Sudigali Sudheer: కెరీర్ ప్రారంభంలో ఆయన నన్ను ఎంతో ఎంకరేజ్ చేశారు.. సుడిగాలి సుధీర్ కామెంట్స్

పొలిమేర -2 లాంటి బ్లాక్‌బ‌స్ట‌ర్ విజ‌యం త‌రువాత సత్యం రాజేష్ హీరోగా న‌టిస్తున్న మ‌రో డిఫ‌రెంట్ చిత్రం టెనెంట్‌. ఇందులో సత్యం రాజేష్‌కు జోడీగా మేఘా చౌద‌రి హీరోయిన్‌గా చేస్తోంది. వై.యుగంధ‌ర్ ద‌ర్శ‌క‌త్వంలో రూపొందుతున్న ఈ చిత్రంలో హీరోయిన్ ఎస్తేర్ ఓ ముఖ్య‌పాత్ర‌లో క‌నిపించ‌నుంది. మహాతేజ క్రియేష‌న్స్ ప‌తాకంపై మోగుళ్ల చంద్ర‌శేఖ‌ర్ రెడ్డి నిర్మిస్తున్నారు. టెనెంట్ మూవీ ట్రైల‌ర్ విడుద‌ల కార్య‌క్రమం బుధ‌వారం హైద‌రాబాద్‌లో జ‌రిగింది.

ఈ కార్యక్ర‌మానికి ముఖ్యఅతిథులుగా విచ్చేసిన నిర్మాత సాహు గార‌పాటి, ద‌ర్శ‌కుడు శివ నిర్వాణ‌, హీరో సుడిగాలి సుధీర్‌లు టెనెంట్ ట్రైలర్‌ను ఆవిష్క‌రించారు. "ఈ టీమ్ అంతా నాకు బాగా తెలుసు. సినీ ప‌రిశ్ర‌మ‌ను న‌మ్ముకుని నిజాయితీగా శ్ర‌మిస్తే ఆల‌స్య‌మైనా స‌క్సెస్ త‌ప్ప‌కుండా వ‌రిస్తుంది అని చెప్ప‌డానికి ఈ వేదిక మీద ఉన్న స‌త్యం రాజేష్‌, సుడిగాలి సుధీర్‌లు నిద‌ర్శ‌నం. ఇద్ద‌రూ ఎంతో క‌ష్ట‌ప‌డి ఈ రోజు హీరోలుగా నిరూపించుకున్నారు" అని డైరెక్టర్ శివ నిర్వాణ అన్నారు.

"ఈ చిత్ర ద‌ర్శ‌కుడు ఎంతో ప్ర‌తిభ గ‌ల వ్య‌క్తి. నాకు ఎప్ప‌టి నుంచో తెలుసు. త‌ప్ప‌కుండా ఈ చిత్రం అంద‌రికి మంచి విజ‌యాన్ని అందిస్తుంద‌నే న‌మ్మ‌కం ఉంది. ఈ చిత్ర నిర్మాత మంచి అభిరుచి గ‌ల నిర్మాత. యూనిక్ క‌థ‌ల‌తో త‌ను సినిమాలు నిర్మిస్తుంటారు. టెనెంట్ ట్రైలర్ ఆస‌క్తిని క‌లిగించే విధంగా ఉంది. త‌ప్ప‌కుండా ఈ చిత్రం విజ‌యం సాధిస్తుంద‌నే న‌మ్మ‌కం ఉంది" అని సాహు గార‌పాటి తెలిపారు.

"నా కెరీర్ ప్రారంభంలో న‌న్ను ఎంతో ఎంక‌రైజ్ చేసిన సత్యం రాజేష్ గారు ఈ రోజు వరుస‌గా హిట్‌లు సాధించ‌డం ఆనందంగా ఉంది. వైవిధ్య‌మైన సినిమాలు చేసే నిర్మాత చంద్ర‌శేఖ‌ర్ రెడ్డి గారు ఈ చిత్రంతో బ్లాక్‌బ‌స్ట‌ర్ అందుకోబోతున్నారు" అని సుడిగాలి సుధీర్ చెప్పుకొచ్చాడు.

"ద‌ర్శ‌కుడు క‌థ చెప్ప‌గానే ఎంతో న‌చ్చింది. క‌థ‌లో అన్ని ఎమోష‌న్స్ ఉన్నాయి. ఆ ఎమోష‌న్ అంద‌రికి క‌నెక్ట్ అవుతుంది. నిర్మాత సినిమాను ఎక్క‌డా రాజీప‌డకుండా చాలా స్మూత్‌గా నిర్మించాడు. ప్ర‌తి ఒక్క‌రూ సీట్ఎడ్జ్‌లో కూర్చొని ఎంజాయ్ చేసే సినిమా ఇది. ద‌ర్శ‌కుడు ఎంతో ప్ర‌తిభ‌తో చిత్రాన్ని తెరకెక్కించారు" అని సత్యం రాజేష్ పేర్కొన్నాడు.