Dugout OTT: ఓటీటీలో క్రికెట్ థీమ్ రియాలీటీ షో డగౌట్.. హోస్టుగా నవదీప్.. స్ట్రీమింగ్ ఎప్పుడు? ఎక్కడంటే?

Navdeep DugOut Reality Show: జై మూవీతో హీరోగా తెలుగు సినీ ఇండస్ట్రీకి పరిచయమయ్యాడు నవదీప్. ఈ మూవీ తర్వాత మొదటి సినిమా, గౌతమ్ ఎస్ఎస్‌సీ, చందమామ చిత్రాలతో మంచి క్రేజ్ తెచ్చుకున్నాడు. కానీ, అనంతరం హీరోగా కాకుండా సపోర్టింగ్ క్యారెక్టర్స్, గ్రే రోల్స్ చేస్తూ అలరించాడు. ఇటీవలే న్యూసెన్స్ అనే వెబ్ సిరీసుతో ఓటీటీ ప్రేక్షకులను ఆకట్టుకున్నాడు నవదీప్.

అంతేకాకుండా, 2012లో తెలుగు బుల్లితెరపై సూపర్ అనే రియాలిటీ షోకి హోస్టుగా చేసి అలరించిన హీరో నవదీప్ ఇప్పుడు మరో సరికొత్త రియాలిటీ షోతో ఓటీటీ ప్రేక్షకుల ముందుకు రానున్నాడు. క్రికెట్ థీమ్‌తో త్వరలో ఓటీటీలోకి రానున్న రియాలిటీ గేమ్ షో డగౌట్. రోల్ టు రూల్ అనేది క్యాప్షన్. తాజాగా డగౌట్ టీజర్ విడుదల చేసి స్ట్రీమింగ్ వివరాలను వెల్లడించారు.

"చేతిలో ఆట, ఆటలో వేట.. ఇక క్రికెట్ పండుగే ప్రతీ చోట" అని రాసుకొస్తూ ప్రముఖ ఓటీటీ ఆహాలో డగౌట్ రియాలిటీ షోను నవంబర్ 18న రాత్రి 7 గంటలకు స్ట్రీమింగ్ చేస్తున్నట్లు సోషల్ మీడియా ద్వారా ప్రకటించారు. దీనికి సంబంధించిన టీజర్‌లో "క్రికెట్ అంటే గేమ్ కాదు.. ఒక ఎమోషన్", "రోల్ చేసేది సెలబ్రిటీలు.. రూల్ చేసేది మనం" అంటూ నవదీప్ చెప్పుకొచ్చాడు. ఇక గేమ్ గురించి సెలబ్రిటీలు వచ్చాక చెబుతాని సస్పెన్స్ క్రియేట్ చేశాడు.

టీజర్‌ చూస్తుంటే డైస్‌ను రోల్ చేసి దాంతో పాయింట్స్ ఆధారంగా గెలుపు, ఓటములు ఉంటాయని అర్థమవుతోంది. ఇదే టీజర్‌లో డైరెక్టర్ శ్రీకాంత్ నాగోతి, కలర్స్ స్వాతి రెడ్డితోపాటు మంత్ ఆఫ్ మధు మూవీ టీమ్ సందడి చేసింది. వీళ్లే కాకుండా మంగళవారం సినిమా ప్రమోషన్స్ కోసం హీరోయిన్ పాయల్ రాజ్‌పుత్, శ్రవణ్ రెడ్డి అతిథులుగా హాజరు కానున్నట్లు సమాచారం.