సీన్ ఇది రక్తం గడ్డకట్టడం (thrombosis), తక్కువ ప్లేట్లెట్ కౌంట్ (థ్రోంబోసైటోపెనియా) కు కారణమవుతోందని తేలింది. వ్యాక్సినేషన్ లేకపోయినా ఈ సమస్య ఉత్పన్నమవుతుందని, ప్రతి సందర్భంలో కారణాన్ని నిర్ణయించడానికి నిపుణుల సాక్ష్యం అవసరమని ఆస్ట్రాజెనెకా పేర్కొంది. పేషెంట్ సేఫ్టీకి తమ తొలి ప్రాధాన్యత అని పునరుద్ఘాటించింది. ‘ఆత్మీయులను కోల్పోయిన లేదా ఆరోగ్య సమస్యలను నివేదించిన ఎవరికైనా మా సానుభూతి ఉంటుంది. రోగి భద్రత మా అత్యంత ప్రాధాన్యత. వ్యాక్సిన్లతో సహా అన్ని మందులను సురక్షితంగా ఉపయోగించడాన్ని నిర్ధారించడానికి నియంత్రణ అధికారులకు స్పష్టమైన మరియు కఠినమైన ప్రమాణాలు ఉన్నాయి’ అని ఆస్ట్రాజెనెకా ప్రతినిధి గత వారం ఒక ప్రకటనలో తెలిపారు.
ఆస్ట్రాజెనెకాపై దావాలు
ప్రపంచవ్యాప్తంగా అనేక మరణాలకు దారితీసిన కోవిడ్ -19 వ్యాక్సిన్లపై ప్రపంచవ్యాప్తంగా అనేక దేశాల్లో కోర్టుల్లో కేసులు నడుస్తున్నాయి. ఆస్ట్రాజెనెకా వ్యాక్సిన్ తీసుకున్న తర్వాత తన మెదడులో రక్తం గడ్డకట్టి, రక్తస్రావం అయిందని, దీంతో మెదడుకు తీవ్ర నష్టం వాటిల్లిందని జేమీ స్కాట్ అనే వ్యక్తి ఆస్ట్రాజెనెకాపై ఫిర్యాదు చేశాడు. వ్యాక్సిన్ ప్రతికూల ప్రభావాలపై ఆస్ట్రాజెనెకాపై కోర్టులో 50కి పైగా కేసులు దాఖలయ్యాయి. తమ కోవిడ్ వ్యాక్సిన్ కోవిషీల్డ్ అరుదైన దుష్ప్రభావాలను కలిగిస్తుందని ఆస్ట్రాజెనెకా ఇటీవల అంగీకరించింది. కోవిషీల్డ్ ను ఆస్ట్రాజెనెకా అభివృద్ధి చేయగా, భారత్ లోని సీరమ్ ఇన్స్టిట్యూట్ ఆఫ్ ఇండియా ఉత్పత్తి చేసింది.
