Game Changer Teaser: రామ్ చరణ్ గేమ్ ఛేంజర్ టీజర్ రిలీజ్, ఆఖర్లో అన్‌ప్రిడిక్టబుల్‌ డైలాగ్ విసిరిన గ్లోబల్ స్టార్
Ram Charan Game Changer: మెగా అభిమానులు ఎప్పుడెప్పుడా అని ఎదురుచూస్తున్న గేమ్ ఛేంజర్ టీజర్ వచ్చేసింది. కొత్త మేనరిజం, డైలాగ్ డెలివరీతో రామ్ చరణ్ సినిమాపై అంచనాల్ని పెంచేశాడు.
గ్లోబల్ స్టార్ రామ్ చరణ్ నటించిన మూవీ గేమ్ ఛేంజర్ మూవీ టీజర్ శనివారం విడుదలైంది. సెన్సేషనల్ డైరెక్టర్ శంకర్ దర్శకత్వంలో తెరకెక్కిన ఈ చిత్రంలో రామ్ చరణ్‌కి జోడీగా కియార అద్వానీ నటించగా.. జనవరి 10న ప్రపంచవ్యాప్తంగా ఈ సినిమా విడుదల కాబోతోంది. భారీ అంచనాల నడుమ రాబోతున్న ఈ సినిమా టీజర్‌ను ఉత్త‌ర‌ప్ర‌దేశ్ రాజ‌ధాని లక్నోలో చిత్ర యూనిట్ ఈరోజు భారీ ఈవెంట్‌ ఏర్పాటు చేసి రిలీజ్ చేసింది.
తెలుగు, తమిళ్‌తో పాటు గేమ్ ఛేంజర్ మూవీని తమిళ్, హిందీలోనూ రిలీజ్ చేయబోతున్నారు. సార్వత్రిక ఎన్నికల్లో సజావుగా నిర్వహించే అధికారి పాత్రలో రామ్ చరణ్ కనిపించబోతున్నట్లు టీజర్‌ను చూస్తే అర్థమవుతోంది. ఈ సినిమాలో సీనియర్ నటులు శ్రీకాంత్, ఎస్‌.జె.సూర్య, సముద్రఖనితో పాటు అంజలి, సునీల్‌, నవీన్‌చంద్ర కూడా నటించారు.
టీజర్ ఎలా ఉందంటే?
బేసిక్‌గా రామ్ అంత మంచోడు ఇంకోడు లేడు.. కానీ వాడికి కోపం వస్తే.. వాడంత చెడ్డోడు ఇంకోడు ఉండడు అంటూ రామ్ చరణ్‌ను క్యారెక్టర్‌ను పవర్ ఫుల్ డైలాగ్‌తో టీజర్‌లో పరిచయం చేశారు. అలానే ఆఖర్లో ఐ యామ్ అన్‌ప్రిడిక్టబుల్‌ అంటూ టీజర్‌ను క్లోజ్ చేశారు. శ్రీకాంత్, ఎస్‌.జె.సూర్య పొలిటీషియన్ రోల్‌లో కనిపించారు.
రామ్ చరణ్ ఇప్పటి వరకు పొలిటీషియన్‌గా తెరపై కనిపించలేదు. దాంతో ఈ సినిమాపై మెగా అభిమానులు మొదటి నుంచి భారీ అంచనాలు పెంచుకోగా.. టీజర్‌లో స్టూడెంట్‌గా, ఆఫీసర్‌గా, పొలిటీషియన్‌గా కూడా పంచెకట్టుతో రామ్ చరణ్ కనిపించారు. ఈ సినిమాను దిల్ రాజు నిర్మించగా.. థమన్ సంగీతం అందించారు.
డైరెక్టర్ శంకర్ ట్వీట్
లక్నోలో జరిగిన టీజర్ లాంచ్ కు హాజరుకాని డైరెక్టర్ శంకర్ ఎక్స్‌లో స్పందించారు. "హేయ్ లక్నో.. 2025 సంక్రాంతి నాటికి #GameChanger ప్రేక్షకుల ముందుకు తీసుకురావడానికి నేను చెన్నైలోనే ఉన్నాను. కాబట్టి ఈ రోజు మిమ్మల్ని మిస్ అవుతున్నాను. టీజర్ లాంచ్‌ను ఆనందిస్తున్నారని ఆశిస్తున్నా. త్వరలోనే కలుస్తాను’’ అని రాసుకొచ్చాడు.
