Love You Ram Teaser: లవ్ యూ రామ్ టీజర్ వచ్చేసింది.. రొమాంటిక్ ఎంటర్టైనర్‌గా చిత్రం

Love You Ram Teaser: సంతోషం, మిస్టర్ పర్ఫెక్ట్ లాంటి సూపర్ హిట్ చిత్రాలను తెరకెక్కించిన దర్శకుడు దశరథ్. చివరగా ఆయన 2016లో వచ్చిన శౌర్య అనే చిత్రానికి దర్శకత్వం వహించారు. ఆ తర్వాత మూవీస్‌కు గ్యాప్ తీసుకున్న ఆయన.. తాజాగా మళ్లీ ప్రేక్షకులను పలకరించనున్నారు. లవ్ యూ రామ్ అనే సినిమాకు కథను అందించారు. డీవై చౌదరీ ఈ చిత్రానికి దర్శకత్వం వహించారు. రోహిత్ బెహల్, అపర్ణ జనార్థనన్ హీరో, హీరోయిన్లుగా చేశారు. తాజాగా ఈ సినిమాకు సంబంధించిన టీజర్‌ను విడుదలైంది.

ప్రముఖ దర్శకుడు హరీష్ శంకర్ చేతుల మీదుగా ఈ చిత్ర టీజర్ విడుదలైంది. తెలంగాణ మంత్రి పువ్వాడ అజయ్ కుమార్.. ఈ సినిమా సాంగ్ టీజర్‌ను రిలీజ్ చేశారు. లవ్‌స్టోరీతో పాటు ఎమోషనల్ పార్ట్‌ను కూడా ఇందులో చూపించారు. రొమాంటిక్, ఫ్యామిలీ ఎంటర్టైనర్‌గా తెరకెక్కినట్లు ఈ చిత్ర టీజర్ చూస్తేనే తెలుస్తోంది.

ఈ సందర్భంగా డైరెక్టర్ దశరథ్ మాట్లాడుతూ.. ఈ సినిమా కోసం ప్రతిభావంతులైన యువతీ, యువకులు పనిచేశారు. ఇందులో పనిచేసినవారదరికీ కృతజ్ఞతలు తెలుపుతున్నానంటూ ఆయన అన్నారు. హరీష్ శంకర్ మాట్లాడుతూ.. ఈ సినిమా విజువల్‌గా చాలా బాగుందని, దశరథ్ గారు ప్రాణం పెట్టి పనిచేశారని స్పష్టం చేశారు. ఈ సినిమా తర్వాత ఆయన నటుడిగానూ ఫుల్ బిజీ అవుతారని తెలిపారు.

ఈ చిత్రంలో రోహిత్ బెహల్, అపర్ణ జనార్థనన్ హీరో, హీరోయిన్లుగా చేయగా.. బెనర్జీ, ప్రదీప్, కాదంబరి కిరణ్, మల్లిక్ తదితరులు కీలక పాత్రలు పోషించారు. డీవై చౌదరి దర్శకత్వం వహించిన ఈ సినిమాను ఆయన నిర్మాతగా వ్యవహరించారు. మన ఎంటర్టైన్మెంట్స్, శ్రీ చక్రఫిల్మ్స్ పతాకాలంపై సినిమాను నిర్మించారు. కే వేద సంగీతాన్ని సమకూర్చారు. త్వరలోనే ఈ చిత్రాన్ని ప్రేక్షకుల ముందుకు తీసుకురానున్నారు.