Adivi Sesh: కొవిడ్‌ బారిన పడిన మేజర్‌ హీరో
Adivi Sesh: టాలీవుడ్‌ హీరో అడివి శేష్ కొవిడ్‌ బారిన పడ్డాడు. దేశవ్యాప్తంగా కరోనా మరోసారి విజృంభిస్తుండటంతో కేసులు భారీగా పెరిగిపోతున్న విషయం తెలిసిందే.
ప్రముఖ టాలీవుడ్‌ నటుడు, ఈ మధ్యే మేజర్‌ మూవీతో వచ్చిన అడివి శేష్ కొవిడ్‌ బారిన పడ్డాడు. ప్రస్తుతం అతడు ఐసోలేషన్‌లో ఉన్నాడు. ఈ విషయాన్ని అతడే తన ట్విటర్‌ అకౌంట్‌ ద్వారా చెప్పాడు. శుక్రవారం ఉదయం రిలీజైన రెండు టాలీవుడ్‌ సినిమాలు బింబిసార, సీతా రామం గురించి చెబుతూ.. చివర్లో తనకు కరోనా సోకిన విషయాన్ని శేష్ వెల్లడించాడు.
అంతేకాదు తన కోసం ఫ్యాన్స్‌ ఈ రెండు సినిమాలు చూడాలని కూడా కోరడం విశేషం. "ఇవాళ ఉదయమే కల్యాణ్‌రామ్‌ బింబిసారతోపాటు నా ఫ్రెండ్స్‌ సుమంత్‌, దుల్కర్‌ సల్మాన్‌, మృనాల్‌ నటించిన సీతా రామం బ్లాక్‌బస్టర్‌ టాక్ విన్నాను. ఇది కదా కావాల్సింది. కొవిడ్‌ వచ్చి ఐసోలేషన్‌లో ఉన్నా. నా కోసం మార్నింగ్‌ షో ఒక సినిమా.. మ్యాటినీ ఒక సినిమా కుమ్మేయండి" అని అడివి శేష్ ట్వీట్‌ చేశాడు.
ఈ రెండు సినిమాలు సూపర్‌ హిట్‌ టాక్ కొట్టేయడంపై శేష్ ఆనందం వ్యక్తం చేశాడు. శేష్ కూడా ఈ మధ్యే మేజర్‌ రూపంలో తన కెరీర్‌లోనే అతిపెద్ద హిట్‌ అందుకున్న విషయం తెలిసిందే. 2008, నవంబర్‌ 26న ముంబైలో జరిగిన ఉగ్ర దాడుల్లో ప్రాణాలు కోల్పోయిన మేజర్‌ సందీప్‌ ఉన్నికృష్ణన్‌ జీవితచరిత్ర ఆధారంగా తెరకెక్కిన మూవీ ఈ మేజర్‌. తెలుగుతోపాటు హిందీలోనూ ఈ సినిమా మంచి వసూళ్లు సాధించింది.
శశికిరణ్‌ తిక్కా డైరెక్షన్‌లో వచ్చిన మేజర్‌ మూవీ నెట్‌ఫ్లిక్స్‌లో వచ్చిన తర్వాత కూడా మంచి టాక్ సంపాదించింది. గ్లోబల్‌ మూవీస్‌ లిస్ట్‌లో మేజర్‌ కూడా చోటు సంపాదించడం విశేషం. ఇక అడివి శేష్ తన ట్వీట్‌లో చెప్పిన బింబిసార, సీతా రామం మూవీస్‌ కూడా తొలి రోజే పాజిటివ్‌ టాక్ సొంతం చేసుకున్నాయి. ఈ రెండు సినిమాలకు ఓపెనింగ్స్‌ కూడా బాగానే ఉన్నాయి.
సంబంధిత కథనం