Khichdi 2 OTT release date: ఓటీటీలోకి వచ్చేస్తున్న సూపర్ హిట్ కామెడీ మూవీ.. ఎప్పటి నుంచి స్ట్రీమింగ్ అంటే..

Khichdi 2 OTT release date: మరో కామెడీ మూవీ కిచిడీ 2 ఓటీటీ స్ట్రీమింగ్ కు సిద్ధమైంది. 2010లో వచ్చిన సూపర్ హిట్ మూవీ కిచిడీ: ది మూవీకి సీక్వెల్ గా రిలీజైన ఈ కిచిడీ 2 ఇప్పుడు జీ5 (zee5 ott) ఓటీటీలోకి రానుంది.

ఈ మూవీని ఫిబ్రవరి 9 నుంచి స్ట్రీమింగ్ చేయనున్నట్లు జీ5 ఓటీటీ గురువారం (జనవరి 25) వెల్లడించింది. ఈ కామెడీ డ్రామా మూవీకి థియేటర్లలో మంచి రెస్పాన్స్ వచ్చింది. ప్రపంచవ్యాప్తంగా ఈ సినిమా రూ.5.65 కోట్లు వసూలు చేయడం విశేషం.

కిచిడీ 2 ఎలా ఉందంటే?

కిచిడీ 2 మూవీలో సుప్రియ పాఠక్, రాజీవ్ మెహతా, అనంగ్ దేశాయ్, వందనా పాఠక్, జమ్నాదాస్ మజేతియా, కీర్తి కుల్హరి, అనంత్ విధాత్ శర్మలాంటి వాళ్లు నటించారు. బాలీవుడ్ ప్రముఖ కొరియోగ్రాఫర్ ఫరా ఖాన్, ప్రముఖ నటుడు ప్రతీక్ గాంధీ అతిథి పాత్రలు పోషించారు. కిచిడీ 2: మిషన్ పాంతుకిస్తాన్ మూవీ గతేడాది నవంబర్ 17న థియేటర్లలో రిలీజైంది.

సీక్వెల్ లో, పరేఖ్ కుటుంబం ప్రపంచాన్ని రక్షించడానికి సాహసం చేస్తుంది. ఇందులో ప్రఫుల్ ద్విపాత్రాభినయం చేస్తాడు. కాల్పనిక దేశం పాంతుకిస్తాన్ చక్రవర్తిగా అతడు కనిపించాడు. జమ్నాదాస్ మజేతియా, ఆతిష్ కపాడియాకు చెందిన హ్యాట్సాఫ్ ప్రొడక్షన్స్ రూపొందించిన కిచిడీ.. మొదట 2002లో స్టార్ ప్లస్ లో టీవీ సిరీస్ గా వచ్చింది. ఇన్ స్టంట్ కిచిడీ పేరుతో రెండవ సీజన్ 2004లో స్టార్ వన్ లో ప్రసారమైంది. 2010లో ఈ షోను సినిమాగా తీశారు. దాదాపు 13 ఏళ్ల తర్వాత ఇప్పుడు కిచిడీ 2తో ప్రేక్షకుల ముందుకు వచ్చారు మేకర్స్.

జమ్నాదాస్ మజేతియా మాట్లాడుతూ "రెండు దశాబ్దాలకుపైగా కిచిడీ ఫ్రాంచైజీ ప్రేక్షకులను కడుపుబ్బా నవ్విస్తోంది. మా చివరి సినిమా వచ్చి దశాబ్దం దాటినా, కిచిడీ మళ్లీ రావడం గురించి నిరంతరం ఆరా తీస్తూనే ఉన్నారు. ఇది అభిమానులతో బలమైన బంధాన్ని కలిగి ఉంది. జీ5లో కిచిడీ 2 వరల్డ్ డిజిటల్ ప్రీమియర్ తో ఈ కామెడీ ఫ్రాంచైజీ తన ఫ్యామిలీని విస్తరించడమే కాకుండా అంతర్జాతీయ సరిహద్దులను కూడా దాటుతూనే ఉన్నాం అని అన్నారు.

రచయిత, దర్శకుడు ఆతిష్ కపాడియా మాట్లాడుతూ.. "అభిమానులు కిచిడీ పునరాగమనం కోసం ఆసక్తిగా ఎదురుచూశారు. ఈ కొత్త ఆఫర్ తో.. మేము పాంతుకిస్తాన్ లో వారి హాస్య ప్రదర్శనల ద్వారా కిచిడి కుటుంబం సాటిలేని క్రేజ్ ను తిరిగి తీసుకువస్తున్నాము. ఈ ఫ్రాంచైజీకి మా హృదయాలలో ప్రత్యేక స్థానం ఉంది. ఈ సీక్వెల్ ద్వారా, అభిమానులు ఇష్టపడే అద్భుతమైన హాస్యాన్ని పెంచాలని మేము లక్ష్యంగా పెట్టుకున్నాము. ఈ అసాధారణ తారాగణంతో పనిచేయడం చాలా ఆనందంగా ఉంది. చాలా సంవత్సరాల తర్వాత వారితో తిరిగి రావడం బాగుంది అని అన్నాడు.

ఫ్రాంచైజీలో హంసా పాత్ర పోషిస్తున్న సుప్రియా పాఠక్ మాట్లాడుతూ 'కిచిడీ 2: మిషన్ పాంతుకిస్థాన్'లో హంసను తిరిగి తీసుకురావడం చాలా ఆనందంగా ఉంది. ఆ పాత్రలోని నవ్వు, స్నేహం, అసంబద్ధత నా ముఖంలో ఎప్పుడూ చిరునవ్వును తీసుకువస్తాయి. ఒక పాత్రగా హంస అన్ని వయసుల వారికీ బాగా దగ్గరైంది. ఇది నా జీవితంలో అత్యంత సంతృప్తికరమైన పాత్ర అని చెప్పింది.