Ravi Teja Look in Waltair Veerayya: 'వాల్తేరు వీరయ్య'లో రవితేజ లుక్ అదుర్స్.. మాస్‌కు పునకాలే తక్కువ

Ravi Teja Look in Waltair Veerayya: మెగాస్టార్ చిరంజీవి.. పూర్తి స్థాయి మాస్ ఎంటర్టైనర్ చేసి చాలా రోజులవుతుంది. ఖైదీ నెంబర్ 150 తర్వాత ఆ రేంజ్ మాస్ సినిమా పడలేదనే చెప్పాలి. అలాంటి మాస్ యాక్షన్ సినిమానే వాల్తేరు వీరయ్య. ఇప్పటికే మన మెగాస్టార్‌ పరిచయం చేసిన టీజర్, పాటలు సూపర్ హిట్టయ్యాయి. తాజాగా మాస్ మహారాజా రవితేజ లుక్‌ను విడుదల చేసింది చిత్రబృందం. దీంతో డబుల్ మాస్‌తో ప్రేక్షకులకు ఫుల్ మీల్స్ అందించారు. ఇంకా అభిమానులకైతే పూనకాలే తెప్పించారు. చిరంజీవి, రవితేజ కాంబో కావడంతో ప్రేక్షకుల్లో అంచనాలు భారీ స్థాయిలో నెలకొన్నాయి. తాజాగా రవితేజ పాత్రను పరిచయం చేస్తూ మెగాస్టార్ చిరంజీవీ ట్విటర్ వేదికగా పోస్టు పెట్టారు.

అతని బ్యాక్‌గ్రౌండ్.. కేవలం హార్డ్ వర్క్, అతడి సపోర్ట్.. ప్రేమించే మాస్ అంటూ ట్విటర్‌ వేదికగా పోస్టు పెట్టారు. అంతేకాకుండా రవితేజ పాత్రకు సంబంధించిన టీజర్‌ను విడుదల చేశారు. ఈ వీడియోలో రవితేజ తనదైన మాస్ ఎంట్రీతో అదరగొట్టారు. ఇందులో ఆయన ఏసీపీ విక్రమ్ సాగర్ పాత్రలో నటిస్తున్నారు.

ఈ టీజర్‌ను గమనిస్తే.. రవితేజ ఓ చేతిలో మేకపిల్ల, మరోక చేతిలో గొడ్డలి పట్టుకుని ఫుల్ యాక్షన్‌ మోడ్‌లో కనిపించారు. “ఫస్ట్ టైమ్ ఓ మేకపిల్లను ఎత్తుకొని పులి వస్తోంది.” అనే డైలాగ్‌తో టీజర్ మొదలైంది. “ఏమిరా వారి పిస పిస జేస్తున్నవ్.. నీకింకా సమజ్ కాలే.. నేను ఎవ్వని అయ్యకీ ఇననని” అంటూ తెలంగాణ యాసలో రవితేజ డైలాగ్‌కు అభిమానులు ఫిదా అవుతున్నారు.

బాబీ(కేఎస్ రవీంద్ర) దర్శకత్వంలో రానున్న ఈ సినిమాలో మన మెగాస్టార్ సరసన శృతిహాసన్ హీరోయిన్‌గా చేస్తోంది. రవితేజ ఇందులో కీలక పాత్ర పోషిస్తున్నారు. కేథరిన్ థెరీసా మరో హీరోయిన్. ఈ సినిమాకు దేవిశ్రీ ప్రసాద్ సంగీతాన్ని అందిస్తున్నారు. మైత్రీ మూవీ మేకర్స్ పతాకంపై నవీన్ యర్నేని, వై రవిశంకర్ సంయుక్తంగా నిర్మిస్తున్నారు. జనవరి 13న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.