Telugu TV Shows TRP Ratings: స్టార్ మా, ఈటీవీ షోస్ టీఆర్పీ రేటింగ్స్.. టాప్ 2లో మళ్లీ ఆ రెండు షోలే

Telugu TV Shows TRP Ratings: స్టార్ మా, ఈటీవీ, జీ తెలుగు ఛానెల్స్ లో వచ్చే టీవీ షోల 41వ వారం టీఆర్పీ రేటింగ్స్ రిలీజ్ అయ్యాయి. వీటిలో మరోసారి స్టార్ మాలో వచ్చే బిగ్ బాస్ తెలుగు 8 వీకెండ్ షోనే టాప్ రేటింగ్ సాధించడం విశేషం. శ్రీముఖి హోస్ట్ చేస్తున్న మరో స్టార్ మా షో కూడా తాజా రేటింగ్స్ లో సత్తా చాటింది.

తెలుగు టీవీ షోస్ టీఆర్పీ రేటింగ్స్

తెలుగు టీవీ షోలకు సంబంధించి 41వ వారం టీఆర్పీ రేటింగ్స్ వచ్చాయి. ఇందులో మరోసారి బిగ్ బాస్ తెలుగు 8 టాప్ లో నిలిచింది. నాగార్జున హోస్ట్ గా వీకెండ్ ఎపిసోడ్ కొన్నాళ్లుగా నంబర్ వన్ గా నిలుస్తూ వస్తోంది.

రేటింగ్ కాస్త తగ్గుతున్నా.. టాప్ ప్లేస్ మాత్రం కొనసాగుతోంది. తాజా రేటింగ్స్ లో బిగ్ బాస్ తెలుగు 8 వీకెండ్ షో 5.53 రేటింగ్ తో తొలి స్థానంలో ఉంది. ఇక వీక్ డేస్ లోనూ ఈ షోకే మంచి రేటింగ్స్ వస్తున్నాయి. 4.46తో రెండో స్థానంలోనే బిగ్ బాస్ తెలుగు 8 నిలిచింది.

మూడో స్థానంలో స్టార్ మాలోనే వచ్చే ఆదివారం విత్ స్టార్ మా పరివారం షో ఉంది. ఈ షో ప్రతి ఆదివారం ఉదయం 11 గంటలకు ఆ ఛానెల్లో వస్తుంది. తాజా రేటింగ్స్ లో 4.13తో మూడో స్థానంలో ఉంది. ఈ షోని శ్రీముఖి హోస్ట్ చేస్తోంది. స్టార్ మా ఛానెల్లో వచ్చే సీరియల్స్ నటీనటులతో ఆటలుపాటలతో ఈ షో సరదాగా సాగిపోతుంది.

ఈటీవీ షోస్ రేటింగ్స్ ఇలా..

ఇక నాలుగో స్థానంలో ఈటీవీలో వచ్చే శ్రీదేవి డ్రామా కంపెనీ నిలిచింది. ఒకప్పుడు టాప్ ప్లేస్ లో ఉంటూ వచ్చిన ఈ షోకి రేటింగ్స్ తగ్గుతూ వస్తున్నాయి. 41వ వారంలో 3.62 రేటింగ్ వచ్చింది.

దీని తర్వాత ఈటీవీలోనే వచ్చే ఢీ 2 సెలబ్రిటీ డ్యాన్స్ షో ఐదో స్థానంలో ఉంది. ఈ షోకి తాజాగా 2.5 రేటింగ్ వచ్చింది. ఇక ఈటీవీలోనే వచ్చే జబర్దస్త్ కు 2.15, సుమ అడ్డా షోకి 1.87, పాడుతా తీయగా షోకి 1.43 రేటింగ్స్ వచ్చాయి. ఈటీవీ న్యూస్ కు మొదటి నుంచీ ఉన్న ఆదరణ తెలుసు కదా.

ఎంటర్టైన్మెంట్ షోలను పక్కన పెడితే.. ప్రతి రోజూ రాత్రి 9 గంటలకు వచ్చే ఈటీవీ న్యూస్ 3.46 రేటింగ్ సాధించింది. అయితే చాలా కాలంగా ఈటీవీలో వచ్చే ఫ్యామిలీ స్టార్స్ రేటింగ్ మాత్రం బయటకు రావడం లేదు. ఈ వారం కూడా ఈ షో రేటింగ్ వెల్లడి కాలేదు.

బిగ్ బాస్ తెలుగు 8వ సీజన్ ప్రారంభం నుంచీ టీఆర్పీ రేటింగ్స్ లో దూసుకెళ్తూనే ఉంది. మొదట్లో ఈ షోని ప్రేక్షకులు పెద్దగా ఆదరించలేదు. దీంతో నిర్వాహకులు కొత్త కొత్త గేమ్స్, వైల్డ్ కార్డ్ ఎంట్రీస్ అంటూ ఆకట్టుకునే ప్రయత్నం చేస్తూనే ఉన్నారు. సెప్టెంబర్ 1న ఈ కొత్త సీజన్ ప్రారంభం కాగా.. సుమారు 8 వారాలుగా టాప్ లోనే కొనసాగుతూ వస్తుండటం విశేషం.