Hi Nanna Trailer: హాయ్ నాన్న ట్రైలర్ వచ్చేసింది.. ఎమోషనల్‍గా.. హృదయాన్ని హత్తుకునేలా..

Hi Nanna Trailer: నేచులర్ స్టార్ నాని హీరోగా నటించిన ‘హాయ్ నాన్న’ సినిమాపై అంచనాలు భారీగా ఉన్నాయి. ఇప్పటికే పాటలతో ఈ చిత్రానికి మంచి హైప్ వచ్చింది. సీతారామం బ్యూటీ మృణాల్ ఠాకూర్ ఈ చిత్రంలో హీరోయిన్‍గా నటించారు. లవ్ స్టోరీ, తండ్రీకూతుళ్ల సెంటిమెంట్, ఫ్యామిలీ ఎమోషన్స్ మేళవింపుతో హాయ్ నాన్న సినిమాను యంగ్ డైరెక్టర్ శౌర్యువ్ తెరకెక్కించారు. ఈ చిత్రం డిసెంబర్ 7న థియేటర్లలో రిలీజ్ కానుంది. కాగా, నేడు (నవంబర్ 24) హాయ్ నాన్న మూవీ ట్రైలర్ వచ్చేసింది.

హాయ్ నాన్న సినిమా ట్రైలర్ హృదయాన్ని హత్తుకునేలా ఉంది. భావోద్వేగపూరితంగా సాగింది. ఈ సినిమాలో విరాజ్ పాత్రలో నాని, యష్న క్యారెక్టర్‌ను మృణాల్ చేశారు. నాని కూతురు మహీ పాత్రలో బేబి కియారా ఖన్నా నటించారు. కూతురికి విరాజ్ (నాని) కథ చెబుతున్నట్టుగా ట్రైలర్ మొదలైంది. తన అమ్మ కథ చెప్పాలని కూతురు అడుగుతుంటారు. అప్పుడు ఓ ప్రమాదం నుంచి మహీని కాపాడటంతో యష్న (మృణాల్ ఠాకూర్) ఎంట్రీ ఉంది. అమ్మ కథ చెబుతానని తన కూతురితో విరాజ్ అంటారు. అమ్మగా తననే ఊహించుకోవాలని మహీతో యష్న చెబుతారు. తన లవ్ స్టోరీని విరాజ్ చెబుతారు. ఆ తర్వాత గొడవలు పడి భార్యతో నాని విడిపోయినట్టుగా ఈ ట్రైలర్‌లో ఉంది. ట్రైలర్ ఆఖర్లో ఎమోషనల్‍గా సాగింది. ఈ ట్రైలర్‌లో శృతి హాసన్ కూడా కనిపించారు. “నా ప్రేమ సరిపోవడం లేదా మహీ” అని ఎమోషనల్‍గా విరాజ్ (నాని) డైలాగ్ చెబితే.. ఇంకా చెప్పొద్దు ఇంటికి వెళ్లిపోదాం నాన్న అని కియారా అతడిని హత్తుకుంటుంది. ఎమోషనల్‍గా హాయ్ నాన్న ట్రైలర్ ముగిసింది.

మొత్తంగా 2 నిమిషాల 40 సెకన్ల పాటు హాయ్ నాన్న ట్రైలర్ ఉంది. ఈ చిత్రానికి సినిమాకు హేషమ్ అబ్దుల్ వాహబ్ సంగీతం అందించారు. హృద్యంగా ఉన్న బ్యాక్‍గ్రౌండ్ మ్యూజిక్ కూడా ఈ ట్రైలర్‌కు పెద్ద బలంగా ఉంది.

తెలుగుతో పాటు హిందీ, తమిళం, కన్నడ, మలయాళం భాషల్లోనూ హాయ్ నాన్న మూవీ ట్రైలర్ రిలీజ్ అయింది. డిసెంబర్ 7న ఈ మూవీ థియేటర్లలో విడుదల కానుంది. వైరా ఎంటర్‌టైన్‍మెంట్స్ పతాకంపై మోహన్ చెరుకూరి, విజేందర్ రెడ్డి ఈ చిత్రాన్ని నిర్మించారు.