Vijay Deverakonda | విజయ్ దేవరకొండ, పూరి జగన్నాథ్ ‘జేజీఎమ్’ ముంబైలో షురూ...

‘లైగ‌ర్’ త‌ర్వాత విజ‌య్ దేవ‌ర‌కొండ‌,పూరి జ‌గ‌న్నాథ్ క‌ల‌యిక‌లో మ‌రో పాన్ ఇండియన్ చిత్రం రాబోతున్నది. ‘జేజీఎమ్’ (జనగణమన) పేరుతో తెర‌కెక్కుతున్న ఈ సినిమా మంగళవారం ముంబైలో లాంఛ‌నంగా మొద‌లైంది. ఈ సినిమాతో ద‌ర్శ‌కుడు వంశీపైడిప‌ల్లి నిర్మాత‌గా అరంగేట్రం చేయ‌బోతున్నారు. పూరి జగన్నాథ్, ఛార్మిలతో క‌లిసి ఆయ‌న ఈ సినిమాను నిర్మించ‌నున్నారు. 

యాక్ష‌న్ ఎంటర్ టైనర్ గా ప్ర‌తిష్టాత్మ‌కంగా రూపొందుతున్న ఈ సినిమా పోస్ట‌ర్‌ను మంగళవారం విడుద‌లచేశారు. ఇందులో ఆర్మీ సోల్జ‌ర్స్ లైఫ్ జాకెట్స్ ధ‌రించి ఆకాశం నుంచి భూమిపైకి దూకుతూ క‌నిపిస్తున్నారు. వారి పైకి యుద్ద రాకెట్స్ దూసుకువ‌స్తుండ‌టం ఆస‌క్తిని పంచుతోంది. వార్ బ్యాక్‌డ్రాప్‌లో ఈ సినిమా రూపొందుతున్న‌ట్లుగా స‌మాచారం. జేజీఎమ్ పేరుతో టైటిల్ షార్ట్‌క‌ట్‌గా చూపించ‌డం ఉత్కంఠను రేకెత్తిస్తోంది. ఏప్రిల్ నుండిఈ సినిమా రెగ్యుల‌ర్ షూటింగ్ ప్రారంభించ‌బోతున్న‌ట్లు చిత్ర యూనిట్ తెలిపింది. 

వ‌చ్చే ఏడాది ఆగ‌స్ట్ 3న ఈ సినిమాను రిలీజ్ చేయ‌బోతున్న‌ట్లు పేర్కొన్నారు. త‌న కెరీర్‌లోనే ఛాలెంజింగ్ స్ర్కిప్ట్ ఇద‌ని,ప్ర‌తి భార‌తీయుడి హృద‌యాన్ని క‌దిలించేలా స్ఫూర్తిదాయ‌కంగా ఈ సినిమా ఉంటుంద‌ని ప్రారంభోత్స‌వ వేడుక‌లో విజ‌య్ దేవ‌ర‌కొండ అన్నారు. పూరి జ‌గ‌న్నాథ్ డ్రీమ్ ప్రాజెక్ట్‌లో భాగం కావ‌డం గ‌ర్వంగా ఉంద‌ని తెలిపారు. అల్టిమేట్ యాక్ష‌న్ ఎంట‌ర్‌టైన‌ర్‌గా ఈ సినిమా ప్రేక్ష‌కుల్ని అల‌రిస్తుంద‌ని పూరి జ‌గ‌న్నాథ్ అన్నారు. తెలుగు,హిందీ,మ‌ల‌యాళం,క‌న్న‌డ‌,త‌మిళ భాష‌ల్లో ఈ సినిమాను విడుద‌ల‌చేయ‌బోతున్నారు.