Gaalodu Movie 3 Days Collection: ఆదివారం ఒక్క రోజే రెండు కోట్లు- సుడిగాలి సుధీర్‌కు హీరోగా ఫ‌స్ట్ హిట్ ద‌క్కిన‌ట్లే

Gaalodu Movie 3 Days Collection: గాలోడు సినిమాతో హీరోగా కెరీర్‌లో తొలి క‌మ‌ర్షియ‌ల్ హిట్‌ను అందుకున్నాడు సుడిగాలి సుధీర్‌. మూడు రోజుల్లోనే ఈ సినిమా నాలుగు కోట్ల‌కుపైగా క‌లెక్ష‌న్స్ రాబ‌ట్టింది. రీసెంట్ టైమ్‌లో ఎగ్జిబిట‌ర్ల‌కు లాభాల‌ను మిగిల్చిన చిన్న సినిమాగా నిలిచింది.

తొలిరోజు దాదాపుగా కోటి ప‌ది ల‌క్ష‌లు, రెండో రోజు కోటి రూపాయ‌ల వ‌ర‌కు గాలోడు సినిమాకు క‌లెక్ష‌న్స్ వ‌చ్చాయి. ఆదివారం ట్రేడ్ వ‌ర్గాల ఊహ‌ల‌కు త‌ల‌క్రిందులు చేస్తూ దాదాపు రెండు కోట్ల క‌లెక్ష‌న్స్ సొంతం చేసుకున్న‌ది. క‌ర్ణాట‌క, రాయ‌చూర్‌ల‌లో మ‌రో యాభై ల‌క్ష‌ల వ‌ర‌కు వ‌సూళ్లు వ‌చ్చిన‌ట్లు స‌మాచారం.

ఓవ‌రాల్‌గా మూడు రోజుల్లో నాలుగు కోట్ల యాభై ల‌క్ష‌ల వ‌ర‌కు గాలోడు సినిమాకు క‌లెక్ష‌న్స్ వ‌చ్చిన‌ట్లు ట్రేడ్ వ‌ర్గాలు చెబుతున్నారు. గ‌త రెండు వారాలుగా య‌శోద మిన‌హా పెద్ద సినిమాలు రిలీజ్ కాక‌పోవ‌డం గాలోడుకు క‌లిసివ‌చ్చిన‌ట్లు తెలుస్తోంది. అలాగే జ‌బ‌ర్ధ‌స్త్‌తో పాటు ఇత‌ర రియాలిటీషోస్ ద్వారా బుల్లితెర‌పై సుధీర్‌కు ఏర్ప‌డిన క్రేజ్ ఈసినిమాకు క‌లెక్ష‌న్స్ పెర‌గ‌డానికి దోహ‌ద‌ప‌డింద‌ని అంటున్నారు.

సోమ‌వారం హైద‌రాబాద్‌లో ఈ సినిమా స‌క్సెస్‌మీట్‌ను చిత్ర యూనిట్ నిర్వ‌హించ‌బోతున్న‌ది. రాజ‌శేఖ‌ర్‌రెడ్డి పులిచెర్ల స్వీయ ద‌ర్శ‌క‌త్వంలో ఈ సినిమాను నిర్మించాడు. త‌న‌పై అక్ర‌మంగా ప‌డిన ఓ మ‌ర్డ‌ర్ కేసు నుంచి గాలోడు అనే యువ‌కుడు ఎలా బ‌య‌ట‌ప‌డ్డాడ‌న్న‌దే ఈ సినిమా క‌థ‌. గెహ‌న సిప్పీ హీరోయిన్‌గా న‌టించింది. సాఫ్ట్‌వేర్ సుధీర్ త‌ర్వాత సుడిగాలి సుధీర్‌, రాజ‌శేఖ‌ర్‌రెడ్డి పులిచెర్ల చేసిన సినిమా ఇది.